ଭଦ୍ରକ: ସୁନ୍ଦରଗଡର ମାମଲାକୁ ନେଇ ଭଦ୍ରକରେ ଧାରଣା । ଜିଲ୍ଲାରେ ଗାଁ ସାଥୀ ପରିବାର ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଛି । ସୁନ୍ଦରଗଡ ହତ୍ୟାକାଣ୍ଡ ମାମଲାରେ ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ ଦାବି କରି ଏହି ଧାରଣା ଦେଇଛି ଗାଁ ସାଥୀ ପରିବାର ।
ସୂଚନା ଅନୁଯାୟୀ ସୁନ୍ଦରଗଡ ଜିଲ୍ଲାର ଜଣେ ଗାଁ ସାଥୀଙ୍କୁ ଅତି ବିଭତ୍ସ ଭାବେ ହତ୍ୟା କରାଯିବା ଘଟଣାକୁ କଡା ନିନ୍ଦା କରିଛି ଭଦ୍ରକ ଗାଁ ସାଥୀ ପରିବାର । ମାମଲାରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ସହ ମୃତକଙ୍କ ପରିବାରକୁ ଆର୍ଥିକ ସହାୟତା ଯୋଗାଇଦେବାକୁ ଦାବି କରିଛି ସାଥୀ ପରିବାର । ଏଥିସହ ମାମଲାରେ ମୁଖ୍ୟମନ୍ତ୍ରୀଙ୍କ ପ୍ରତ୍ୟେକ୍ଷ ହସ୍ତକ୍ଷେପ ଦାବି କରି ଭଦ୍ରକ ଗାଁ ସାଥୀ ପରିବାର ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଛି।
ସେହିପରି ଭଦ୍ରକ ଜିଲ୍ଲାର ବିଡିଓମାନେ ମଧ୍ୟ ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶ ମାନୁନାହାନ୍ତି ଯେଉଁଥି ପାଇଁ ଗାଁ ସାଥୀମାନେ ବହୁ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛି ପରିବାର । ଏଥିସହ ରାଜ୍ୟରେ ସ୍ଥାୟୀ ନିଯୁକ୍ତି ଦାବି କରିଛି ସାଥୀ ପରିବାର । ତେବେ ସରକାରୀ ନିର୍ଦ୍ଦେଶକୁ ଅବମାନନା କରୁଥିବାରୁ ଆଜି(ମଙ୍ଗଳବାର) ଜିଲ୍ଲାର ସମସ୍ତ ଗାଁ ସାଥୀମାନେ ଭଦ୍ରକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣା ଦେଇଥିଲେ । ତେବେ ଜିଲ୍ଲା ପ୍ରଶାସନ ଆଗାମୀ ଦିନରେ ଗାଁ ସାଥୀଙ୍କୁ ସୁରକ୍ଷା ସହ ସେମାନଙ୍କ ଦାବି ପୂରଣ ପାଇଁ ପ୍ରତିଶ୍ରୁତି ଦେଇଥିବା ଜଣାପଡିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
