ବରଗଡ଼: ଚଳିତ ବର୍ଷ ବରଗଡର ବିଶ୍ଵପ୍ରସିଦ୍ଧ ଧନୁଯାତ୍ରା ପାଇଁ ଚୟନ ହେବେ କଂସ ମହାରାଜ । ବିଶ୍ବ ପ୍ରସିଦ୍ଧ ଐତିହାସିକ ବରଗଡ ଧନୁଯାତ୍ରା ମହୋତ୍ସବ ପାଇଁ କଂସ ଭୂମିକା ସହ ଅନ୍ୟାନ୍ୟ କଳାକାରଙ୍କ ଚୟନ ହେବା ନେଇ ବରଗଡ ଜିଲ୍ଲାପାଳଙ୍କ ସମ୍ବିଳନୀ କକ୍ଷରେ ଧନୁଯାତ୍ରା କୋର୍ କମିଟିର ଏକ ଜରୁରୀ ବୈଠକ ଅନୁଷ୍ଠିତ ହୋଇଛି । ଯେଉଁଥିରେ ଭୋଟ ମାଧ୍ୟମରେ କଳାକାର ଚୟନ ପାଇଁ ନିଷ୍ପତ୍ତି ହୋଇଛି ।
କୋର୍ କମିଟିର 19 ଜଣ ସଦସ୍ୟ ମଧ୍ୟରୁ 14 ଜଣ ସଦସ୍ୟ ନୂତନ କଳାକାର ଚୟନ ସପକ୍ଷରେ ଭୋଟ ଦେଇଥିବାବେଳେ ମାତ୍ର 5 ଜଣ ସଦସ୍ୟ ଏହାର ବିପକ୍ଷରେ ରହିଥିଲେ । ତେବେ କଳାକାର ଚୟନ ପାଇଁ ଅଧିକ ଭୋଟ ଆସିଥିବାରୁ 2022-23 ଧନୁଯାତ୍ରାରେ ପୁଣି କଂସ ଭୂମିକା ସହିତ ଅନ୍ୟାନ୍ୟ ସମସ୍ତ କଳାକାର ପାଇଁ ଚୟନ ପ୍ରକ୍ରିୟା କରାଯିବ ବୋଲି ବୈଠକରେ ନିଷ୍ପତ୍ତି ହୋଇଛି । ଏନେଇ ଜିଲ୍ଲାପାଳ କହିଛନ୍ତି, "ଆସନ୍ତା ଡିସେମ୍ବର ୨୭ ତାରିଖରୁ ଜାନୁୟାରୀ ୬ ତାରିଖ ପର୍ଯ୍ୟନ୍ତ ବିଶ୍ବ ପ୍ରସିଦ୍ଧ ବରଗଡ ଧନୁଯାତ୍ରା ମହୋତ୍ସବ ହେବାକୁ ଥିବାବେଳେ କଂସ ଭୂମିକା ପାଇଁ ଆସନ୍ତା ୨୨ ତାରିଖରୁ ୩୦ ତାରିଖ ପର୍ଯ୍ୟନ୍ତ କଳାକାରମାନେ ADMଙ୍କ କାର୍ଯ୍ୟାଳୟରେ ଆବେଦନ କରି ପାରିବେ । ନଭେମ୍ବର ୧୦ ତାରିଖରେ କଂସ ଭୂମିକା ପାଇଁ ଚୟନ ପ୍ରକ୍ରିୟା ହେବ ।"
ଏହା ମଧ୍ୟ ପଢ଼ନ୍ତୁ: ବରଗଡ ଧନୁଯାତ୍ରାରେ କଂସ ଭୂମିକାରେ ଅଭିନୟ କରିଥିବା ଅଭିନେତାଙ୍କ ଦେହାନ୍ତ
ବରଗଡ ଧନୁଯାତ୍ରା ମହୋତ୍ସବ ସମିତିର କାର୍ଯ୍ୟକାରିଣୀ ବୈଠକରେ ଏହି ନିଷ୍ପତ୍ତି ହୋଇଥିବା ନେଇ ବରଗଡ ଧନୁଯାତ୍ରା ମହୋତ୍ସବ ସମିତିର ସଭାପତି ତଥା ଜିଲ୍ଲାପାଳ ମନୀଷା ବାନାର୍ଜୀଙ୍କ ସୂଚନା ଦେଇଛନ୍ତି । ଜିଲ୍ଲାପାଳ ମନୀଷା ବାନାର୍ଜୀଙ୍କ ଅଧ୍ୟକ୍ଷତାରେ କାର୍ଯ୍ୟକାରୀ କମିଟିର ବୈଠକ ହୋଇଥିବାବେଳେ ବୈଠକରେ ସାଂସଦ ସୁରେଶ ପୂଜାରୀ, ବିଧାୟକ ଦେବେଶ ଆଚାର୍ଯ୍ୟ, SP, ଅତିରିକ୍ତ ଜିଲ୍ଲାପାଳଙ୍କ ସମେତ ଅନ୍ୟ ଅଧିକାରୀ ଏବଂ କାର୍ଯ୍ୟକାରୀ କମିଟିର ସଦସ୍ୟମାନେ ଉପସ୍ଥିତ ଥିଲେ ।
ଇଟିଭି ଭାରତ, ବରଗଡ଼
