ବରଗଡ: ଭାତହାଣ୍ଡି ଭାବେ ପରିଚିତ ବରଗଡରେ କେନ୍ଦ୍ର ସରକାରଙ୍କ ପ୍ରଧାନମନ୍ତ୍ରୀ ଫସଲବୀମା ଯୋଜନା ଚାଷୀଙ୍କ ପାଇଁ କିଛିଟା ଆଶ୍ଵସ୍ତି ଆଣିଛି । କିନ୍ତୁ ବରଗଡ ଜିଲ୍ଲା ସୋହେଲା ବ୍ଲକରେ ଗତ ୨୦୧୬ ମସିହାରେ ଖରିପ ଫସଲରେ ଅନାବୃଷ୍ଟି ଜନିତ ହୋଇଥିବା ଧାନ ଚାଷର କ୍ଷତିପୂରଣ ୧୩ ଗୋଟି ପଞ୍ଚାଯତର ଚାଷୀ ମାନେ ପାଇନାହାନ୍ତି ।
ଚାଷୀଙ୍କ ବହୁ ଗୁହାରି ଓ ଅଭିଯୋଗ ପରେ ବୀମା କମ୍ପାନୀ ଓ ଜିଲ୍ଲାପ୍ରଶାସନ ଶୁଣିନଥିଲେ । ତେବେ ସୋହେଲା ବ୍ଲକ୍ର ୫ଟି ପଞ୍ଚାଯତର ୧୬୦୦ ଚାଷୀ ବାଧ୍ୟ ହୋଇ ଆଇନର ଆଶ୍ରୟ ନେଇଥିଲେ ଓ ଉଚ୍ଚ ନ୍ୟାୟାଳୟକୁ ଯାଇଥିଲେ |
ଚାଷୀ ନ୍ୟାୟ ପାଇଁ ସଠିକ ଭାବେ ତଦନ୍ତ କରି କ୍ଷତିପୂରଣ ସେ ସମୟର ବୀମା କମ୍ପାନୀଠାରୁ ଆଦାୟ କରିବା ପାଇଁ ମାନ୍ୟବର ଉଚ୍ଚନ୍ୟାୟାଳୟ ବରଗଡ ଜିଲ୍ଲାପାଳ ଇନ୍ଦ୍ରମଣି ତ୍ରିପାଠୀଙ୍କୁ ଆଦେଶ ଦେଇଛନ୍ତି ।
ଏନେଇ ସୋହେଲା ବ୍ଲକର ବହୁ ଚାଷୀ ଗତ ୨୦୧୬ ମସିହାରେ ଉଜୁଡି ଯାଇଥିବା ଫସଲର କ୍ଷତିପୂରଣ ପାଇବା ଆଶାରେ ବରଗଡ ଜିଲ୍ଲାପାଳଙ୍କ ନିକଟକୁ ଆସିଥିଲେ । ବରଗଡ ଜିଲ୍ଲାପାଳ ଚାଷୀମାନଙ୍କ ସହିତ ଆଲୋଚନା କଲାପରେ ସମସ୍ତ ବ୍ୟାଙ୍କ ଅଧିକାରୀ ଓ ବୀମା କମ୍ପାନୀ ମାନଙ୍କସହିତ ବୈଠକ କରିଥିବା ବେଳେ ଅନ୍ୟ ତାରିଖ ଦେଇ ଏହାର ଫଇସଲା କରାଯିବ ବୋଲି ଚାଷୀଙ୍କୁ ଜଣାଇଛନ୍ତି ।
ପ୍ରଧାନମନ୍ତ୍ରୀ ଫସଲ ଯୋଜନାରେ ଚାଷୀ ତାର ବୀମା ପ୍ରିମିୟମ ପୂର୍ବରୁ ପଇଠ କରୁଥିବା ବେଳେ ଫସଲରେ କ୍ଷତି ହେଲେ ଚାଷୀମାନେ କ୍ଷତିପୂରଣ ବାବଦକୁ ବୀମା ରାଶି ପାଇପାରୁନାହି । ବୀମା କମ୍ପାନୀ ରାଜନେତା ଓ ଜିଲ୍ଲା ପ୍ରଶାସନର ମଧୁଚନ୍ଦ୍ରିକା ଯୋଗୁଁ ବୀମା କମ୍ପାନୀ ଚାଷୀଙ୍କୁ ଠକି ଚାଲିଛି ଏବଂ ଜିଲ୍ଲାର ଚାଷୀ ମାନେ ନିଜର ଅଧିକାରରୁ ବଞ୍ଚିତ ରହିଜାଉଥିବା ଚାଷୀମାନେ ଅଭିଯୋଗ କରିଛନ୍ତି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
