ଭଦ୍ରକ: ପୁଣି ସାମ୍ନାକୁ ଆସିଲା ଡାକ୍ତରଙ୍କ ଚରମ ଅବହେଳା । ଅସ୍ତ୍ରୋପଚାର ସମୟରେ ରୋଗୀଙ୍କ ମୃତ୍ୟୁ ଅଭିଯୋଗ । ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲାରେ । ମୃତକ ହେଲେ ଯାଜପୁର ଜିଲ୍ଲା କୋଳଥା ଗାଁର ସ୍ବର୍ଣ୍ଣଲତା ମହାପାତ୍ର । ଏକ ଘରୋଇ ନର୍ସିଂହୋମରେ ଚିକିତ୍ସାରେ ଅବହେଳା ଯୋଗୁଁ ସ୍ବର୍ଣ୍ଣଲତାଙ୍କ ମୃତ୍ୟୁ ହୋଇଥିବା ଅଭିଯୋଗ ଆଣିଛନ୍ତି ମୃତକଙ୍କ ପରିବାର ଲୋକେ ।
ସୂଚନା ଅନୁଯାୟୀ, ମୃତ ସ୍ବର୍ଣ୍ଣଲତାଙ୍କର ବର୍ଷେ ହେବ ବିବାହ ହୋଇଥିଲା । ସନ୍ତାନ ହେଉନଥିବାରୁ ପରିବାର ଲୋକ ଭଦ୍ରକର ଏକ ଘରୋଇ କ୍ଲିନିକରେ ଚିକିତ୍ସା କରାଉଥିଲେ । ପରେ ତାଙ୍କର ଏକ ସାମାନ୍ୟ ଅସ୍ତ୍ରୋପ୍ରଚାର ପାଇଁ ଘରୋଇ ନର୍ସିଂହୋମରେ ଭର୍ତ୍ତି କରିଥିଲେ । ହେଲେ ଓଟି ଭିତରେ ଡାକ୍ତର ଅସ୍ତ୍ରୋପ୍ରଚାର କରୁଥିବା ସମୟରେ ତାଙ୍କର ମୃତ୍ୟୁ ହୋଇଥିଲା ।
ଏହି ଖବର ଜଣାପଡିବା ପରେ ଡାକ୍ତରଙ୍କ ଅବହେଳା ଯୋଗୁଁ ରୋଗୀର ମୃତ୍ୟୁ ହୋଇଛି ଏବଂ ସମ୍ପୃକ୍ତ ଡାକ୍ତରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ ଦାବି କରିବା ସହ ନର୍ସିଂ ହୋମରେ ହୋ ହାଲ୍ଲା କରିଥିଲେ ପରିବାର ଲୋକେ । ସେପଟେ ଅସ୍ତ୍ରୋପ୍ରଚାର ସମୟରେ କୌଣସି କାରଣରୁ ରୋଗୀଟିର ହୃଦଘାତରେ ମୃତ୍ୟୁ ହୋଇଥିବା ନର୍ସିଂ ହୋମ ପକ୍ଷରୁ ସଫେଇ ଦିଆଯାଇଥିବା ସୂଚନା ରହିଛି ଖବର ପାଇ ଭଦ୍ରକ ଟାଉନ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଅଧିକ ତଦନ୍ତ ଆରମ୍ଭ କରିଛି ।
ଭଦ୍ରକକୁ ଦେବାଶିଷ ମହାପାତ୍ର, ଇଟିଭି ଭାରତ
