ଭଦ୍ରକ: ଇଦ ଉଲ ଜୁହା ଡ୍ୟୁଟିରେ ଆସି ଜିଲ୍ଲାରେ ଆଖି ବୁଜିଛନ୍ତି ଜଣେ ଡେପୁଟି ସୁବେଦାର । ଡେପୁଟି ସୁବେଦାର ଜଣଙ୍କ IRB 3 ବାଟାଲିଅନର ହୋଇଥିବା ବେଳେ ତାଙ୍କର ଏପରି ଅସ୍ବାଭାବିକ ମୃତ୍ୟୁକୁ ନେଇ ଏବେ ବିଭିନ୍ନ ମହଲରେ ପ୍ରଶ୍ନ ଉଙ୍କି ମାରିଛି । ମୃତକ ଜଣଙ୍କ ଆଠଗଡ଼ ତିଗିରିଆ ଅଞ୍ଚଳର ପ୍ରଭାକର ପରିଡା ବୋଲି ଜଣା ପଡିଛି ।
ସୂଚନା ଅନୁଯାୟୀ ଇଦ ଉଲ ଜୁହା ଡ୍ୟୁଟି ପାଇଁ ସେ ଭଦ୍ରକ ଆସିଥିଲେ । ସେ ଡ୍ୟୁଟି ସମୟରେ ନିଜ ଟିମ ସହ ରହିଥିଲେ । ହେଲେ ହଠାତ୍ ସେ ଛାତିରେ ଯନ୍ତ୍ରଣା ଅନୁଭବ କରିବା ସହ ତାଙ୍କର ବାନ୍ତି ଆରମ୍ଭ ହୋଇଥିଲା । ଏନେଇ ସହକର୍ମୀମାନେ ତାଙ୍କୁ ତୁରନ୍ତ ଭଦ୍ରକ ଜିଲ୍ଲା ମୁଖ୍ୟ ଡାକ୍ତରଖାନାକୁ ଆଣିଥିଲେ । ସେଠାରେ ମେଡ଼ିସିନ ୱାର୍ଡରେ ଚିକିତ୍ସାଧୀନ ଅବସ୍ଥାରେ ତାଙ୍କ ର ମୃତ୍ୟୁ ହୋଇଛି ।
ଭଦ୍ରକ ଏସପି ମେଡିକାଲ ଯାଇ ଡାକ୍ତରଙ୍କ ସହ ଆଲୋଚନା କରିଛନ୍ତି । କେଉଁଭଳି ଭାବେ ତାଙ୍କର ମୃତ୍ୟୁ ହେଲା ତାହା ମୃତଦେହ ବ୍ୟବଚ୍ଛେଦ ରିପୋର୍ଟ ଆସିବା ପରେ ଜଣା ପଡିବ ବୋଲି ସେ ସୂଚନା ଦେଇଛନ୍ତି । ଏଥିସହ ବର୍ତ୍ତମାନ ଡାକ୍ତରୀ ଟିମ ମୃତ୍ୟୁର କାରଣକୁ ନେଇ ତର୍ଜମା ଜାରି ରଖିଥିବା ସେ ସ୍ପଷ୍ଟ କରିଛନ୍ତି । ଆବଶ୍ୟକ ହେଲେ ଅନ୍ୟାନ୍ୟ ପରୀକ୍ଷା ନିରୀକ୍ଷା କରାଯିବ ବୋଲି ସୂଚନା ମିଳିଛି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
