ଭଦ୍ରକ: ଜିଲ୍ଲାରେ ଚାଲିଛି ମଦ ମାଫିଆଙ୍କ ରାଜ୍ । ଖାତିର କରୁନାହାଁନ୍ତି ପୋଲିସ କିମ୍ବା ଅବକାରୀ ବିଭାଗର ଅଫିସରଙ୍କୁ । ବେଆଇନ ମଦ କାରବାର ଉପରେ ଚଢାଉ ବେଳେ ମଦ ମାଫିଆଙ୍କ ଆକ୍ରମଣରେ 7 ଅବକାରୀ କର୍ମଚାରୀ ଆହତ । ଦୁଇ ଆସାମୀ ସହ ମଦକୁ ମଧ୍ୟ ଛଡାଇନେଲେ ମଦ ମାଫିଆ । ସେପଟେ ଆହତ ହୋଇ ଅବକାରୀ କର୍ମଚାରୀମାନେ ମେଡିକାଲରେ ଭର୍ତ୍ତି ହୋଇଛନ୍ତି । ପୁରୁଣାବଜାର ଥାନା ମିର୍ଜାପୁର ଅଞ୍ଚଳରେ ଅବାଧ ମଦ କାରବାର ବଢିଚାଲିଛି । ବାରମ୍ବାର ଅବକାରୀ ବିଭାଗ କିମ୍ବା ପୋଲିସ ଚଢ଼ାଉ କରି ମଦ ଜବତ କରିବା ସହ ଅଭିଯୁକ୍ତମାନଙ୍କୁ ଗିରଫ କରୁଛି ।
ସୋମବାର ମଧ୍ୟ ଭଦ୍ରକ ଅବକାରୀ ବିଭାଗ ମିର୍ଜାପୁର ଅଞ୍ଚଳକୁ ଯାଇ ମଦ ଜବତ କରିବା ସହ ଦୁଇ ଆସାମୀଙ୍କୁ ମଧ୍ୟ ଧରିଥିଲା । ଏଥିରେ ଉତ୍କ୍ଷିପ୍ତ ହୋଇ ମାଫିଆ ମାନେ ଅବକାରୀ ବିଭାଗର କର୍ମଚାରୀ ମାନଙ୍କୁ ମାଡ଼ ମାରି ମଦ ସହ ଅଭିଯୁକ୍ତ ମାନଙ୍କୁ ଖସାଇ ନେଇଥିଲେ ବୋଲି ଜଣାପଡିଛି ।
ଅବକାରୀ ବିଭାଗର କର୍ମଚାରୀଙ୍କୁ ଗାଁରେ ଅଟକାଇଥିଲେ । ପରେ ପୁରୁଣାବଜାର ପୋଲିସ ଘଟଣାସ୍ଥଳରେ ପହଞ୍ଚି ଅବକାରୀ କର୍ମଚାରୀଙ୍କୁ ଉଦ୍ଧାର କରିଛି । ହେଲେ ଏନେଇ ଅବକାରୀ ବିଭାଗ କିମ୍ବା ପୋଲିସ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇନାହିଁ ।
ଭଦ୍ରକରୁ ଦେବେଶିଷ ମବାପାତ୍ର, ଇଟିଭି ଭାରତ
