ଭଦ୍ରକ:ସ୍ଥାନୀୟ ବନ୍ତ ଓ ଭଣ୍ଡାରିପୋଖରୀ ପୋଲିସ କବଜାରେ ଲୁଟେରା ଗ୍ୟାଙ୍ଗ । ରବିବାର ବନ୍ତ ଥାନା ଅନ୍ତର୍ଗତ ଆପଣ୍ଡା ଗ୍ରାମର ସୁବାସ ଚନ୍ଦ୍ର ମିଶ୍ର ନାମକ ବ୍ୟକ୍ତି ହାଟଡିହି କେସିସି ବ୍ୟାଙ୍କରେ ଟଙ୍କା ଡିପୋଜିଟ କରିବାକୁ ଯାଇଥିଲେ । ସେଠାରେ ପୂର୍ବରୁ ଲୁଟ ଉଦ୍ଦେଶ୍ୟରେ ଥିବା 4 ଜଣ ଲୁଟେରା ତାଙ୍କ ହାତରୁ ଟଙ୍କା ବ୍ୟାଗ ଝାମ୍ପି ନେଇ ଦୁଇଟି ପଲସରରେ ବନ୍ତ ଦିଗକୁ ଫେରାର ହୋଇ ଯାଇଥିଲେ। କିଛି ସ୍ଥାନୀୟ ବ୍ୟକ୍ତି ସେମାନଙ୍କୁ ଧରିବା ପାଇଁ ପିଛା କରି ମଧ୍ୟ ବିଫଳ ହୋଇଥିବା ଜଣା ପଡିଛି ।
ଏନେଇ ଖବର ପାଇ ବନ୍ତ ପୋଲିସ ସେମାନଙ୍କୁ ପିଛା କରି ବନ୍ତ ଅଞ୍ଚଳର ପଦାକଣା ଗ୍ରାମ ଭିତରୁ ଦୁଇ ଲୁଟେରାଙ୍କୁ କାବୁ କରିଥିଲା । ସେପଟେ ଅନ୍ୟ ଦୁଇ ଜଣ ଭଣ୍ଡାରିପୋଖରୀ ଅଞ୍ଚଳକୁ ପଳାଇ ଯାଇଥିବା ନେଇ ସୂଚନା ପାଇ ବନ୍ତ ପୋଲିସ ଭଣ୍ଡାରିପୋଖରୀ ଥାନାକୁ ଅବଗତ କରାଇଥିଲେ । ପରେ ଭଣ୍ଡାରିପୋଖରୀ ପୋଲିସ ଅନ୍ୟ ଦୁଇ ଜଣଙ୍କ ପିଛା କରି ସୋଲପରା ଗ୍ରାମ ନିକଟରେ ସ୍ଥାନୀୟ ଗ୍ରାମବାସୀମାନଙ୍କ ଦ୍ବାରା ସନ୍ଦିଗ୍ଧ ଅବସ୍ଥାରେ ଅଟକ ଥିବା ସେହି ଦୁଇ ଜଣ ଲୁଟେରାଙ୍କୁ କାବୁ କରିଥିଲା । ପରେ ପୋଲିସ ସମ୍ପୃକ୍ତ ଲୁଟେରାଙ୍କୁ ଗାଡି ସହିତ ବନ୍ତ ଥାନାରେ ଜିମା ଦେଇଥିଲା ।
ତେବେ ବନ୍ତ ପୋଲିସ ଏହି ଚାରି ଲୁଟେରାଙ୍କ ନିକଟରୁ ଲୁଟ ହୋଇଥିବା 72500 ଟଙ୍କାରୁ 24400 ଟଙ୍କା ଉଦ୍ଧାର କରିଥିବା ସୂଚନା ମିଳିଛି । ଏଥିସହ ସେମାନଙ୍କ ଦ୍ବାରା ବ୍ୟବହୃତ ପଲସର ବାଇକ ମଧ୍ୟ ଜବତ ହୋଇଛି । ଏହି ଚାରି ଜଣ ଲୁଟେରାଙ୍କ ମଧ୍ୟରୁ ତିନି ଜଣଙ୍କ ଘର ଆସ୍କା ଅଞ୍ଚଳରେ ହୋଇଥିବା ବେଳେ ଜଣଙ୍କ ଘର କୋଦଳା ଅଞ୍ଚଳରେ ବୋଲି ଜଣାପଡିଛି । ଏହି ଲୁଟ ଘଟଣା ବ୍ୟତୀତ ଅନ୍ୟ ଅପରାଧିକ ମାମଲାରେ ଏମାନଙ୍କ ସମ୍ପୃକ୍ତି ଥିବା ନେଇ ମଧ୍ୟ ଜଣା ପଡିଛି।
ଏନେଇ ଅଧିକ ତଦନ୍ତ କରାଯିବା ସହ ସୋମବାର ଏମାନେଙ୍କୁ କୋର୍ଟ ଚାଲାଣ କରାଯିବ ବୋଲି ବନ୍ତ ଥାନା ସୂତ୍ରରୁ ଜଣାପଡିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
