ବରଗଡ: ପଲିଟିକାଲ ହଟସ୍ପଟ୍ ବିଜେପୁର ଉପ-ନିର୍ବାଚନ ପାଇଁ ଏବେ ସବୁ ରାଜନୈତିକ ଦଳର ହେଭିୱେଟ ଡେରା ପକାଇଛନ୍ତି ବିଜେପୁରରେ । ନିଜ ଦଳୀୟ ପ୍ରାର୍ଥୀଙ୍କ ବିଜୟ ପାଇଁ ସବୁ ଦଳ ପ୍ରତିଶୃତି ବର୍ଷା କରୁଛନ୍ତି । ବିକାଶର କଥା କହୁଛନ୍ତି । ହେଲେ ଏଠି କେତେ ବିକାଶ ହୋଇଛି ତାହା ସ୍ପଷ୍ଟ ବାରି ହେଉଛି ସାନ ସାହାଜବାହାଲ ଗ୍ରାମରୁ ।
ସୂଚନା ଅନୁସାରେ ବିଜେପୁର ନିର୍ବାଚନ ମଣ୍ଡଳୀ ଅନ୍ତର୍ଗତ ତଥା ଗାଇସିଲେଟ ବ୍ଲକ ଅନ୍ତର୍ଗତ ସାନ ସାହାଜବାହାଲ ଗ୍ରାମକୁ ପଞ୍ଚାୟତ ମୁଖ୍ୟାଳୟ ଠାରୁ ଆଜି ପର୍ଯ୍ୟନ୍ତ ଭଲ ରାସ୍ତାଟିଏ ମଧ୍ୟ ହୋଇନାହିଁ । ଦୀର୍ଘ ଦିନରୁ ଏଠାକାର ସ୍ଥାୟୀ ବାସିନ୍ଦା ଏକ ରାସ୍ତା ପାଇଁ ଦାବି କରିଆସୁଥିଲେ ମଧ୍ୟ ପ୍ରତ୍ୟେକ ନିର୍ବାଚନ ଓ ଉପ-ନିର୍ବାଚନ ସମୟରେ ନେତା ଓ ମନ୍ତ୍ରୀ କେବଳ ପ୍ରତିଶ୍ରୁତି ପରେ ପ୍ରତିଶ୍ରୁତି ଦେଉଛନ୍ତି କିନ୍ତୁ ପ୍ରତିଶୃତି ପୂରଣ କରିବାରେ ସମର୍ଥ ହୋଇନାହାଁନ୍ତି ।
ଏହି ରାସ୍ତା ଉପରେ ଖାଲିଯେ ସାନ ସାହାଜବାହାଲ ଗ୍ରାମବାସୀ ନିର୍ଭର କରନ୍ତି ତାହା ନୁହେଁ ବଲାଙ୍ଗୀର ଜିଲ୍ଲାର ପାଟଣାଗଡ ବ୍ଲକ ଅଧିନସ୍ଥ ଗ୍ରାମ ଗୁଡିକର ଲୋକେ ମଧ୍ୟ ବ୍ୟବହାର କରିଥାନ୍ତି । ଏହାସତ୍ବେ ବିଜେପୁରର ଦାୟିତ୍ବ ନେଇଥିବା ମୁଖ୍ୟମନ୍ତ୍ରୀଙ୍କର ନଜର ପଡୁନାହିଁ ସାନ ସାହାଜବାହାଲ ଗ୍ରାମଉପରେ ।
ଫଳରେ ଆସନ୍ତା ଉପ-ନିର୍ବାଚନରେ ଭୋଟ ବର୍ଜନ କରିବାକୁ ନିଷ୍ପତ୍ତି ନେଇଛନ୍ତି ସାନ ସାହାଜବାହାଲ ଗ୍ରାମବାସୀ ।
ବରଗଡରୁ ରାଜେଶ ସରାପ, ଇଟିଭି ଭାରତ
