ବରଗଡ: ଅପହରଣକାରୀ କବଳରୁ ମୁକ୍ତ ହେଲେ ନାବାଳକ । ତିନି ଦିନ ହେଲା ଅପହରଣ ହୋଇ ନିଖୋଜ ଥିଲେ ନାବାଳକ । ବରଗଡ 11 ନମ୍ବର ୱାର୍ଡର ନାବାଳକଙ୍କ ରବିବାର ପତ୍ତା ମିଳିଛି ।
ନାବାଳକ ହେଉଛନ୍ତି ନୂଆପଡାର ସୁବାଷ ଶବରଙ୍କ ପୁଅ ଈଶ୍ୱର ଶବର । ତେବେ ଈଶ୍ୱର ନିଜ ଉଦ୍ୟମରେ ଅପହରଣକାରୀଙ୍କ କବଳରୁ ମୁକୁଳି ଫେରି ଆସିଛନ୍ତି । ସେହିପରି ନାବାଳକ ଜଣକର ଦେହ ଅସୁସ୍ଥ ଥିବାରୁ ତାକୁ ବରଗଡ ଡାକ୍ତରଖାନାରେ ଭର୍ତ୍ତି କରାଯାଇଛି । ସୂଚନା ଅନୁଯାୟୀ ବରଗଡ 11 ନମ୍ବର ୱାର୍ଡ ନୂଆପଡାର 15 ବର୍ଷୀୟ ନାବାଳକଙ୍କୁ 3 ଜଣ ପିଲା ଅଚେତ୍ କରିଦେଇ ଅପହରଣ କରି ନେଇଥିଲେ ।
ଅପହରଣକାରୀଙ୍କ କବଳରୁ ଉଦ୍ଧାର ହେଲେ ନାବାଳକ
ମାତ୍ର ନାବାଳକର ଚେତା ଆସଲା ପରେ ସେ ବନ୍ଦ ହୋଇଥିବା କୋଠରୀରେ ହାତଗୋଡ ବନ୍ଧା ଅବସ୍ଥାରେ ନିଜକୁ ଦେଖିବାକୁ ପାଇଥିଲେ । ବହୁତ ଚେଷ୍ଟା ପରେ ନିଜେ ମୁକୁଳି ପଳେଇ ଆସିବାରେ ସକ୍ଷମ ହୋଇଥିଲେ । ଏନେଇ ବରଗଡ ଟାଉନ ଥାନାରେ ମାମଲା ରୁଜୁ ହୋଇଥିବା ବେଳେ ପୋଲିସ ଏହି ଘଟଣାର ତଦନ୍ତ କରୁଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
