ଭଦ୍ରକ: ଭଦ୍ରକ ଆଖୁଆପଦା ଠାରେ କମୁଛି ବୈତରଣୀ ନଦୀର ଜଳସ୍ତର । ହେଲେ ଏବେବି ଦୁର୍ଦ୍ଦଶା ମଧ୍ୟରେ ଧାମନଗର ବ୍ଳକବାସୀ। ଆଖୁଆପଦା ଠାରେ ବିପଦ ସଙ୍କେତ 17.83 ମିଟର ଥିବା ବେଳେ ଆଜି ( ଶୁକ୍ରବାର) ଅପରାହ୍ନ 3 ଟା ସୁଦ୍ଧା ଏହା 19.23 ମିଟର ରହିଛି । ଧାମନଗର ବ୍ଳକରେ ଥିବା ଦୋବଲ, ପଧାନୀ, ଆନନ୍ଦପୁର, ଖଡିପଦା ଓ ଦଳାଙ୍ଗ ପଞ୍ଚାୟତର 20 ଟି ଗ୍ରାମ ଏବେବି ଜଳମଗ୍ନ ହୋଇରହିଛି। ଏହି ଅଞ୍ଚଳ ସବୁ ଜଳବନ୍ଦୀ ଅବସ୍ଥାରେ ଥିବାରୁ ବାହ୍ୟଜଗତରୁ ସମ୍ପୂର୍ଣ୍ଣ ବିଛିନ୍ନ ହୋଇଯାଇଛି।
ଅନ୍ୟପଟେ ଗେଙ୍ଗୁଟି ନଦୀ ଉପରେ ଦୋବଲ ନିକଟରେ ଥିବା ପୋଲ ଉପରେ 4 ଫୁଟ ପାଣି ଚାଲିଛି। ଏଥିଯୋଗୁଁ ଭଦ୍ରକରୁ ଧାମନଗର ଦେଇ ଯାଜପୁର ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇଯାଇଛି। ଭଦ୍ରକ-ଆଖଣ୍ଡଳମଣି ରାସ୍ତାର କୋଠାର ଛକ ପାଖରେ ରାସ୍ତା ଉପରେ 3 ଫୁଟର ବନ୍ୟା ଜଳ ପ୍ରଭାବିତ ହେଉଥିବାରୁ ଭଦ୍ରକ-ଆଖଣ୍ଡଳମଣି ଯୋଗାଯୋଗ ମଧ୍ଯ ବିଛିନ୍ନ ହୋଇଛି।
ଯେଉଁମାନେ ବନ୍ୟାଜଳରେ ଫସି ରହିଛନ୍ତି, ସେମାନଙ୍କୁ ପ୍ରଶାସନ ପକ୍ଷରୁ ଉଦ୍ଧାର କରାଯାଉଛି। ବନ୍ୟା ପ୍ରପୀଡିତ ଅଞ୍ଚଳକୁ ବିଦ୍ୟୁତ ଯୋଗାଣ ସମ୍ପୂର୍ଣ୍ଣ ଭାବେ ଠପ ହୋଇଯାଇଛି। ମୋଟାମୋଟି ଧାମନଗର ବ୍ଳକର ଏହିସବୁ ବନ୍ୟା ପ୍ଳାବିତ ଅଞ୍ଚଳରେ ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
