ବରଗଡ଼: ଜିଲ୍ଲାରେ ଚାଞ୍ଚଲ୍ୟ, କମଗାଁ କଲେଜରେ ଘଟିଯାଇଛି ଏକ ଅଭାବନୀୟ ଘଟଣା । ହଷ୍ଟେଲରେ ରହୁଥିବା ଛାତ୍ରଙ୍କ ପିଇବା ପାଣିରେ କୀଟନାଶକ ମିଶାଇଲେ ଅନ୍ୟ ଜଣେ ଛାତ୍ର । 17 ଜଣ ଛାତ୍ର ଅସୁସ୍ଥ ଥିବାବେଳେ ଜଣଙ୍କ ଅବସ୍ଥା ଗୁରୁତର । ତାଙ୍କୁ ବୁର୍ଲା ମେଡିକାଲ ସ୍ଥାନାନ୍ତର କରାଯାଇ ଥିବାବେଳେ ଅନ୍ୟମାନେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ।
ସୂଚନା ଅନୁଯାୟୀ ବରଗଡ଼ କମଗାଁ କଲେଜ ହଷ୍ଟେଲର ଜଣେ ଛାତ୍ର ସମସ୍ତଙ୍କ ପିଇବା ପାଣିରେ କୀଟନାଶକ ମିଶାଇ ଦେଇଥିଲେ । ଅଧିକାଂଶ ଛାତ୍ର ରାତ୍ର ଭୋଜନ ପରେ ସେହି ପାଣିକୁ ପିଇଥିଲେ । ବିଷ ମିଶାଇଥିବା ଛାତ୍ର ଜଣକ ମଧ୍ୟ ସେହି ପାଣିକୁ ପିଇଥିଲେ । ମାତ୍ର ପାଣିରୁ ଦୁର୍ଗନ୍ଧ ଆସିବାରୁ କମ୍ ପରିମାଣର ପାଣି ପିଇଥିଲେ । ମାତ୍ର କିଛି ସମୟ ପରେ ଛାତ୍ରମାନେ ଅସୁସ୍ଥ ଅନୁଭବ କରିଥିଲେ । ସମସ୍ତଙ୍କୁ ବରଗଡ ଜିଲ୍ଲା ମେଡିକାଲରେ ଭର୍ତ୍ତି କରାଯାଇଥିଲା ।
ବଡ କଥା ହେଉଛି କି ଯେଉଁ ଛାତ୍ର ଜଣକ ପିଇବା ପାଣିରେ କୀଟନାଶକ ମିଶାଇଥିଲେ, ତାଙ୍କ ଅବସ୍ଥା ଗୁରୁତର ରହିଛି । ତାଙ୍କୁ ସମ୍ବଲପୁର ସ୍ଥିତ ବୁର୍ଲା ବଡ ମେଡିକାଲକୁ ସ୍ଥାନାନ୍ତର କରାଯାଇଛି । ତେବେ କେଉଁ କାରଣରୁ ସେ ଏପରି ଏକ କାଣ୍ଡ କରିଛନ୍ତି ସେନେଇ ସ୍ପଷ୍ଟ ହୋଇନାହିଁ । ତଦନ୍ତ ପରେ ପ୍ରକୃତ କାରଣ ପଦାକୁ ଆସିବ ।
ବରଗଡରୁ ରାଜେଶ ସରାପ, ଇଟିଭି ଭାରତ
