ବରଗଡ଼: ବୁଧବାର ହୋଇଥିବା ସଡ଼କ ଦୁର୍ଘଟଣାକୁ ନେଇ ଆଜି(ଗୁରୁବାର) ମଧ୍ୟ ବରଗଡ଼ ଭଟଲି ଛକରେ ବ୍ୟାପକ ଆନ୍ଦୋଳନ କରିଛନ୍ତି ସ୍ଥାନୀୟ ଲୋକେ । ମୃତକଙ୍କ ପରିବାରକୁ କ୍ଷତିପୂରଣ ପ୍ରଦାନ ଓ ଟ୍ରାଫିକ ସମସ୍ୟାର ସମାଧାନ ଦାବି କରି ଲୋକମାନେ ୧୬ ଘଣ୍ଟା ଧରି ରାସ୍ତା ଅବରୋଧ କରିଛନ୍ତି । ହେଲେ ଏପର୍ଯ୍ୟନ୍ତ ପ୍ରଶାସନ ଘଟଣାସ୍ଥଳରେ ପହଞ୍ଚି ନଥିବା ଦେଖିବାକୁ ମିଳିଛି ।
ମୃତଦେହ ରଖି 16 ଘଣ୍ଟା ଗ୍ରାମବାସୀଙ୍କ ରାସ୍ତା ଅବରୋଧ, ପ୍ରଶାସନର ନାହିଁ ନିଘା
ଗତକାଲି ବରଗଡ଼ ଭଟଲି ରୋଡ଼ ସ୍ଥିତ ଗାଡି ଶୋ'ରୁମ ସମ୍ମୁଖରେ ହୋଇଥିବା ସଡ଼କ ଦୁର୍ଘଟଣାରେ ସ୍ଥାନୀୟ ସାର କାରଖାନା ସମ୍ମୁଖ ନଦୀପଡାର ବାସିନ୍ଦା କିଶୋର କୁମାର ବେଳଘରିଆ ନାମକ ଯୁବକଙ୍କ ମୃତ୍ୟୁ ହୋଇଥିଲା । ସେ ଅନ୍ୟ ଏକ ବାଇକ ଶୋ' ରୁମରେ ଡ୍ରାଇଭର ଭାବରେ କାମ କରୁଥିଲେ । ଗତକାଲି ଡ୍ୟୁଟି ସାରି ଘରକୁ ଫେରୁଥିବା ସମୟରେ ଟ୍ରକ ଚାପାରେ ତାଙ୍କର ମୃତ୍ୟୁ ହୋଇଥିଲା । ତେବେ ଦୁର୍ଘଟଣା ଘଟାଇଥିବା ଟ୍ରକକୁ ପୋଲିସ ହେପାଜତରେ ନିଆଯାଇଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ଘଟଣା ସ୍ଥଳରେ ଉତ୍ତେଜନା ଲାଗି ରହିଛି ।
