ଭଦ୍ରକ: ଜିଲ୍ଲା ତିହିଡି ବ୍ଲକ ପାଳିଆବିନ୍ଧା ଆରଆଇ ସର୍କଲ ସାନ୍ତରାପୁର ମୌଜାରେ ଚାଷୀ ଅସନ୍ତୋଷ ଦେଖା ଦେଇଛି । ପ୍ରଶାସନ ପକ୍ଷରୁ 2004 ମସିହାରୁ ପ୍ରଜାମାନଙ୍କୁ ସେମାନଙ୍କ ଜମି ଚକବନ୍ଦୀ ପଟ୍ଟା ମିଳିଥିଲେ ହେଁ ଏଯାଏଁ ଭୂଲେଖ ପୋର୍ଟାଲରେ ଆସୁନଥିବାରୁ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।
ଏଥିପାଇଁ ସରକାରଙ୍କ ସମସ୍ତ ଅନଲାଇନ କାର୍ଯ୍ୟକ୍ରମରେ ବାଧା ସୃଷ୍ଟି ହେଉଛି । ଚାଷୀ ତା'ର ଉତ୍ପାଦନ କରୁଥିବା ଧାନକୁ ସରକାରଙ୍କୁ ବିକ୍ରି କରିଥାଏ । ଏନେଇ ଅନଲାଇନ ଜରିଆରେ ପୂର୍ବରୁ ପଞ୍ଜିକରଣ କରିବାକୁ ପଡେ । ମାତ୍ର ଜମିର ଅନଲାଇନ ପଟ୍ଟା ନଥିବାରୁ ଧାନ ବିକ୍ରି ପାଇଁ ପଞ୍ଜିକରଣ ସମ୍ଭବ ହୋଇ ପାରୁନାହିଁ । ଧାନବିକ୍ରି କରିବା ପାଇଁ ଉଦ୍ଦିଷ୍ଟ ପଞ୍ଜିକରଣ ସମୟ ସୀମା ଅଗଷ୍ଟ 15 ତାରିଖ । ସେପଟେ ଦୁଇ ମାସ ମଧ୍ଯରେ ଅନଲାଇନ ପଟ୍ଟା ହେବ ବୋଲି ତହସିଲ ପ୍ରଶାସନ ପକ୍ଷରୁ ଚାଷୀମାନେ ଜାଣିବାକୁ ପାଇଛନ୍ତି ।
ଅମଳ ଧାନବିକ୍ରି କରିବା ଅବସମ୍ଭାବୀ ହୋଇଥିବାରୁ ଚାଷୀଙ୍କ ଅସନ୍ତୋଷ ଦେଖା ଦେଇଛି । ଏନେଇ ତହସିଲଦାରଙ୍କୁ ଭେଟି ଅଭିଯୋଗ ପ୍ରଦାନ କରାଯାଇଛି । ଏହାର ସମାଧାନ କରାନଗଲେ ଆରଆଇ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଦିଆଯିବ ବୋଲି ଚେତାବନୀ ଦେଇଛନ୍ତି ଚାଷୀ । ତେବେ ଏନେଇ ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ ପାଇନାହିଁ ।
ଭଦ୍ରରୁ ଦେବାଶିଷ ମହାପାତ୍ର, ଇଟିଭି ଭାରତ
