ଭଦ୍ରକ: ନିଖୋଜ ଯୁବକଙ୍କ ନରକଙ୍କାଳ ବାଡିରୁ ଉଦ୍ଧାର । ତେବେ କିଛି ଦିନ ତଳେ ନିଖୋଜ ହୋଇଥବା ଯୁବକଙ୍କ ନରକଙ୍କାଳ ବୋଲି ସନ୍ଦେହ କରଯାଉଛି । ମିଳିଥିବା ଜୋତା ଓ କପଡା ଦେଖି ଏହି କଙ୍କାଳ ନିଖୋଜ ଯୁବଙ୍କର ବୋଲି ସନ୍ଦେହ କରାଯାଉଛି ।
ସୂଚାନା ଅନୁସାରେ, ଭଦ୍ରକ ଜିଲ୍ଲା ଧାମନଗର ଥାନା ଦେହୁଡି ଆନନ୍ଦପୁର ଅଞ୍ଚଳରୁ ଏହି ନରକଙ୍କାଳ ମିଳିଛି । ହାତିବାଡି ଗାଁର 19 ବର୍ଷୀୟ ଯୁବକ ଖଗେଶ୍ବର ନାୟକ ଗତ ଡିସେମ୍ବର ମାସରୁ ନିଖୋଜ ଥିଲେ । ମୋବାଇଲରେ ଫ୍ରି ଫାୟାର ଓ ଲୁଡୋ ଗେମ ଖେଳିବା ଦ୍ଵାରା ବାରମ୍ବାର ବାପାଙ୍କ ବ୍ୟାଙ୍କ ଖାତାରୁ ଟଙ୍କା ଖର୍ଚ୍ଚ କରିଥିଲେ ।
ଏଥିରେ ଖେଳି ପ୍ରାୟ 20 ହଜାରରୁ ଅଧିକ ଟଙ୍କା କଟିଯାଇଥିଲା । ଫଳରେ ପରିବାର ଲୋକଙ୍କ ତାଗିଦ ପରେ ଖଗେଶ୍ଵର ମୋବାଇଲକୁ ଘରେ ରଖି କେଉଁ ଆଡେ ଚାଲି ଯାଇଥିଲେ। ଏହି ସମୟରେ ମୋବାଇଲରୁ ଗେମକୁ ଅନଇନ୍ସଟାଲ କରିବା ସହ ମୋବାଇଲରୁ କେତେକ ମେସେଜ ମଧ୍ୟ ଡିଲିଟ କରି ଦେଇଥିଲେ ।
ଶେଷରେ ପଡୋଶୀ, ସାଙ୍ଗସାଥୀ ଓ ବନ୍ଧୁଙ୍କ ଘରେ ପଚରା ଉଚୁରା ପରେ ଘର ଲୋକେ ଥାନାରେ ଅଭିଯୋଗ କରିଥଲେ । ତେବେ ତାଙ୍କର କୌଣସି ଖୋଜ ଖବର ମିଳି ନଥିଲା । ଏବେ ତାଙ୍କ ବାଡିରୁ ନରକଙ୍କାଳ ଉଦ୍ଧାର ହୋଇଛି । ଖଗେଶ୍ଵରଙ୍କ ଦାଦା ବାଡିକୁ ବାଉଁଶ କାଟିବା ପାଇଁ ଯାଇଥିବା ବେଳେ ଏକ ଝୁଲନ୍ତା ଖପୁରି ଦେଖିଥିଲେ । ଏଥିସହ ଖଗେଶ୍ଵରଙ୍କ ଜୋତା ଓ ଅନ୍ୟାନ୍ୟ କପଡା ସେଠାରେ ପଡିଥିବା ସୂଚନା ମିଳିଛି । ଏହି ନର କଙ୍କାଳ ଖଗେଶ୍ଵରଙ୍କର ବୋଲି ସନ୍ଦେହ କରାଯାଉଛି । ପୋଲିସର ତଦନ୍ତ ପରେ ଏହା ସ୍ପଷ୍ଟ ହେବ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
