ଭଦ୍ରକ : ଭଦ୍ରକ ଜିଲ୍ଲା ତିହିଡ଼ି ବ୍ଳକ ଅନ୍ତର୍ଗତ ବାରଷର ପଞ୍ଚାୟତ ତଳଦପା ଠାରେ ଏକ ଭୟାବହ ଅଗ୍ନିକାଣ୍ଡ ଘଟିଛି । ଖବର ଅନୁଯାୟୀ, ଘରେ ଖାଇ ସାରିବା ପରେ ପରିବାର ଲୋକେ ଶୋଇଥିବା ଅବସ୍ଥାରେ ଏହି ଅଗ୍ନିକାଣ୍ଡ ଘଟିଥିଲା । ତେଣୁ ହଠାତ ସେମାନେ ଘରୁ ବାହାରି ଆସିପାରିନଥିଲେ । ଗ୍ରାମବାସୀଙ୍କ ସହଯାେଗରେ ବହୁ କଷ୍ଟରେ ଜୀବନ ରକ୍ଷା ପାଇଥିଲା । ହେଲେ ସେତେବେଳକୁ ମାଆ ଓ 8 ବର୍ଷର ଶିଶୁ ଦେହରେ ନିଆଁ ଲାଗି ସେମାନେ ଜଳି ଯାଇଥିଲେ ।
ପ୍ରଥମେ ସେମାନଙ୍କୁ ଆମ୍ବୁଲାନ୍ସ ଯୋଗେ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ସେଠାରେ ଉଭୟଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ପରେ ତାଙ୍କୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ଜଣାପଡିଛି । ତେବେ ଏହି ଅଗ୍ନିକାଣ୍ଡର କାରଣ ସ୍ପଷ୍ଟ ହୋଇନଥିଲା ବେଳେ ସର୍ଟସର୍କିଟ ଯୋଗୁଁ ଏହି ଅଗ୍ନିକାଣ୍ଡ ଘଟିଛି ବୋଲି ସନ୍ଦେହ କରାଯାଉଛି ।
ଭଦ୍ରକରୁ ଦେବାଶିଷ ମଦାପାତ୍ର, ଇଟିଭି ଭାରତ
