ଭଦ୍ରକ: କୋରୋନା କାଳରେ ସାଧାରଣ ଜନ ଜୀବନ ଅସ୍ତବ୍ୟସ୍ତ ହୋଇ ପଡିଥିବା ବେଳେ ମାଡ ଖାଇଛି ପାର୍ବଣ ଋତୁ । ଏମିତିରେ ମୂର୍ତ୍ତି ବିକି ରୋଜଗାର କରୁଥିବା କାରିଗର ଏବେ ଚିନ୍ତାରେ । ମହାମାରୀ କୋରୋନା ପାଇଁ ସାରା ବିଶ୍ଵ ଅତି ଜଟିଳ ପରିସ୍ଥିତି ଦେଇ ଗତି କରୁଛି । ଗତ ମାର୍ଚ୍ଚ ମାସରୁ ଲାଗୁ ହୋଇଥିବା କଟକଣା ଯୋଗୁଁ ସବୁ ବେପାର ଠପ । ଯେଉଁଥିରେ ଏବେ ପୂଜା ପାର୍ବଣ ସମୟରେ ମୂର୍ତ୍ତି କାରିଗର ମାନେ ବିଶେଷ ପ୍ରଭାବିତ ହୋଇଥିବା ଦେଖାଯାଇଛି । ଯାହାର ଚିତ୍ର ଦେଖିବାକୁ ମିଳିଛି ଭଦ୍ରକର ମୂର୍ତ୍ତି କାରିଗରଙ୍କ ପାଖରେ।
ଗତ ମାର୍ଚ୍ଚ ମାସରୁ କଟକଣା ଯୋଗୁଁ ଲୋକମାନେ କୌଣସି ମୂର୍ତ୍ତି କିଣୁ ନାହଁନ୍ତି । ଫଳରେ କାରିଗରମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ବୋଲି କହିଛନ୍ତି । ଜିଲ୍ଲାରେ ରାମ ନବମୀ, ଗଣେଶ ପୂଜା ଅତି ଧୁମଧାମରେ ହୋଇଥାଏ । ମାତ୍ର କୋରୋନା ଯୋଗୁଁ ଏସବୁ ପର୍ବ ବନ୍ଦ ହେବାରୁ ମୂର୍ତ୍ତି କାରିଗରମାନଙ୍କ ବେପାର ପୁରା ଠପ ହୋଇଯାଇଛି । ତେଣୁ ଦୁର୍ଦ୍ଦିନରେ କାଳାତିପାତ କରୁଛନ୍ତି ଏମାନେ ।
ଚଳିତ ବର୍ଷ କଟକଣା ଯୋଗୁଁ ସ୍କୁଲ, କଲେଜ, କ୍ଲବ ଆଦି ସ୍ଥାନରେ ଗଣେଶ ପୂଜା ହେବ ନାହିଁ ବୋଲି ନିଷ୍ପତ୍ତି ହୋଇଛି । ଯାହା ଫଳରେ ମୂର୍ତ୍ତି କାରିଗରମାନେ ପୂର୍ବ ପରି ମୂର୍ତ୍ତି ତିଆରି କରୁନାହାନ୍ତି କି ପୂର୍ବରୁ ତିଆରି ହୋଇଥିବା ମୂର୍ତ୍ତି ବିକ୍ରି ହେଉ ନାହିଁ । ପ୍ରଶାସନ 3 ଫୁଟରୁ ଉର୍ଦ୍ଧ ମୂର୍ତ୍ତି ନକରିବାକୁ ନିର୍ଦ୍ଦେଶ ଦେଇଛି । ଫଳରେ କିଛି ଛୋଟ ମୂର୍ତ୍ତି ନିର୍ମାଣ କରି ଯାହା କିଛି ମିଳିବ ବୋଲି ଆଶା ରଖିଛନ୍ତି ଏହି କାରିଗରମାନେ । ତେଣୁ କିଛି ସରକାରୀ ସାହାଯ୍ୟ ମିଳିଲେ ମହାମାରୀ ସମୟରେ ଜୀବିକା ନିର୍ବାହ ହେବ ବୋଲି କାରିଗାରମାନେ ଆଶା କରିଛନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
