ଭଦ୍ରକ: ଏକ ଅଗ୍ନିକାଣ୍ଡ ଘଟଣାରେ ପ୍ରମାଣପତ୍ର ପାଇଁ 2000 ଟଙ୍କା ଲାଞ୍ଚ ନେଉଥିବା ବେଳେ ଧରାହେଲେ ଅଗ୍ନିଶମ ଅଧିକାରୀ । ଭଦ୍ରକ ଆସିଷ୍ଟାଣ୍ଟ ଫାୟାର ଅଫିସର ସଂଗ୍ରାମ ହାଁସଦା ଏବଂ ଅନ୍ୟଜଣେ ଅଗ୍ନିଶମ କର୍ମଚାରୀ ବିଭୁ ପ୍ରସାଦ ଜେନାଙ୍କୁ ଗିରଫ କରିଛି ଜିଲ୍ଲା ଭିଜିଲାନ୍ସ ସେଲ ।
ସୂଚନା ଅନୁଯାୟୀ, ଚଳିତ ମାସ 4 ତାରିଖ ଦିନ ଆରଏମସି ନିକଟସ୍ଥ ଚୂନ ଗୋଦାମରେ ନିଆଁ ଲାଗିଥିଲା । ଏଥିରେ ମାଲିକଙ୍କ ବ୍ୟାପକ କ୍ଷତି ହୋଇଥିଲା । ତେବେ ବୀମା ତଥା କ୍ଷତିପୂରଣ ପାଇଁ ଅଗ୍ନିକାଣ୍ଡ ଜନିତ କ୍ଷୟକ୍ଷତି ପ୍ରମାଣପତ୍ର ଲୋଡ଼ା ପଡୁ଼ଥିଲା । ହେଲେ ପ୍ରମାଣପତ୍ର ଦେବାପାଇଁ ଅଗ୍ନିଶମ କର୍ମଚାରୀ 2000 ଟଙ୍କା ଲାଞ୍ଚ ମାଗିଥିଲେ । ତେବେ ଏନେଇ ଜିଲ୍ଲା ଏସପିଙ୍କୁ ଅବଗତ କରାଇଥିଲେ ସଂପୃକ୍ତ ବ୍ୟକ୍ତି । ଏହିକ୍ରମରେ ଚୂନ ଗୋଦାମର କର୍ମଚାରୀ ଅବଦୁଲ ମୋଜୀବଙ୍କ ଠାରୁ ଅଗ୍ନିଶମ କର୍ମଚାରୀ 2000 ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ କବଳରେ ପଡ଼ିଥିଲେ । ଏନେଇ ଭିଜିଲାନ୍ସ ଡିଏସପି ଏସକେ ଦାସ ମହାପାତ୍ର ଗଣମାଧ୍ୟମକୁ ଜଣାଇଛନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
