ଭଦ୍ରକ: ଜିଲ୍ଲାସ୍ଥିତ ବନ୍ତ ବ୍ଲକ ପରିସରରେ ମହିଳା ସ୍ବୟଂ ସହାୟିକା ଗୋଷ୍ଠୀଙ୍କ ଆନ୍ଦୋଳନ ଘଟଣାରେ ପୋଲିସ 9 ଜଣଙ୍କୁ ଗିରଫ କରିଛି । ଗିରଫ ସମସ୍ତ ମହିଳାଙ୍କ ଜାମିନ ନାମଞ୍ଜୁର ହେବା ପରେ ସେମାନଙ୍କୁ ଜିଲ୍ଲାସ୍ଥିତ ସ୍ବତନ୍ତ୍ର ଉପକାରାଗାରକୁ ପଠାଇ ଦିଆଯାଇଛି ।
ସୂଚନା ଅନୁଯାୟୀ ଭଦ୍ରକ ଜିଲ୍ଲା ବନ୍ତ ବ୍ଲକ ରାମଚନ୍ଦ୍ରପୁର ପଞ୍ଚାୟତ ରାମେଶ୍ବର ମହିଳା ସ୍ବୟଂ ସହାୟିକା ଗୋଷ୍ଠୀର ସଭାନେତ୍ରୀ ଓ ସମ୍ପାଦିକା ଚୟନରେ ବନ୍ତ ବିପିଏମ ପାତର ଅନ୍ତର କରିଥିବା ଅଭିଯୋଗ କରି ବୁଧବାର କେତେକ ମହିଳା ଓ ପୁରଷମାନେ ବ୍ଲକ ପରିସରରେ ଆନ୍ଦୋଳନ କରିଥିଲେ । ଏଥିରେ ଜଣେ ପୋଲିସ କର୍ମଚାରୀଙ୍କ ମୁଣ୍ଡରେ ଗଭୀର ଆଘାତ ଲାଗିଥିବାବେଳେ ଜଣେ ବ୍ଲକ କର୍ମଚାରୀ ଆହତ ହୋଇଥିଲେ ।
ସେହିପରି ଉତ୍ୟକ୍ତ ଆନ୍ଦୋଳନକାରୀ କମ୍ପ୍ୟୁଟର ଓ ବିଭିନ୍ନ ଆସବାବପତ୍ର ଭଙ୍ଗାରୁଜା କରିବା ସହ ଗୁରୁତ୍ବପୂର୍ଣ୍ଣ କାଗଜପତ୍ର ନଷ୍ଟ କରିଦେଇଥିଲେ । ଏନେଇ ପୋଲିସ ଦୁଇଟି ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ତଦନ୍ତ ପରେ ପୋଲିସ ଆନ୍ଦୋଳନରେ ସମ୍ପୃକ୍ତ ଥିବା 9 ଜଣଙ୍କୁ ଆଜି(ଗୁରୁବାର) ଗିରଫ କରିଛି । ଗିରଫ ଆନ୍ଦୋଳନକାରୀଙ୍କ ମଧ୍ୟରେ ମହିଳା ଓ ପୁରୁଷ ଅଛନ୍ତି । ଏନେଇ ଭଦ୍ରକ ଏସଡିପିଓ ସାର୍ଥକ ରାୟ ସୂଚନା ଦେଇଛନ୍ତି । ଏଥିସହ ମାମଲାର ଦତନ୍ତ ପ୍ରକ୍ରିୟା ଆଗକୁ ଜାରି ରହିବ ବୋଲି ଏସଡିପିଓ କହିଛନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
