ବରଗଡ: ଜାପାନିଜ ଏନସେଫାଲାଇଟିସ ରୋଗ ବରଗଡ ଜିଲ୍ଲାରେ ନିଜର କାୟା ବିସ୍ତାର କରିବାରେ ଲଗିଛି । ଖାସ କରି ଛୋଟ ଛୋଟ ପିଲା ଏହି ରୋଗର ଶିକାର ହେଉଛନ୍ତି । ତେବେ ଏହାକୁ ଦୃଷ୍ଟିରେ ରଖି ଜିଲ୍ଲାରେ ୧୫ ବର୍ଷ ଏବଂ ତାଠାରୁ କମ ବୟସର ସମସ୍ତ ପିଲାଙ୍କୁ ପ୍ରତିଷେଧକ ଟୀକା ଦିଆଯିବ ବୋଲି ଜିଲ୍ଳା ମୁଖ୍ୟ ଚିକିତ୍ସାଧିକାରୀ ସୂଚନା ଦେଇଛନ୍ତି ।
ବରଗଡ଼ ଜିଲ୍ଳାରେ ପ୍ରାୟ 3 ଲକ୍ଷ ୧୮ ହଜାର ୩୨୬ ପିଲାଙ୍କୁ ଜାପାନିଜ ଏନସେଫାଲାଇଟିସ ପ୍ରତିଷେଧକ ଟୀକା ଦିଆଯିବ । ନଭେମ୍ବର ୧୧ ତାରିଖରୁ ଡ଼ିସେମ୍ବର ୧୦ ତାରିଖ ପର୍ଯ୍ୟନ୍ତ ଜିଲ୍ଳାର ସମସ୍ତ ବିଦ୍ୟାଳୟ ଏବଂ ଟୀକାକରଣ କେନ୍ଦ୍ରରେ ଟିକାକରଣର ବ୍ୟବସ୍ଥା କରାଯିବ । ବୁଧବାର ଏବଂ ଛୁଟିଦିନ ବ୍ୟତୀତ ଅନ୍ୟ ଦିନ ମାନଙ୍କରେ ମଧ୍ୟ ସମସ୍ତ ପିଲାଙ୍କୁ ଏହି ଟୀକା ଦିଆଯିବ ।
୨୮୧ ଜଣ ଭେକସିନେଟର, ୧୪୬୪ ଜଣ ଆଶା କର୍ମୀ ଏବଂ ୨୮୫୦ ଜଣ ଅଙ୍ଗନବାଡ଼ି କର୍ମୀ ଟୀକାକରଣ କାର୍ଯ୍ୟରେ ସାମିଲ ହେବେ । ତେବେ ଗାଁ କଲ୍ୟାଣ ସମିତି ଜରିଆରେ ବିଦ୍ୟାଳୟର ଶିକ୍ଷକ, ଜନ ପ୍ରତିନିଧି ଏବଂ ଅଭିଭାବକ ମାନଙ୍କୁ ଏ ସମ୍ପର୍କରେ ଆଗୁଆ ସୂଚନା ଦିଆଯାଇଛି ।
ଶୁକ୍ରବାର ସ୍ବାସ୍ଥ୍ୟ ବିଭାଗର ପକ୍ଷରୁ ଏକ ସାମ୍ବାଦିକ ସମ୍ବିଳନୀ କରି ଏଭଳି ଘୋଷଣା କରାଯାଇଛି । ସିଡିଏମଓ ଡ଼. ପୁଷ୍ପାଂଶୁ ସାହୁ, ଅତିରିକ୍ତ ଜିଲ୍ଲା ସ୍ବାସ୍ଥ୍ୟ ଚିକିତ୍ସାଧିକାରୀ ( ପରିବାର କଲ୍ୟାଣ) ଡ. ତହସିଲ ସାହୁ, ଜିଲ୍ଳା ସୂଚନା ଓ ଲୋକ ସମ୍ପର୍କ ଅଧିକାରୀ କଲ୍ୟାଣୀ ଦାଶ ଆଦି ସମ୍ମିଳନୀରେ ଯୋଗ ଦେଇ ଟୀକାକରଣ ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
