ବରଗଡ଼: ବରପାଲି ବ୍ଲକ ମହଦା କେନାଲ ଛକରେ ଘଟି ଯାଇଛି ଏକ ଅଭାବନୀୟ ଦୁର୍ଘଟଣା । ଗଛକୁ ଡମ୍ଫର ଧକ୍କା ଦେବାରୁ ଗଛ ଡାଳ ଭାଙ୍ଗି ରାସ୍ତାରେ ଯାଉଥିବା ବାଇକ ଆରୋହୀଙ୍କ ଉପରେ ପଡିବାରୁ ଦୁଇ ବାଇକ ଆରୋହୀ ମୃତ ।
ସୂଚନା ଅନୁସାରେ ଏକ ଡମ୍ଫର ଗାଡି କୌଣସି ଏକ କାର୍ଯ୍ୟରେ ବରପାଲି କେନାଲ ଛକ୍ ଦେଇ ଭଟିଗାଁ-ମହଦା କେନାଲ ଛକ ଆଡ଼କୁ ଯାଉଥିଲା । ଡମ୍ଫର ଗାଡି ପଛରେ ଦୁଇ ଯୁବକ ଏକ ବାଇକରେ ଯାଉଥିଲେ । ତେବେ ହଠାତ୍ ଡମ୍ଫର ଗାଡିଟି ରାସ୍ତା କଡରେ ଥିବା ଏକ ଗଛକୁ ଧକ୍କା ଦେଇଥିଲା, ଫଳରେ ଗଛର ଡାଳ ଭାଙ୍ଗିଯାଇ ବାଇକ ଉପରେ ଯାଉଥିବା ଯୁବକ ଦ୍ୱୟଙ୍କ ଉପରେ ପଡିଥିଲା । ଫଳରେ ଘଟଣାସ୍ଥଳରେ ଯୁବକଙ୍କ ମୃତ୍ୟୁ ହୋଇଥିଲା ।
ପରେ ସ୍ଥାନୀୟ ଲୋକେ ଆମ୍ବୁଲାନ୍ସକୁ ଖବର ଦେଇଥିଲେ ଓ ଆମ୍ବୁଲାନ୍ସ ଆସି ଉଭୟଙ୍କୁ ବରପାଲି ଡାକ୍ତର ଖାନାରେ ଭର୍ତ୍ତି କରିଥିଲେ । ଡାକ୍ତର ଉଭୟଙ୍କୁ ମୃତ ଘୋଷଣା କରିଥିବା ଜଣାପଡ଼ିଛି । ଯୁବକଦ୍ୱୟ ଚାରା ଆଣିବା ପାଇଁ ଯାଉଥିବା ସମୟରେ ଏଭଳି ଘଟଣା ଘଟିଥିବା ସୂଚନା ମିଳିଛି । ଯୁବକମାନେ ହେଲେ ବରପାଲି ବ୍ଲକ ଓ ଅନ୍ୟଜଣେ ସୋନପୁର ଜିଲାର ରାମପୁର ଥାନା ଅନ୍ତର୍ଗତ ସାହାଯବାହାଲର ବୋଲି ପ୍ରାଥମିକ ସୂଚନା ରହିଛି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
