ବରଗଡ଼: ପଦ୍ମପୁର ଉପନିର୍ବାଚନ (Padmapur By Poll) ନେଇ ବଢ଼ୁଛି ରାଜନୈତିକ ଉଷ୍ମତା । ଆସନ୍ତାକାଲି ଅର୍ଥାତ ନଭେମ୍ବର 17 ତାରିଖ ନାମାଙ୍କନ ଦାଖଲର ଶେଷ ତାରିଖ ରହିଥିବାବେଳେ ଆଜି ପର୍ଯ୍ୟନ୍ତ କୌଣସି ଦଳ ନାମାଙ୍କନ ପତ୍ର ଦାଖଲ କରିନାହାନ୍ତି ।
ପଦ୍ମପୁରରେ ଚାଷୀ ଆନ୍ଦୋଳନ ଓ ଜିଲ୍ଲା ମାନ୍ୟତା ଦାବି ଚକ୍ରବ୍ୟୁହରେ ଫସିଯାଇଛନ୍ତି ଉଭୟ ଶାସକ ବିଜେଡି ଓ ବିରୋଧି ବିଜେପି । ଫସଲ ବୀମାକୁ ନେଇ ଆନ୍ଦୋଳନ ଚାଲିଥିବା ବେଳେ ଚାଷୀଙ୍କ ଆନ୍ଦୋଳନକୁ ରାଜନୀତିକାରଣ କରି ବିଜେପି ଓ ବିଜେଡି ମଧ୍ୟରେ ଦୋଷାରୋପ ଓ କଟୁ ମନ୍ତବ୍ୟ ମଧ୍ୟରେ ଗଡିଯାଇଛି ପ୍ରାର୍ଥୀପତ୍ର ଦାଖଲର ସମୟ । ମାତ୍ର କେହି ମଧ୍ୟ ଆଜି ଯାଏଁ ପ୍ରାର୍ଥୀପତ୍ର ଦାଖଲ କରିପାରିଲେ ନାହିଁ | ଆଜି 3 ଜଣ ବ୍ୟକ୍ତି ପ୍ରାର୍ଥୀପତ୍ର କ୍ରୟ କରି ଧାର୍ଯ୍ୟ ରାଶି ଜମା କରିଥିଲେ । ତେବେ 10 ତାରିଖରୁ ଆଜି 16 ତାରିଖ ପର୍ଯ୍ୟନ୍ତ ସମୁଦାୟ 8 ଜଣ ଫର୍ମ କ୍ରୟ କରିଥିବା ବେଳେ ଆସନ୍ତାକାଲି ଶେଷ ଦିନରେ ପ୍ରାର୍ଥୀମାନେ କିପରି ନାମାଙ୍କନ ପତ୍ର ଦାଖଲ କରୁଛନ୍ତି ତାହା ଦେଖିବା ବାକି ରହିଛି ।
