ବରଗଡ଼: ବୁଧବାର ହୋଇଥିବା ସଡ଼କ ଦୁର୍ଘଟଣାକୁ ନେଇ ଆଜି(ଗୁରୁବାର) ମଧ୍ୟ ବରଗଡ଼ ଭଟଲି ଛକରେ ବ୍ୟାପକ ଆନ୍ଦୋଳନ କରିଛନ୍ତି ସ୍ଥାନୀୟ ଲୋକେ । ମୃତକଙ୍କ ପରିବାରକୁ କ୍ଷତିପୂରଣ ପ୍ରଦାନ ଓ ଟ୍ରାଫିକ ସମସ୍ୟାର ସମାଧାନ ଦାବି କରି ଲୋକମାନେ ୧୬ ଘଣ୍ଟା ଧରି ରାସ୍ତା ଅବରୋଧ କରିଛନ୍ତି । ହେଲେ ଏପର୍ଯ୍ୟନ୍ତ ପ୍ରଶାସନ ଘଟଣାସ୍ଥଳରେ ପହଞ୍ଚି ନଥିବା ଦେଖିବାକୁ ମିଳିଛି ।
ଗତକାଲି ବରଗଡ଼ ଭଟଲି ରୋଡ଼ ସ୍ଥିତ ଗାଡି ଶୋ'ରୁମ ସମ୍ମୁଖରେ ହୋଇଥିବା ସଡ଼କ ଦୁର୍ଘଟଣାରେ ସ୍ଥାନୀୟ ସାର କାରଖାନା ସମ୍ମୁଖ ନଦୀପଡାର ବାସିନ୍ଦା କିଶୋର କୁମାର ବେଳଘରିଆ ନାମକ ଯୁବକଙ୍କ ମୃତ୍ୟୁ ହୋଇଥିଲା । ସେ ଅନ୍ୟ ଏକ ବାଇକ ଶୋ' ରୁମରେ ଡ୍ରାଇଭର ଭାବରେ କାମ କରୁଥିଲେ । ଗତକାଲି ଡ୍ୟୁଟି ସାରି ଘରକୁ ଫେରୁଥିବା ସମୟରେ ଟ୍ରକ ଚାପାରେ ତାଙ୍କର ମୃତ୍ୟୁ ହୋଇଥିଲା । ତେବେ ଦୁର୍ଘଟଣା ଘଟାଇଥିବା ଟ୍ରକକୁ ପୋଲିସ ହେପାଜତରେ ନିଆଯାଇଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ଘଟଣା ସ୍ଥଳରେ ଉତ୍ତେଜନା ଲାଗି ରହିଛି ।
ସ୍ଥାନୀୟ ଲୋକେ କ୍ଷତିପୂରଣ ଦାବିରେ ରାସ୍ତା ଅବରୋଧ କରିବା ସହିତ ମୃତଦେହକୁ ରାସ୍ତା ଉପରେ ରଖିଛନ୍ତି । ତେବେ ଗରକାଲି ଠାରୁ ଦୀର୍ଘ 17 ଘଣ୍ଟା ହେଲା ବର୍ତମାନ ମଧ୍ୟ ଭଟଲି ଛକ ସମେତ ଜାତୀୟ ରାଜପଥକୁ ମଧ୍ୟ ଆନ୍ଦୋଳନକାରୀ ଅବରୋଧ କରିଥିବା ଦେଖିବାକୁ ମିଳିଛି । ତେବେ ଗତକାଲିଠୁ ଏ ଆନ୍ଦୋଳନ ଚାଲିଥିବା ବେଳେ ବର୍ତମାନ ପର୍ଯ୍ୟନ୍ତ ପ୍ରଶାସନ ପକ୍ଷରୁ କୌଣସି ଉପରିସ୍ଥ ଅଧିକାରୀ ଆସି ନାହାନ୍ତି । ଯାହାଫଳରେ ଆନ୍ଦୋଳନ ତୀବ୍ର ହେବାରେ ଲାଗିଛି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
