ଭଦ୍ରକ: ଦିଲ୍ଲୀରେ ଠକେଇ, ଭଦ୍ରକରୁ ଗିରଫ । ବିଭିନ୍ନ ନାମୀଦୀମୀ କମ୍ପାନୀ ନାମରେ ଫେକ୍ ଆଇଡି ଖୋଲି ଲକ୍ଷାଧିକ ଟଙ୍କା ଲୁଟିବା ଘଟଣାରେ ଧୂଷୁରୀ ଅଞ୍ଚଳରୁ ଜଣଙ୍କୁ ଗିରଫ କରାଯାଇଛି । ଧୂଷୁରୀ ପୋଲିସ ସହାୟତାରେ ଦିଲ୍ଲୀ ପୋଲିସ ଉକ୍ତ ଅଭିଯୁକ୍ତଙ୍କୁ ଗିରଫ କରିଥିବା ଜଣାପଡିଛି ।
ସୂଚନା ଅନୁଯାୟୀ, ଯାଜପୁର ଜିଲ୍ଲା ବରୀ ଅଞ୍ଚଳର ରାଜେନ୍ଦ୍ର ମଲ୍ଲିକ ନାମକ ଜଣେ ବ୍ୟକ୍ତି ବିଭିନ୍ନ ନାମୀଦାମୀ କମ୍ପାନୀ ନାମରେ ଫେକ୍ ଆଇଡି ଖୋଲିଥିଲେ । ଏହି ଆଇଡି ମାଧ୍ୟ୍ୟମରେ ସେ ଫ୍ଲାଇଟ୍ ଟିକେଟ୍ ବୁକିଂ କରିବା ସହ ବଡ ବଡ କମ୍ପାନୀରେ ଚାକିରି ବାହାରିଛି କହି ଆଗ୍ରହୀ ପ୍ରାର୍ଥୀଙ୍କ ଠାରୁ ଲକ୍ଷ ଲକ୍ଷ ଟଙ୍କା ଲୁଟୁଥିଲେ । ଏନେଇ ଜାଣିବା ପରେ ଦିଲ୍ଲୀ ପୋଲିସ ରାଜେନ୍ଦ୍ରଙ୍କୁ ଖୋଜାଖୋଜି କରୁଥିଲା ।
ତେବେ ଶୁକ୍ରବାର ରାଜେନ୍ଦ୍ର ତାଙ୍କ ଶ୍ବଶୁର ଘର ଭଦ୍ରକ ଜିଲ୍ଲା ଧୂଷୁରୀରେ ଥିବା ନେଇ ଦିଲ୍ଲୀ ପୋଲିସ ଜାଣିବାକୁ ପାଇଥିଲା । ପରେ ଧୂଷୁରୀ ପୋଲିସ ସହାୟତାରେ ଦିଲ୍ଲୀ ପୋଲିସ ରାଜେନ୍ଦ୍ରଙ୍କୁ ଗିରଫ କରିଛି । ଏଥିସହ ଧୂଷୁରୀ ଥାନାରେ ରାଜେନ୍ଦ୍ରଙ୍କୁ ଜେରା କରାଯାଉଥିବା ଜଣାପଡିଛି । ଅନ୍ୟପଟେ ମାମଲାକୁ ନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
