ବରଗଡ: ହତ୍ୟାକାଣ୍ଡର ୭୨ ଘଣ୍ଟା ଭିତରେ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି ବରପାଲି ପୋଲିସ । ବରପାଲିରେ ଅଜଣା ଯୁବକଙ୍କ ମୃତଦେହ ପଡିଥିବା ଦେଖି ଲୋକେ ପୋଲିସକୁ ଜଣାଇଥିଲେ ଏବଂ ପୋଲିସ ଘଟଣାର ତଦନ୍ତ ଜାରି ରଖିଥିଲା । ବରପାଲି ପୋଲିସ ଏହି ହତ୍ୟାକାଣ୍ଡରେ ସମ୍ପୃକ୍ତ ଥିବା ହତ୍ୟାକାରୀଙ୍କୁ ଗିରଫ କରି କୋର୍ଟ ଚାଲାଣ କରିଛି |
ଗତ ୧୪ ତାରିଖରେ ଜଗନ୍ନାଥ ନଗର ନିକଟରେ ହୋଇଥିବା ହତ୍ୟାକାଣ୍ଡ ଘଟଣାର ପର୍ଦ୍ଧାଫାଶ କରିଛି ପୋଲିସ | ମୃତ ଯୁବକ ଏବଂ ହତ୍ୟାକାରୀ ଉଭୟ ବରଗଡ ୨ ନମ୍ବର ୱାର୍ଡ ତଳିପଡାର ବୋଲି ଜଣାପଡିଛି | ମୃତକ ପ୍ରଶାନ୍ତ ପରଢିଆ ଏବଂ ହତ୍ୟାକାରୀ କଏରୁ ବେହେରା ଓରଫ ରାହୁଲ ଉଭୟ ସାଙ୍ଗ ଥିଲେ । ଉଭୟଙ୍କ ମଧ୍ୟରେ ହୋଇଥିବା କଳହକୁ ନେଇ ରାହୁଲ ଏକ ଲୁହାଛଡରେ ପ୍ରଶାନ୍ତଙ୍କ ମୁଣ୍ଡକୁ ଆକ୍ରମଣ କରିବାରୁ ଘଟଣାସ୍ଥଳରେ ତାର ମୃତ୍ୟୁ ଘଟିଥିଲା। ପୋଲିସ ହତ୍ୟାକାରୀ ରାହୁଲ ଠାରୁ ଦୁଇଟି ମୋବାଇଲ ଫୋନ, ଗୋଟିଏ ସ୍କୁଟି , ଗୋଟିଏ ହିରୋ ସାଇନ ମୋଟର ସାଇକେଲ , ହତ୍ୟାକାଣ୍ଡରେ ବ୍ୟବହୃତ ହୋଇଥିବା ଏକ ଲୁହାଛଡ ଏବଂ ପର୍ସ ଜବତ କରିଛି |
ସୂଚନା ଅନୁଯାୟୀ ମୋବାଇଲ ଚୋରି ଘଟଣାକୁ ନେଇ ରାହୁଲ ଅନ୍ୟଙ୍କୁ ପ୍ରକାଶ କରିଦେଇଥିବା କଥା କହିଦେଇଥିଲା । ଫଳରେ ପ୍ରଶାନ୍ତ ଏଥିରେ ରାଗିଯାଇଥିଲା ଏବଂ ଉଭୟଙ୍କ ମଧ୍ୟରେ ଗଣ୍ଡଗୋଳ ବଢିଥିଲା । ଏହି ଗଣ୍ଡଗୋଳରେ ଉତ୍ୟକ୍ତ ହୋଇ ରାହୁଲ ଲୁହାଛଡରେ ପ୍ରଶାନ୍ତଙ୍କ ମୁଣ୍ଡକୁ ଦୁଇଥର ପ୍ରହାର କରିଥିଲା । ଘଟଣାସ୍ଥଳରେ ପ୍ରଶାନ୍ତର ମୃତ୍ୟୁ ହୋଇଥିବା ଏସପି ପଦ୍ମିନୀ ସାହୁ ସାମ୍ବାଦିକ ସମ୍ବିଳନୀରେ ପ୍ରକାଶ କରିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
