କେନ୍ଦ୍ରର ବୈମାତୃକ ଭାବ ଅଭିଯୋଗ, ଜିଲ୍ଲାପାଳଙ୍କ ଅଫିସ ସମ୍ମୁଖରେ BJDର ଧାରଣା

ଭଦ୍ରକ ଜିଲ୍ଲାରେ ଦେଖିବାକୁ ମିଳିଛି ଆରୋପ ପ୍ରତ୍ୟାରୋପ ରାଜନୀତି । ବୁଧବାର ବିଜେପିର ଆନ୍ଦୋଳନ ପରେ ଆଜି ବିଭିନ୍ନ ଦାବି ନେଇ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିଜେଡି ବିକ୍ଷୋଭ ପ୍ରଦର୍ଶନ କରିଛି । ଅଧିକ ପଢନ୍ତୁ

ଭଦ୍ରକ: ଶାସକ ଦଳ ବିଜେଡି ପକ୍ଷରୁ ଆଜି (ଗୁରୁବାର) ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଛି । କେନ୍ଦ୍ର ସରକାର ଓଡ଼ିଶା ରାଜ୍ୟ ପ୍ରତି ବୈମାତୃକ ମନୋଭାବ ପୋଷଣ କରୁଥିବା ଦଳ ଅଭିଯୋଗ କରିଛି । ଗତକାଲି ବିଜେପି ଓ ବିଜେଡି ପକ୍ଷରୁ ଧାରଣା ଓ ପ୍ରତିବାଦ କରାଯିବା ପରେ ଜିଲ୍ଲାର ରାଜନୀତି ମାହୋଲ ସରଗରମ ହୋଇଛି । ଫଳରେ ଉଭୟ ଦଳ ମଧ୍ୟରେ ଆରୋପ ପ୍ରତ୍ୟୋରାପ ରାଜନୀତି ଦେଖିବାକୁ ମିଳିଛି ।

ବିଜେଡିର ଅଭିଯୋଗ ଅନୁଯାୟୀ କେନ୍ଦ୍ର ସରକାର ରାଜ୍ୟର ଗରିବମାନଙ୍କ ପ୍ରାପ୍ୟ ଚାଉଳ ପରିମାଣ ବୃଦ୍ଧି କରିବା ପରିବର୍ତ୍ତେ ୫ କିଲୋ କାଟି ଦେଇ, ଗରିବ ଲୋକଙ୍କ ପେଟକୁ ଲାତ ମାରିଛନ୍ତି । ତେଣୁ କେନ୍ଦ୍ରର ବିଜେପି ସରକାର ଗରିବ ବିରୋଧୀ ସରକାର ବୋଲି କହିଛନ୍ତି ଦଳର ବିଭିନ୍ନ ଛାମୁଆ ନେତାମାନେ । ଏଥିସହ ଭଦ୍ରକ ଜିଲ୍ଲା ପ୍ରତି ମଧ୍ୟ କେନ୍ଦ୍ର ସରକାର ପାତର ଅନ୍ତର ନୀତି ଅବଲମ୍ବନ କରୁଛନ୍ତି ବୋଲି କହିଛନ୍ତି ଭଦ୍ରକ ବିଧାୟକ ସଞ୍ଜୀବ କୁମାର ମଲ୍ଲିକ । ଯାହାକି ଦୀର୍ଘଦିନ ଧରି ଭଦ୍ରକରୁ ଭୁବନେଶ୍ବର ଯାଉଥିବା ପାସେଞ୍ଜର ଟ୍ରେନକୁ ବାଲେଶ୍ବରରୁ ଭୁବନେଶ୍ବର ପର୍ଯ୍ୟନ୍ତ ଚଳାଚଳ କରାଯାଉଛି । ଏହା ଜିଲ୍ଲାବାସୀଙ୍କ ପ୍ରତି ଘୋର ଅନ୍ୟାୟ ବୋଲି ଅଭିଯୋଗ କରି ପୂର୍ବରୁ ଆନ୍ଦୋଳନ ମଧ୍ୟ ହୋଇଥିଲା ।