ଭଦ୍ରକ: ଧାମନଗର ଉପନିର୍ବାଚନ ପ୍ରଚାର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସିଲେ ମଧ୍ଯ ବିଜେଡି ବିଜୟ ଲାଭ କରିବ । ଆଜି ଏହି ଦୃଢୋକ୍ତି ପ୍ରକାଶ କରିଛନ୍ତି ବିଜେଡିର ବରିଷ୍ଠ ନେତା ତଥା ବିଧାୟକ ପ୍ରଫୁଲ୍ଲ ସାମଲ । ଧାମନଗର NACରେ ଅନୁଷ୍ଠିତ ହେବାକୁ ଥିବା ପଦଯାତ୍ରା କିପରି ସଫଳ କରାଯିବ ସେଥିନେଇ ବିଜେଡି ପକ୍ଷରୁ ସ୍ଥାନୀୟ କଲ୍ୟାଣମଣ୍ଡପରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା । ଉପନିର୍ବାଚନ ପୂର୍ବରୁ ଏହି ପଦଯାତ୍ରା ଏକ ନିର୍ବାଚନୀ ପ୍ରଚାର ବୋଲି କୁହାଯାଉଛି ।
ତେବେ ଧାମନଗର ନିର୍ବାଚନ ମଣ୍ଡଳୀର ବିଭିନ୍ନ ଜୋନ୍ରେ ପଦଯାତ୍ରା ଜାରି ରହିଥିବା ବେଳେ ଆସନ୍ତାକାଲି NACରେ ବିଶାଳ ପଦଯାତ୍ରା ଅନୁଷ୍ଠିତ ହେବ । କେଉଁଭଳି ଏହି ପଦଯାତ୍ରା ସଫଳ ହେବ NACରେ ଥିବା ସମସ୍ତ ୱାର୍ଡରୁ ଅଧିକରୁ ଅଧିକ ବିଜେଡି କର୍ମୀମାନେ ଯୋଗଦେବେ ସେଥିନେଇ ଆଲୋଚନା ହୋଇଥିଲା । ଯାହାକି ରାଜ୍ୟ ସରକାରଙ୍କ ବିଭିନ୍ନ ଯୋଜନା ଲୋକମାନଙ୍କ ନିକଟରେ ପହଞ୍ଚାଇବା ଏହି ପଦଯାତ୍ରାର ମୂଳ ଲକ୍ଷ୍ୟ ହୋଇଥିବାରୁ ଆସନ୍ତାକାଲି ବହୁ ମାତ୍ରାରେ କର୍ମୀ ଯୋଗ ଦେବା ପାଇଁ, ଉପ ନିର୍ବାଚନର ଧାମନଗର ନିର୍ବାଚନ ମଣ୍ଡଳୀ ପର୍ଯ୍ୟବେକ୍ଷକ ସରୋଜ ମହାପାତ୍ର କହିଛନ୍ତି ।
ଅନ୍ୟମାନଙ୍କ ମଧ୍ୟରେ ଆଜିର ଏହି ବୈଠକରେ ଯାଜପୁର ପୌରପାଳିକାର ପୂର୍ବତନ ଅଧ୍ୟକ୍ଷ ତଥା ଉପ ନିର୍ବାଚନର ଧାମନଗର ଏନଏସି ପର୍ଯ୍ୟବେକ୍ଷକ ଭାବେ ଦାୟିତ୍ୱରେ ଥିବା ଭବ ପ୍ରସାଦ ଦାଶ, ଧାମନଗରର ପୂର୍ବତନ ବିଧାୟକ ରାଜେନ୍ଦ୍ର ଦାସ , ମୁକ୍ତିକାନ୍ତ ମଣ୍ଡଳ, ବ୍ଲକ ଅଧ୍ୟକ୍ଷ ଅଶୋକ ନାୟକ, ଏନଏସି ଅଧ୍ୟକ୍ଷା ନିବେଦିତା ଜେନା, ଏନଏସି ବିଜେଡି ସଭାପତିଙ୍କ ସହ ଏନଏସିର କାଉନସିଲ ମାନେ ଉପସ୍ଥିତ ଥିଲେ।
ଇଟିଭି ଭାରତ, ଭଦ୍ରକ
