ବରଗଡ: ଲଗାତାର ତିନିଦିନ ହେବ ଜିଲ୍ଲାରେ ତୁହାକୁ ତୁହା ବର୍ଷା । ଜନଜୀବନ ଅସ୍ତବ୍ୟସ୍ତ । ପ୍ରବଳ ବର୍ଷା ଲାଗି ଗତକାଲି(ମଙ୍ଗଳବାର) ଜିଲ୍ଲାର ସମସ୍ତ ଶିକ୍ଷାନୁଷ୍ଠାନ ବନ୍ଦ ଥିବାବେଳେ ଆଜି(ବୁଧବାର) ବର୍ଷାକୁ ଦୃଷ୍ଟିରେ ରଖି ପୁଣି ଛୁଟି ଘୋଷଣା କରିଛି ଜିଲ୍ଲା ପ୍ରଶାସନ ।
ଜିଲ୍ଲାର ଅନେକ ଗାଁ ପାଣି ଘେରରେ ଥିବାବେଳେ ବହୁ ମାଟି ଓ ଚାଳ ଘର ଭାଙ୍ଗିଯାଇଛି । ଏମାନଙ୍କୁ ରିଲିଫ୍ ଯୋଗାଇବା ଲାଗି ବିଦ୍ୟାଳୟରେ ବ୍ୟବସ୍ଥା କରାଯାଇଥିବାରୁ ସମସ୍ତ ଶିକ୍ଷକ-ଶିକ୍ଷୟତ୍ରୀ ଉପସ୍ଥିତ ରହିବେ ବୋଲି ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।
ଅନ୍ୟପଟେ ବିଭିନ୍ନ ସ୍ଥାନରେ ପୋଲ ଓ ବ୍ରିଜ ଗୁଡିକ ଉପରେ ବନ୍ୟାପାଣି ପ୍ରବାହିତ ହେବାରୁ ଯାତାୟାତ ଠପ ହୋଇଯାଇଛି । ବରଗଡରୁ ବଲାଙ୍ଗୀର ବସ ଚଳାଚଳ ବନ୍ଦ ରହିଥିବାବେଳେ ଟ୍ରେନ ଚଳାଚଳ ମଧ୍ୟ ବନ୍ଦ ରହିଛି । ବରପାଲି ନିକଟରେ ରେଳ ଧାରଣା ତଳୁ ମାଟି ଧୋଇହୋଇଯାଇଥିବାରୁ ବରଗଡ-ବଲାଙ୍ଗିର ଦେଇ ଟ୍ରେନ ଚଳାଚଳ ସମ୍ପୂର୍ଣ ବନ୍ଦ ରହିଛି ।
ଆଜି (ବୁଧବାର) ସକାଳ ୭ ଟା ସୁଦ୍ଧା ବରଗଡ ଜିଲ୍ଲାର ସମସ୍ତ ବ୍ଲକରେ ସମୁଦାୟ ୧୩୫୦ ମିଲିମିଟର ବର୍ଷା ହୋଇଥିବାବେଳେ ସୋହେଲା ବ୍ଲକରେ ସର୍ବାଧିକ ୧୯୭ ମିଲିମିଟର ଏବଂ ଭଟଲି ବ୍ଲକରେ ସର୍ବନିମ୍ନ ୬୬ ମିଲିମିଟର ବର୍ଷା ରେକର୍ଡ କରାଯାଇଛି ।
ବରଗଡରୁ ରାଜେଶ ସରାପ୍, ଇଟିଭି ଭାରତ
