ଭଦ୍ରକ: ପୀରହାଟ ଥାନା ଅଞ୍ଚଳରେ ବୃଦ୍ଧଙ୍କୁ ଅପହରଣ କରି ହତ୍ୟା ଘଟଣାରେ ଗିରଫ ଅଭିଯୁକ୍ତକୁ ୫ ଦିନ ପାଇଁ ରିମାଣ୍ଡ ଆବେଦନ କଲା ପୋଲିସ । କ୍ରାଇମ ସିନ୍ ରିକ୍ରିଏସନ୍ କରିବା ପରେ ମାଜିଷ୍ଟ୍ରେଟ୍ଙ୍କ ନିକଟରେ ହାଜର ଅଭିଯୁକ୍ତକୁ ହାଜର କରାଯାଇଛି । ଦେଇଥିବା ବୟାନରେ ସେ ଏକୁଟିଆ ବୃଦ୍ଧଙ୍କ ବେକରେ ସୁତୁଲୀ ଲଗାଇ ହତ୍ୟା କରିଥିବା ସ୍ବୀକାର କରିଥିଲା । ତେବେ ଏହି ହତ୍ୟାକାଣ୍ଡରେ ଏକାଧିକ ବ୍ୟକ୍ତି ସାମିଲ ଥିବା ମୃତକଙ୍କ ପରିବାର ପକ୍ଷରୁ ଅଭିଯୋଗ ହୋଇଛି ।
ସୂଚନା ଅନୁସାରେ ମେ ୨୮ ତାରିଖରେ ଉପରଦୁମୁକାର ଗାଁରୁ ଧରଣୀଧର କୁଅଁରଙ୍କୁ ଧୁଷୁରୀ ଥାନାଧିନ ଭଣ୍ଡାରୀପଡା ଗାଁର ଶୁଭେନ୍ଦୁ ପଣ୍ଡା ନାମକ ଯୁବକ କୋଲକାତାରେ ଥିବା ଦୋକାନ ଘର ଭଡା ଟଙ୍କା ଦେବ କହି ଡାକି ନେଇଥିଲା । ପରେ ସେ ଘରକୁ ନଫେରିବାରୁ ପରିବାର ଲୋକେ ଶୁଭେନ୍ଦୁକୁ ପଚାରିଥିଲେ । କୌଣସି ସନ୍ତୋଷ ଜନକ ଉତ୍ତର ନପାଇବାରୁ ପରଦିନ ଧୁଷୁରୀ ଥାନାରେ ବୃଦ୍ଧ ଅପହରଣ ହୋଇଥିବା ନେଇ ତାଙ୍କ ପୁଅ ପ୍ରଦୀପ କୁଅଁର ଏତଲା ଦେଇଥିଲେ । ପରେ ଜୁନ ୨ ତାରିଖରେ ଧରଣୀଧରଙ୍କର ଗଳିତ ମୃତଦେହ ଧୁଷୁରୀ ଥାନା କୁଚିଳା ନଦୀ ପଙ୍ଗଟା ନିକଟରୁ ଉଦ୍ଧାର ହୋଇଥିଲା । ବହୁ ଖୋଜାଖୋଜି ପରେ ତାମିଲନାଡୁର କନକପାଲାୟନ ତିରୁପୁରମରୁ ଅଭିଯୁକ୍ତ ଶୁଭେନ୍ଦୁକୁ ବାନ୍ଧିଥିଲା ପୋଲିସ । ତେବେ ବୃଦ୍ଧଙ୍କ କୋଲକାତାରେ ଥିବା ଦୋକାନ ଗୃହ ବିକ୍ରିକୁ ନେଇ ବିବାଦ ଉପୁଜିଥିବାରୁ ଅଭିଯୁକ୍ତ ହତ୍ୟା କରିଥିବା ସ୍ବୀକାର କରିଛି ।
ଭଡା ଦେବ କହି ଘରୁ ଡାକିନେଇ ଆରଡି ସ୍ଥିତ ସାହୁସାହି ନିକଟସ୍ଥ ନଦୀ କୂଳକୁ ନେଇଥିଲା । ସେଠାରେ ସେ ମଳତ୍ୟାଗ କରିବ ବୋଲି କହି କିଛି ସମୟରେ ପରେ ପଛପଟୁ ଯାଇ ଟେଣ୍ଟ ବନ୍ଧା ସୁତୁଲୀରେ ବେକରେ ଚାପି ହତ୍ୟା କରିଥିଲା । ପରେ ପ୍ରମାଣ ନଷ୍ଟ କରିବା ଲାଗି ମୃତଦେହକୁ ଏକ ବସ୍ତାରେ ବାନ୍ଧି ନଦୀକୁ ଫିଙ୍ଗି ଦେଇଥିବା କ୍ରାଇମ୍ ସିନ୍ ରିକ୍ରିଏସନରେ ଉପସ୍ଥାପନ କରିଛି । ଏଥିସହ ସାଇଣ୍ଟିଫିକ୍ ଟିମ୍ ମଧ୍ୟ ହତ୍ୟାରେ ବ୍ୟବହୃତ ସାମଗ୍ରୀ ଜବତ୍ କରି ତଦନ୍ତ ଚଳାଇଛି । ହେଲେ ଅଭିଯୁକ୍ତ ଦେଇଥିବା ବୟାନରେ ସେ ଏକୁଟିଆ ବେକରେ ସୁତୁଲୀ ଲଗାଇ ବୃଦ୍ଧଙ୍କ ତଣ୍ଟି ଚିପି ହତ୍ୟା କରିବା ଘଟଣାକୁ ପୋଲିସ ସହଜରେ ଗ୍ରହଣ କରିପାରିନି । ତେବେ ଏନେଇ ଅଧିକ ତଦନ୍ତ ପାଇଁ ୫ ଦିନିଆ ରିମାଣ୍ଡ ଆବେଦନ କରାଯାଇଥିବା ଚାନ୍ଦବାଲି ଏସଡିପିଓ ଦେବୀଶଙ୍କର ପ୍ରତାପ ସୂଚନା ଦେଇଛନ୍ତି ।
ଇଟିଭି ଭାରତ, ଭଦ୍ରକ
