ଭଦ୍ରକ: ଜଳ ନିଷ୍କାସନ ଦାବିରେ ବୁଧବାର ଜିଲ୍ଲାର ଜାମୁଝାଡି-ଧାମରା ରାସ୍ତାର ନରସିଂହପୁର ଛକ ଠାରେ ରାସ୍ତାରୋକ କରିଥିଲେ ଅଞ୍ଚଳବାସୀ । ଅଳ୍ପ ବର୍ଷାରେ ନରସିଂହପୁର ଏବଂ ମଖଲପୁର ଗାଁ ବୁଡିଯିବା ସହିତ ଏକର ଏକର ଚାଷ ଜମି କ୍ଷତିଗ୍ରସ୍ତ ହେଉଛି । ବର୍ଷା ଋତୁରେ ଉଭୟ ଗାଁର ପାଖାପାଖି 400 ପରିବାର ଏକ ପ୍ରକାର ଜଳବନ୍ଦୀ ଭାବେ ଜୀବନ ଅତିବାହିତ କରୁଛନ୍ତି ।
ଏହି ସମସ୍ୟା ସମ୍ପର୍କରେ ବାରମ୍ବାର ସ୍ଥାନୀୟ ପ୍ରଶାସନ ପାଖରୁ ଆରମ୍ଭ କରି ଜିଲ୍ଲାପାଳଙ୍କ ପର୍ଯ୍ୟନ୍ତ ଜଣାଇଛନ୍ତି ସ୍ଥାନୀୟ ଲୋକେ । ହେଲେ ସେମାନଙ୍କ କଥା କେହି ବୁଝୁନଥିବାରୁ ବାଧ୍ୟ ହୋଇ ଗାଁ ଲୋକେ ରାଜରାସ୍ତାକୁ ଓହ୍ଲାଇବା ସହିତ ରାସ୍ତା ଅବରୋଧ କରିଥିଲେ । ଫଳରେ ଦୀର୍ଘ ସମୟ ଧରି ଜାମୁଝାଡି-ଧାମରା ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଥିଲା ।
ତେବେ ଆଗକୁ ବର୍ଷା ଋତୁ ଆସୁଥିବାରୁ ତୁରନ୍ତ ଗାଁରୁ ଏକ ନାଳ କରାଯାଇ ଜଳ ନିଷ୍କାସନର ବ୍ୟବସ୍ଥା ପାଇଁ ଦାବି ହୋଇଛି । ଜଳ ନିଷ୍କାସନ ବ୍ୟବସ୍ଥା ନହେବା ପର୍ଯ୍ୟନ୍ତ ରାସ୍ତାରୋକ ଚାଲୁ ରହିବ ବୋଲି ଲୋକମାନେ ଚେତାବନୀ ଦେଇଥିଲେ । ପରେ ଘଟଣାସ୍ଥଳରେ ବାସୁଦେବପୁରର ଅତିରିକ୍ତ ତହସିଲଦାର ପହଞ୍ଚି ଏ ସମ୍ପର୍କରେ ବିହିତ ପଦକ୍ଷେପ ଗ୍ରହଣ କରାଯିବାର ନିର୍ଭର ପ୍ରତିଶ୍ରୁତି ଦେବା ପରେ ରାସ୍ତାରୋକ ହଟିଥିଲା ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
