ଭଦ୍ରକ: ରାଜ୍ୟରେ ପ୍ରତିବର୍ଷ ଦେଖା ଦେଇଥିବା ପ୍ରାକୃତିକ ବିପର୍ଯ୍ୟୟରେ ଅକାଳରେ କେତେ ଜୀବନ ଝଡ଼ିଯାଉଛି । ପ୍ରାକୃତିକ ବିପର୍ଯ୍ୟୟରେ ପ୍ରାଣ ହରାଉଥିବା ଲୋକଙ୍କ ପରିବାରଙ୍କୁ ସରକାରଙ୍କ ପକ୍ଷରୁ କ୍ଷତିପୂରଣ ରାଶି ପ୍ରଦାନ କରାଯାଏ । କିନ୍ତୁ ବିଡମ୍ବନାର ବିଷୟ ଯେ ବର୍ଷେ ତଳେ ବଜ୍ରାଘାତରେ ମୃତ୍ୟୁ ହୋଇଥିବା ବ୍ୟକ୍ତି ବିଶେଷଙ୍କୁ ସରକାରୀ ସହାୟତା ଏପର୍ଯ୍ୟନ୍ତ ଦିଆଯାଇନାହିଁ। ଏହି ଘଟଣା ଘଟିଛି ଭଦ୍ରକ ବ୍ଲକ କାଉପୁର ପଞ୍ଚାୟତ ଅନ୍ତର୍ଗତ ଏଡ଼ାଦେଇ ଗ୍ରାମରେ।
ମୃତ ବୟସ୍କା ମଞ୍ଜୁଲତା ନିଜର ପୁଅ, ବୋହୁ, ନାତି, ନାତୁଣୀଙ୍କ ସହ ଖୁସିରେ ସଂସାର କରୁଥିଲେ । ଗତବର୍ଷ ଏପ୍ରିଲ 4ରେ ଶୌଚ ହେବାକୁ ଯାଇଥିବା ବେଳେ ବଜ୍ରାଘାତରେ ତାଙ୍କର ମୃତ୍ୟୁ ହୋଇଥିଲା । ଶବ ବ୍ୟବଚ୍ଛେଦରେ ରିପୋର୍ଟ ଅନୁସାରେ ବଜ୍ରାଘାତରୁ ମଞ୍ଜୁଲତାଙ୍କର ମୃତ୍ୟୁ ଘଟିଛି ବୋଲି ସ୍ପଷ୍ଟ ପ୍ରମାଣ ମିଳିଥିଲା । ହେଲେ ବର୍ଷେ ହୋଇଯିବ ନିଜ ମୃତ ମାଆଙ୍କ ଶବ ବ୍ୟବଚ୍ଛେଦ ରିପୋର୍ଟ ଧରି ପୁଅ ଦେବବ୍ରତ ଏ ଅଫିସ ରୁ ସେ ଅଫିସ ଦୌଡ଼ି ଦୌଡ଼ି ନୟାନ୍ତ ହୋଇଗଲେଣି । ଶୀଘ୍ର ସହାୟତା ରାଶି ପ୍ରଦାନ ପାଇଁ ପରିବାର ଲୋକ ଦାବି କରିଛନ୍ତି । ଅନ୍ୟପଟେ ତଦନ୍ତ ପ୍ରକ୍ରିୟା ଚାଲୁ ରହିଛି ବୋଲି କହିଛନ୍ତି ବିଭାଗୀୟ କର୍ତ୍ତୃପକ୍ଷ ।
ସହାୟତା ରାଶି ପାଇବା ପାଇଁ ରାଜସ୍ବ ନିରୀକ୍ଷକଙ୍କ ଠାରୁ ଆରମ୍ଭ କରି ଜ଼ିଲ୍ଲାପାଳଙ୍କ ପର୍ଯ୍ୟନ୍ତ ସମସ୍ତଙ୍କୁ ନେହୁରା କଲେ ମଧ୍ୟ ସରକାରୀ ବାବୁ ମାନେ କୌଣସି ଚାପର ବଶବର୍ତ୍ତୀ ହୋଇ ସରକାରୀ ଅର୍ଥରାଶିକୁ ଅନୁମୋଦନ କରୁନଥିବା ଅଭିଯୋଗ ହୋଇଛି। ହେଲେ ସରକାରଙ୍କ ତରଫରୁ ପ୍ରାକୃତିକ ବିପର୍ଯୟରେ ମୃତ୍ୟୁ ହେଉଥିବା ବ୍ୟକ୍ତିଙ୍କୁ ସହାୟତା ନେଇ ଉଠିଛି ପ୍ରଶ୍ନ ।
ଭଦ୍ରକରୁ ଦେବାଶିଷ ସାମନ୍ତରାୟ, ଇଟିଭି ଭାରତ
