ବରଗଡ: ଚଳିତ ମାସ 18 ତାରିଖରେ ହେବାକୁ ଯାଉଛି 2019 ନିର୍ବାଚନର ଦ୍ବିତୀୟ ପର୍ଯ୍ୟାୟ ମତଦାନ । ଏହି ଦିନ 5 ଲୋକସଭା ଏବଂ ଏହା ଅଧିନସ 35ଟି ବିଧାନସଭା ଆସନ ପାଇଁ ହେବେ ଭୋଟଗ୍ରହଣ । ଯାହା ମଧ୍ୟରେ ରହିଛି ବରଗଡ ଲୋକସଭା ଆସନ ଅଧିନରେ ଥିବା ବିଜେପୁର ବିଧାନସଭା । ଏହି ଆସନ ଉପରେ ରହିଛି ସମଗ୍ର ରାଜ୍ୟର ନଜର | ଏଠାରୁ କିଏ ମାରିବା ବାଜି ତାକୁ ନେଇ ଆରମ୍ଭ ହୋଇଗଲାଣି ଅଙ୍କକଷା ।
ଏଠାରୁ ବିଧାୟକ ପ୍ରାର୍ଥୀ ଭାବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ, କଂଗ୍ରେସରୁ ବରପାଲିର ପୂର୍ବତନ ବିଧାୟକ ରିପୁନାଥ ସେଠ ଏବଂ ବିଜେପିରୁ ଗଉନ୍ତିଆ ପରିବାରର ସନଥ ଗଡ଼ତିଆ ନିର୍ବାଚନ ମୈଦନାକୁ ଓହ୍ଲାଇଛନ୍ତି| ଉଭୟ କଂଗ୍ରେସ ଓ ବିଜେପି ପ୍ରାର୍ଥୀ ଗାଁ ଗାଁ ବୁଲି ପ୍ରଚାର କରୁଛନ୍ତି। ସେହିପରି ବିଜେଡି ପ୍ରାର୍ଥୀଙ୍କ ପାଇଁ ଦଳର ହେଭିୱେଟ ନେତା ସୁଶାନ୍ତ ସିଂ ଓ ପ୍ରସନ୍ନ ଆଚାର୍ଯ୍ୟଙ୍କ ସହ ବିଜେପୁର ବିଧାୟିକା ରୀତା ସାହୁ ପ୍ରଚାର କରୁଛନ୍ତି । ଖୋଦ୍ ନିଜେ ଦଳୀୟ ସୁପ୍ରିମୋ ନବୀନ ପଟ୍ଟନାୟକ ପ୍ରଚାର ପାଇଁ ଦୁଇ ଦିନିଆ ବରଗଡ ଗସ୍ତରେ ଆସିଛନ୍ତି|
ବରଗଡ ଜିଲ୍ଲାରେ ରହିଛି ମୋଟ 5ଟି ବିଧାନସଭା । ଏଥର ବିଜେପୁର ଆସନର ଗୁରୁତ୍ଵ ଢେର ବେଶୀ । ବିଜେପୁର ଗାଇସିଲେଟ ଓ ବରପାଲି ବ୍ଲକର ୧୭ଟି ପଞ୍ଚାୟତ ସହ ବରପାଲି ଏବଂ ବିଜେପୁର ବିଜ୍ଞାପିତ ଅଞ୍ଚଳ ପରିଷଦକୁ ନେଇ ଗଠିତ ଏହି ନିର୍ବାଚନ ମଣ୍ଡଳୀ । ଏହାର ମୋଟ ଭୋଟର ହେଉଛନ୍ତି ୨୦୭୦୫୫ । ୧୯୫୭ ମସିହାରେ ଗଠିତ ହୋଇଥିବା ଏହି ବିଧାନସଭା ଆସନରୁ ପ୍ରଥମ ବିଧାୟକ ଭାବେ ନିର୍ବାଚିତ ହୋଇଥିଲେ ନିକୁଞ୍ଜ ବିହାରୀ ସେଠ | ହେଲେ ୨୦୦୪ ମସିହା ପରଠାରୁ ପୂର୍ବତନ ବିଧାୟକ ସୁବଳ ସାହୁ ନିର୍ବାଚିତ ହେବା ପରେ ଏହା କଂଗ୍ରେସର ଗଡ ଭାବେ ରାଜ୍ୟ ରାଜନୀତିରେ ପରିଚିତ ହୋଇଥିଲା |
