ବରଗଡ: ବଣ ଭୋଜି କରିବାକୁ ଯାଇଥିବା ବେଳେ ଏକ ରାଜନୈତିକ ଦଳର ସମର୍ଥକଙ୍କୁ ନାଲି ଆଖି ଦେଖାଇଲେ ପୋଲିସ ବାବୁ। ୟୁନିଫର୍ମରେ ନଥାଇ ମଧ୍ୟ ନିଜର ସର୍ଭିସ ବନ୍ଧୁକ ଦେଖାଇ ଭୟଭୀତ କରିବା ସହିତ ଦୁର୍ବ୍ୟବହାର କଲେ ପୋଲିସ ଅଧିକାରୀ । ଯାହା ପରମୁହୁର୍ତ୍ତରେ ମହଙ୍ଗା ସାବ୍ୟସ୍ତ ହୋଇଛି । ଥାନା ଭିତରକୁ ପଶି ବ୍ୟାପକ ଭଙ୍ଗାରୁଜା କଲେ ଶତାଧିକ ଲୋକେ । ଏଭଳି ଘଟଣା ଘଟିଛି ବରଗଡ଼ ଜିଲ୍ଲା ଅମ୍ବାଭୋନା ଥାନାରେ । ଶତାଧିକ ଲୋକେ ଅତର୍କିତ ଭାବେ ଆମ୍ବାଭୋନା ଥାନା ଭିତରେ ପଶି ବ୍ୟାପକ ଭଙ୍ଗାରୁଜା କରିବାରୁ ଥାନାରେ ଥିବା କମ୍ପ୍ୟୁଟର, ଚୌକି, ଟେବୁଲ , କାଚ ଡୋର୍, ସିସି ଟିଭି କ୍ୟାମେରା ସହିତ ବହୁ ଆସବାବ ପତ୍ର ଭାଙ୍ଗି ଚୂରମାର୍ ହୋଇଯାଇଛି ।
ମିଳିଥିବା ସୂଚନା ଅନୁଯାୟୀ, ଗତକାଲି(ରବିବାର) ଅମ୍ବଭୋନା ଅଞ୍ଚଳକୁ ଆଖପାଖ ଗ୍ରାମରୁ ବହୁ ଲୋକ ବଣ ଭୋଜି ପାଇଁ ତାମଦେଇ ପିକ୍ନିକ୍ ସ୍ଥଳକୁ ଆସିଥିଲେ । ଏକ ନିର୍ଦ୍ଦିଷ୍ଟ ରାଜନୈତିକ ଦଳର ସମର୍ଥକମାନେ ମଧ୍ୟ ବଣ ଭୋଜି ପାଇଁ ଆସିଥିଲେ । ଏହି ସମୟରେ ଆମ୍ବାଭୋନା ପୋଲିସ ଅଧିକାରୀ ତାଙ୍କ ଅନ୍ୟ କର୍ମଚାରୀଙ୍କୁ ନେଇ ପିକ୍ନିକ୍ ସ୍ଥାନରେ ପହଞ୍ଚିଥିଲେ ଏବଂ ନିଶାଦ୍ରବ୍ୟ ଗଚ୍ଛିତ ଥିବା ସନ୍ଦେହରେ ସର୍ଚ୍ଚ କରିବା ଆରମ୍ଭ କରିଥିଲେ । ପୋଲିସ ଅଧିକାରୀ ଜଣକ ୟୁନିଫର୍ମରେ ନଥିବା ବେଳେ ନିଜର ସର୍ଭିସ ବନ୍ଧୁକ ଦେଖାଇ ସେଠାରେ ଉପସ୍ଥିତ ସମସ୍ତଙ୍କୁ ଭୟଭୀତ କରିବାକୁ ଚେଷ୍ଟା କରିବା ସହିତ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି ।
ଏହା ମଧ୍ୟ ପଢନ୍ତୁ-ଚିତ୍ରକୋଣ୍ଡା ଥାନାରେ କଂଗ୍ରେସ କର୍ମୀଙ୍କ ଭଙ୍ଗାରୁଜା
ଯାହା ଫଳରେ ପିକ୍ନିକ୍ ଆସିଥିବା ରାଜନୈତିକ ଦଳର ସମର୍ଥକମାନେ ପୋଲିସକୁ ଏପରି ଅପରାଧୀଙ୍କ ପରି ବ୍ୟବହାର କାହିଁକି କରୁଛନ୍ତି ବୋଲି ପ୍ରଶ୍ନ କରିଥିଲେ । ଏଥିରେ ପୋଲିସ ଅଧିକାରୀ ଜଣକ ଉତ୍ତେଜିତ ହୋଇପଡ଼ି ଅସଭ୍ୟ ଭାଷାରେ ଗାଳିଗୁଲଜ କରିବାରୁ ଗଣ୍ଡଗୋଳ ଆରମ୍ଭ ହୋଇଯାଇଥିଲା । ପୋଲିସର ଏପରି ଦୁର୍ବ୍ୟବହାର ଘଟଣାକୁ ନେଇ ପରବର୍ତ୍ତୀ ସମୟରେ ଶତାଧିକ ଯୁବକ ଆମ୍ବଭୋନା ଥାନାକୁ ଘେରି ଯାଇ ବ୍ୟାପକ ଭଙ୍ଗାରୁଜା କରିବା ଆରମ୍ଭ କରିଥିଲେ। ଥାନାରେ ଉପସ୍ଥିତ ଥିବା ପୋଲିସ କର୍ମଚାରୀମାନେ ମଧ୍ୟ ଏହାକୁ ନିୟନ୍ତ୍ରଣ କରିବାରେ ବିଫଳ ହୋଇଥିଲେ । ଦୀର୍ଘ ସମୟ ଧରି ଥାନାରେ ଭଙ୍ଗାରୁଜା ଓ ଚାପା ଉତ୍ତେଜନା ଲାଗି ରହିଥିବା ବେଳେ ବରଗଡ଼ରୁ ପୋଲିସ ଏସ୍ଡିପିଓ ପଦାରବିନ୍ଦ ତ୍ରିପାଠୀ ଆମ୍ବାଭୋନାରେ ପହଞ୍ଚିଥିଲେ ଓ ସ୍ଥିତି ଅନୁଧ୍ୟାନ କରିଥିଲେ ।
ଏହି ଘଟଣା ପରେ ଆମ୍ବାଭୋନା ଥାନାରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । ଏହି ଘଟଣାକୁ ନେଇ ପୋଲିସ ବିଭାଗ ପକ୍ଷରୁ କୌଣସି ଉତ୍ତର ଦିଆଯାଇନଥିବା ବେଳେ କୌଣସି ମାମଲା ବି ରୁଜୁ କରାଯାଇନଥିବା ସୂଚନା ମିଳିଛି ।
ଇଟିଭି ଭାରତ, ବରଗଡ
