ବରଗଡ଼: ଚାଷୀଙ୍କ ମୁହଁରୁ ହଜିଯାଇଛି ହସ । ମୌସୁମୀ ଆସି ଅସରାଏ ବର୍ଷିଦେଇ ଚାଲିଯାଇଛି ଯେ ଆଉ ଦେଖାନାହିଁ । ମୌସୁମୀର ପ୍ରଥମ ବର୍ଷାରେ ଚାଷୀ ଖୁସିରେ ତା ବିଲରେ ଚାଷକାମ ଆରମ୍ଭ କରିଦେଇଥିଲା । ହେଲେ ମୌସୁମୀ ହଜିଯିବା ସାଙ୍ଗକୁ ଚାଷୀ ମୁହଁରୁ ମଧ୍ୟ ହଜିଯାଇଛି ହଶ ଏବଂ ବର୍ଷା ଆଶାରେ ଅନାଇ ରହିଛି ଆକାଶକୁ ।
ଆକାଶରେ ନା ମେଘ ଅଛି ନା ଅଛି ବର୍ଷା ଫଳରେ ଚାଷୀର ଫସଲ ଉଜୁଡିବସିଲାଣି । ବରଗଡ଼ ଜିଲ୍ଲାର ବହୁ ସ୍ଥାନରେ ମରୁଡ଼ି ପରିସ୍ଥିତି ଉପୁଜିଲାଣି । ଶ୍ରାବଣ ମାସରେ ମାଟି ଫାଟି ଆଁ କରିବାକୁ ଲାଗିଲାଣି । ଧାନ ତଳି ସବୁ ବର୍ଷା ଅଭାବରେ ମରିଗଲାଣି । ପଦ୍ମପୁର , ପାଇକମାଲ , ଗାଇସିଲେଟ , ସୋହେଲା ଓ ଭଟଲି ବ୍ଲକର ବହୁ ଅଞ୍ଚଳରେ ଏପରି ପରିସ୍ଥିତି ଉପୁଜିଲାଣି ।
ଏବେ ବର୍ଷା ହେଲେ ମଧ୍ୟ ଚାଷୀ ତାର ଫସଲ ବଞ୍ଚାଇପାରିବ ନା ନାହିଁ ତାହା ସନ୍ଦେହ ରହିଛି କିନ୍ତୁ ତଥାପି ମଧ୍ୟ ଚାଷୀ ବର୍ଷା ପାଇଁ ଭଗବାନ ଭରଷାରେ ରହିଛି ।ବରଗଡ଼ ଜିଲ୍ଲାର ଚାଷୀ ବର୍ତ୍ତମାନ ଭଗବାନ ଭରଷାରେ ରହିଥିବା ବେଳେ ଆଉ ଆଠ ଦିନ ମଧ୍ୟରେ ବର୍ଷା ନହେଲେ ଜିଲ୍ଲାରେ ଚଳିତ ବର୍ଷ ମରୁଡ଼ି ଜନିତ ସମ୍ପୂର୍ଣ୍ଣ ଫସଲ ନଷ୍ଟ ହେବାର ସମ୍ଭାବନା ରହିଛି ।
ବରଗଡରୁ ରାଜେଶ ସରାପ,ଇଟିଭି ଭାରତ
