ଭଦ୍ରକ: ସାମୁଦ୍ରିକ ବାତ୍ୟା 'ବୁଲବୁଲ' ପାଇଁ ପ୍ରଭାବିତ ହେଲା ମାଛଧରା ବୋଟ । ପଶ୍ଚିମବଙ୍ଗର 50ଟି ମାଛଧରା ବୋଟ ଲାଗିଲା ଧାମରାରେ ।
ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ସେମାନଙ୍କୁ ଧାମରା ବନ୍ଦର ମୁହାଣକୁ ଅଣାଯାଇଛି । ଜିଲ୍ଲା ପ୍ରଶାସନ ପକ୍ଷରୁ ସେମାନଙ୍କ ପାଇଁ ରହିବା, ଖାଇବା ବ୍ୟବସ୍ଥା କରାଯାଇଥିବା ସୂଚନା ଦେଇଛନ୍ତି ଭଦ୍ରକ ଜିଲ୍ଲା ଅତିରିକ୍ତ ଜିଲ୍ଲାପାଳ। ତେବେ 50ଟି ବୋଟ ମଧ୍ୟରୁ ଅଦ୍ୟାବଧି 37ଟି ବୋଟ ଧାମରା ବନ୍ଦର ମୁହାଣରେ ପହଞ୍ଚିଛନ୍ତି ।
ଏଠାରେ ସୂଚନାଯୋଗ୍ୟ, ସୁନ୍ଦରବନରେ ଲ୍ୟାଣ୍ଡଫଲ କରିପାରେ ବାତ୍ୟା 'ବୁଲବୁଲ'। ପଶ୍ଚିମବଙ୍ଗ-ବାଂଲାଦେଶ ମଧ୍ୟ ଦେଇ ଗତି କରିବା ନେଇ ଭାରତୀୟ ପାଣିପାଗ ବିଭାଗ (ଆଇଏମଡି) ପକ୍ଷରୁ ସୂଚନା ଦିଆଯାଇଛି । ଏଥିସହ ଘଣ୍ଟା ପ୍ରତି 12 କିମି ବେଗରେ ଉତ୍ତର- ଉତ୍ତର ପଶ୍ଚିମ ଦିଗକୁ ଅଗ୍ରସର ହେଉଛି ଏହି ସାମୁଦ୍ରିକ ଝଡ । ଏହାର ପ୍ରଭାବରେ ବର୍ତ୍ତମାନ ଓଡ଼ିଶା ଉପକୂଳରେ 35-45 କିମି ବେଗରେ ପବନ ବହିବା ସହିତ ବର୍ଷା ଆରମ୍ଭ ହୋଇଗଲାଣି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
