ବରଗଡ: ପୋଲିସ ଅଧିକାରୀଙ୍କ କାର୍ଯ୍ୟକଳାପ ନେଇ ସାଧାରଣରେ ଉଠିଛି ପ୍ରଶ୍ନବାଚୀ । ବରଗଡ ପଦ୍ମପୁର ଉପଖଣ୍ଡରେ ଖୋଦ ପୋଲିସ ଅଧିକାରୀଙ୍କ ନାଁରେ ଅଭିଯୋଗ କରିଛନ୍ତି ସାଧାରଣଲୋକେ। ଏହି ଅଞ୍ଚଳରେ ବହୁ ଅପହରଣ ଓ ହତ୍ୟାକାଣ୍ଡ ଘଟୁଥିବା ବେଳେ ଅପରାଧୀଙ୍କ ଠାରୁ ହାତଗୁଞ୍ଜା ନେଇ ହତ୍ୟାକାଣ୍ଡ ଘଟଣାକୁ ପଦ୍ମପୁର ପୋଲିସ ତଦନ୍ତ ପରିସରକୁ ଆଣୁ ନଥିବା ଅଭିଯୋଗ ହୋଇଛି |
ଜଗଦଲପୁର ଥାନା ଅନ୍ତର୍ଗତ ଲଉଡିଧରା ଗ୍ରାମର ନାବାଳିକା ଘରୁ ନିଖୋଜ ହେବା ପରେ ମୃତଦେହ ଗୋଟିଏ କୂଅରୁ ଉଦ୍ଧାର କରାଯାଇଥିଲା । ନାବାଳିକା ଶରୀରରେ କ୍ଷତାକ୍ତ ଚିହ୍ନ ସ୍ପଷ୍ଟ ଜଣାପଡୁ ଥିବାବେଳେ ନାବାଳିକାର ବାପା ପ୍ରେମଜନିତ ହତ୍ୟା ଅଭିଯୋଗ ଆଣି ଥାନାକୁ ଯାଇଥିଲେ । ମାତ୍ର ପୋଲିସ ଏହାକୁ ଅପମୃତ୍ୟୁ ମାମଲା କହି ଅଭିଯୁକ୍ତକୁ ଛାଡି ଦେଇଥିଲେ । ଏପରିକି ଏତଲାର ନକଲ ମଧ୍ୟ ଦେବାକୁ ପୋଲିସ ମନା କରିଦେଇଥିଲେ ।
ମୃତ୍ୟୁ ଘଟଣାରେ ସ୍ଥାନୀୟ ପୋଲିସ ଚୁପ ରହି ଘଟଣାକୁ ଚପାଇ ଦେବାକୁ ଚେଷ୍ଟା କରୁଥିବାରୁ ପରିବାର ଲୋକେ ବରଗଡ ଏସପିଙ୍କୁ ଭେଟିଥିଲେ । କିନ୍ତୁ ଏସ.ପିଙ୍କ ନିର୍ଦ୍ଦେଶ ସତ୍ବେ ମଧ୍ୟ ସ୍ଥାନୀୟ ପୋଲିସ ଅଧିକାରୀ କୌଣସି ପଦକ୍ଷେପ ଗ୍ରହଣ କରିନାହାନ୍ତି ।
ସବୁଠୁ ଆଶ୍ଚର୍ଯ୍ୟର କଥା ଯେ, ଏହି ହତ୍ୟା ଘଟଣାକୁ ଗୋଟେ ମାସ ବିତିଯାଇଥିଲେ ମଧ୍ୟ ପୋଲିସର ହାତ ଖାଲି। ଏଦିଗରେ ପୋଲିସ କୌଣସି କାର୍ଯ୍ୟନୁଷ୍ଠାନ ଗ୍ରହଣ କରିନାହିଁ । ଯାହାକୁ ନେଇ ସ୍ଥାନୀୟ ପଦ୍ମପୁର, ପାଇକମାଳ, ଝାରବନ୍ଧ, ଜଗଦଳପୁର ଓ ବୁଡେନ ଥାନା ଅଧୀନରେ ହତ୍ୟାକାଣ୍ଡ ଘଟଣା ଗୁଡିକୁ ପୋଲିସ କେବଳ ଅପମୃତ୍ୟୁ ମାମଲା ରୁଜୁ କରି ନିଜ ମୁଣ୍ଡରୁ ଦାୟିତ୍ଵ ଖସାଇ ଦେଉଥିବା ଅଭିଯୋଗ ହେଉଛି।
ବରଗଡରୁ ରାଜେଶ ସରାପ, ଇଟିଭି ଭାରତ
