ଭଦ୍ରକ: ଟଙ୍କା ପାଇଁ ବଧୂହତ୍ୟା । 60 ଲକ୍ଷ ଟଙ୍କା ଯୋଗାଡ କରିନପାରିବାରୁ ମହିଳାଙ୍କୁ ହତ୍ୟା କରାଯାଇଥିବା ଅଭିଯୋଗ ଆଣିଲେ ପରିବାର ଲୋକେ । ଝୁଲନ୍ତା ଅବସ୍ଥାରେ ମହିଳାଙ୍କ ମୃତଦେହ ଉଦ୍ଧାର । ଏଭଳି ଘଟଣା ଘଟିଛି ତିହିଡି ଥାନା ଅନ୍ତର୍ଗତ ଅଚକ ଗ୍ରାମରେ । ମୃତ ମହିଳା ଜଣଙ୍କ ହେଉଛନ୍ତି ସୁଜାତା ମହାପାତ୍ର ।
ମିଳିଥିବା ସୂଚନା ଅନୁଯାୟୀ, ଗତ 2015 ମସିହାରେ ଅଚକ ଗ୍ରାମର ଜ୍ଞାନ ରଞ୍ଜନ ଦାଶଙ୍କ ସହ ଗୁଜିଦରଡା ଅଞ୍ଚଳର ସୁଜାତା ମହାପାତ୍ରଙ୍କ ବିବାହ ହୋଇଥିଲା । ସୁଜାତା ଜଣେ ଉଚ୍ଚ ଶିକ୍ଷିତା ହୋଇଥିବା ସହ ସେ ଜଣେ ସ୍ବାସ୍ଥ୍ୟ କର୍ମୀ ଭାବେ ସରକାରୀ ଚାକିରି କରୁଥିଲେ । ତାଙ୍କର ଦୁଇଟି ସନ୍ତାନ ମଧ୍ୟ ଅଛନ୍ତି । ତାଙ୍କ ସ୍ଵାମୀ ଜ୍ଞାନ ରଞ୍ଜନ ମଧ୍ୟ ଜଣେ ଶିକ୍ଷକ ଭାବେ କାର୍ଯ୍ୟ କରୁଛନ୍ତି । ତେଣୁ ଉଭୟ ରୋଜଗାର କରୁଥିବା ଯୋଗୁ ଭଲରେ ଭଲରେ ଦିନ ଅତିବାହିତ କରୁଥିଲେ ।
ତେବେ ବିବାହର କିଛି ଦିନ ପରେ ଶାଶୁ ଘର ଲୋକେ ସୁଜାତାଙ୍କୁ ନିର୍ଯାତନା ଦେବା ଆରମ୍ଭ କରିଥିଲେ । କିଛି ଦିନ ସୁଜାତା ତାଙ୍କ ପରିବାର ଲୋକଙ୍କୁ ଏହା ଲୁଚାଇବା ପରେ ଶେଷରେ ଅସହ୍ୟ ହେବାରୁ କହିଥିଲେ । ଏନେଇ ସୁଜାତାଙ୍କ ପରିବାର ଲୋକ ଏବଂ ସ୍ଵାମୀ ଜ୍ଞାନ ରଞ୍ଜନଙ୍କ ପରିବାର ଲୋକଙ୍କ ମଧ୍ୟରେ ବହୁବାର ଆପୋଷ ବୁଝାମଣା ମାଧ୍ୟମରେ ସମସ୍ୟା ସମାଧାନ କରାଯାଇଥିଲା । ପରବର୍ତ୍ତୀ ସମୟରେ ପୁଣି ସମାନ ସ୍ଥିତି ଉପୁଜିଥିଲା । ଶେଷରେ ବାଧ୍ୟ ହୋଇ ଏନେଇ ସୁଜାତାଙ୍କ ପରିବାର ଲୋକେ ତିହିଡ଼ି ଥାନାରେ ଅଭିଯୋଗ କରିଥିଲେ । ହେଲେ ମଧ୍ୟସ୍ଥିଙ୍କ ଦ୍ଵାରା ଥାନାରେ ମଧ୍ୟ ବହୁବାର ଆପୋଷ ବୁଝାମଣା ମାଧ୍ୟମରେ ସମାଧାନ କରାଯାଇଥିଲା ।
ସୁଜାତାଙ୍କ ମାଆ କହିଛନ୍ତି, ''ନିକଟରେ ତିହିଡି ଅଞ୍ଚଳରେ ଏକ ଜାଗା କିଣିବା ପାଇଁ ଝିଅ ସୁଜାତାଙ୍କୁ 60 ଲକ୍ଷ ଟଙ୍କା ମାଗିଥିଲେ ସ୍ୱାମୀଙ୍କ ସମେତ ଶଶୁର ଘର ଲୋକେ । ହେଲେ ସୁଜାତା ଏତେ ଟଙ୍କା ନ ଆଣିପାରିବାରୁ ତାକୁ ଜୀବନରୁ ମାରିଦେବାକୁ ସ୍ୱାମୀଙ୍କ ସମେତ ଶ୍ୱଶୁର ଘର ଲୋକେ ଧମକ ମଧ୍ୟ ଦେଇଥିଲେ ଯାହାକୁ ନେଇ ସୁଜାତା ତାଙ୍କ ପରିବାର ଲୋକଙ୍କୁ କହିଥିଲେ ଏବଂ ଏନେଇ ସେ ଅତ୍ୟନ୍ତ ମାନସିକ ଦୁଶ୍ଚିନ୍ତା ମଧ୍ୟରେ ରହୁଥିଲା । ''
ତେବେ ଖୁବଶୀଘ୍ର ସୁଜାତା ତାଙ୍କ ପରିବାର ଲୋକ ତାଙ୍କ ଶ୍ୱଶୁର ଘରକୁ ଯାଇ ବୁଝାବଣା କରିବାକୁ ମନ ସ୍ଥିର କରିଥିଲେ । ହେଲେ ସେମାନେ ସେଠାକୁ ଯିବା ପୂର୍ବରୁ ଝିଅ ସୁଜାତାକୁ ହତ୍ୟା କରି ଟାଙ୍ଗି ଦେଇଥିବା କହିଛନ୍ତି ମୃତ ମହିଳାଙ୍କ ମାଆ । ଏନେଇ ଝିଅର ପରିବାର ଲୋକେ ଥାନାରେ ହତ୍ୟା ଅଭିଯୋଗ ଅଭିଯୋଗ କରିଛନ୍ତି । ତୁରନ୍ତ ଜ୍ବାଇଁ ଜ୍ଞାନ ରଞ୍ଜନ ଦାଶ ଏବଂ ତାଙ୍କ ପରିବାର ଲୋକଙ୍କୁ ଗିରଫ କରି ଆଜୀବନ ଜେଲ ଦଣ୍ଡ ଦେବା ସହ ଶିକ୍ଷକ ଚାକିରିରୁ ଜ୍ବାଇଁକୁ ନିଲମ୍ବନ କରିବା ପାଇଁ ଦାବୁ କରିଛନ୍ତି ସୁଜାତାଙ୍କ ପରିବାର ଲୋକେ।
ଇଟିଭି ଭାରତ, ଭଦ୍ରକ