ହେଲେ ସୁବଳ ସାହୁଙ୍କ ଅକାଳ ବିୟୋଗ ପରେ ବିଜେପୁରରେ ହୋଇଥିଲା ଉପନିର୍ବାଚନ । ଏଠାରୁ ତାଙ୍କ ସ୍ତ୍ରୀ ରୀତା ସାହୁ ବିଜେଡି ଦଳରେ ଯୋଗଦାନ କରି ଦଳୀୟ ପ୍ରାର୍ଥୀ ଭାବେ ନିର୍ବାଚନ ଲଢି ବିଜୟୀ ହୋଇଥିଲେ । ବିଜେଡି ପ୍ରାର୍ଥିନୀ ରୀତାଙ୍କୁ ୧,୦୨, ୮୭୧ ଖଣ୍ଡ ଭୋଟ ମିଳିଥିବା ବେଳେ ବିଜେପିର ଅଶୋକ ପାଣିଗ୍ରାହୀଙ୍କୁ ୬୦,୯୩୯ ଏବଂ କଂଗ୍ରେସର ପ୍ରଣୟ ସାହୁଙ୍କୁ ୧୦,୨୭୪ ଖଣ୍ଡ ଭୋଟ ମିଳିଥିଲା |
ଏହି ନିର୍ବାଚନମଣ୍ଡଳୀର ଅନ୍ୟ ଏକ ବିଶେଷତ୍ବ ରହିଛି । କୌଣସି ବାହାର ଅଞ୍ଚଳ ଲୋକ, ଯିଏକି ଏଠାରୁ ନିର୍ବାଚନ ଲଢିଛନ୍ତି ତାଙ୍କୁ ଗ୍ରହଣ କରି ପାରିନାହାନ୍ତି ସ୍ଥାନୀୟ ଭୋଟର । ସେ ଯେତେ ବଡ ନେତା ହେଉନା କାହିଁକି କିମ୍ବା ଯେ କୌଣସି ଦଳରୁ ପ୍ରାର୍ଥୀ ହୋଇ ନିର୍ବାଚନ ଲଢନ୍ତୁ ନାଁ କାହିଁକି ସେ ଏଠାରେ ପରାସ୍ତ ହୋଇଛନ୍ତି ।
ଯାହାର ଉଦାହହଣ ଦେଖିବାକୁ ମିଳିଛି ବିଗତ ଦୁଇଟି ନିର୍ବାଚନରେ । ୨୦୦୯ ନିର୍ବାଚନରେ ବରଗଡର ବିଜେଡି ପ୍ରାର୍ଥୀ ପ୍ରଭାତଆଦିତ୍ୟ ମିଶ୍ର ଓ ୨୦୧4ରେ ରାଜ୍ୟ ରାଜନୀତିର ଚାଣକ୍ୟ କୁହାଯାଉଥିବା ବିଜେଡି ଦଳର ପୁରୁଖା ନେତା ପ୍ରସନ୍ନ ଆଚାର୍ଯ୍ୟ ମଧ୍ୟ ଏଠାରେ ପରାସ୍ତ ହୋଇଥିଲେ ।
ମାତ୍ର ୪୫୮ ଖଣ୍ଡ ଭୋଟରେ ପରାଜିତ ହୋଇଥିଲେ ପ୍ରସନ୍ନ | ଚଳିତ ଥର ବିଜେପୁରରୁ ବିଜେଡି ପ୍ରାର୍ଥୀ ଭାବେ ନିର୍ବାଚନକୁ ଓହ୍ଲାଇଛନ୍ତି ଖୋଦ ଦଳ ସୁପ୍ରିମୋ ନବୀନ ପଟ୍ଟନାୟକ । ଏଥର ବିଜେପୁର ଭୋଟର ନବୀନଙ୍କୁ ନିର୍ବାଚିତ କରିବେ ନା ପୁରୁଣା ଇତିହାସକୁ ଦୋହରାଇବେ ତାହା ଦେଖିବାକୁ ବାକି ରହିଲା।
ବରଗଡରୁ ରାଜେଶ ସରାପ, ଈଟିଭି ଭାରତ
