ବରଗଡ: ଚାଷୀଙ୍କ ପାଇଁ କାଳ ସାଜିଲା କାଳବୈଶାଖୀ । ଗୋଟିଏ ସପ୍ତାହ ମଧ୍ୟରେ ଦୁଇଦୁଇଥର ଅଦିନିଆ ବର୍ଷା ସହିତ କୁଆପଥର ମାଡରେ ଓଡିଶାର ଭାତହାଣ୍ଡି କୁହାଯାଉଥିବା ବରଗଡ ଜିଲ୍ଲାର ଚାଷୀଙ୍କ ଆର୍ଥିକ ମେରୁଦଣ୍ଡ ଭାଙ୍ଗି ଦେଇଛି । ଚଳିତ ରବି ଫସଲରେ ଭଲ ଧାନ ଫସଲ ହୋଇଥିଲା ଏବଂ ସୁନାର ଫସଲ ଦେଖି ଚାଷୀ ମନରେ ବେଶ ଖୁଶି ଅନୁଭବ କରୁଥିଲା ମାତ୍ର ସବୁ ଫସର ଫାଟିଗଲା । ସବୁକିଛି ଉଜାଡି ଦେଇଛି କାଳବୈଶାଖୀ ।
ଚାଷୀର 6 ମାସର ପରିଶ୍ରମ ବୃଥା ହୋଇଯାଇଛି । ଯେଉଁ ବିଲକୁ ଦେଖିଲେ ସବୁଜ ରଙ୍ଗରେ ଝଲସି ଯାଉଛି ଧାନଗଛ ମାତ୍ର ଧାନ ଗଛରେ ନାହିଁ ଧାନ । ଧାନ କେଣ୍ଡାରୁ ସବୁତକ ଧାନଝଡି ପଡିଛି ତଳେ । କେଉଁ ଚାଷୀ ମୁଣ୍ଡରେ ହାତ ଦେଇ ନିଜ ବିଲରେ ବସିଛି ତ ଆଉ କେଉଁ ଚାଷୀ ନିଜ ବିଲର ଏହି ଅବସ୍ଥା ଦେଖିବା ପରେ ନିରାଶ ହୋଇ ଆଉ ବିଲକୁ ଆସୁନାହି । ଚାଷୀ ଆଣିଥିବା ଋଣ କିପରି ପରିଶୋଧ କରିବ ଏବେ ଚାଷୀକୁ ସେହି ଚିନ୍ତା ଘାରିଥିବା ବେଳେ ଚାଷୀ ମାନଙ୍କ ପାଇଁ ଏବେ ଏକ ମାତ୍ର ସାହା ହୋଇ ରହିଛି ଫସଲ ବୀମାର କ୍ଷତିପୂରଣ ।
ସୂଚନା ଅନୁଯାୟୀ, ଜିଲ୍ଲାରେ ଗତ 22 ତାରିଖ ସନ୍ଧ୍ୟାରେ କାଳବୈଶାଖୀର କରାଳ ରୂପ ଦେଖିବାକୁ ମିଳିଥିଲା । ଝଡବର୍ଷା ସାଙ୍ଗକୁ କୁଆପଥର ବୃଷ୍ଟି ହୋଇଥିଲା ଯାହାଫଳରେ ଚାଷୀଙ୍କ ଫସଲ ଉଜୁଡି ଯାଇଛି। ବରଗଡ ଜିଲ୍ଲାର ଅତାବିରା , ବରଗଡ଼, ବରପାଲି, ବିଜେପୁର ବ୍ଲକର ବିଭିନ୍ନ ଗ୍ରାମରେ ଏହାର ପ୍ରଭାବ ଅଧିକ ରହିଥିଲା । ଫଳରେ ସମ୍ପୃକ୍ତ ଅଞ୍ଚଳରେ ଧାନ ଫସଲ ପ୍ରଭାବିତ ହୋଇପଡିଥିଲା । କେଣ୍ଡାରୁ ଧାନ ଝଡି ପଡି ନଷ୍ଟ ହୋଇଯାଇ ଥିବା ବେଳେ ପନିପରିବା ଫସଲ ମଧ୍ୟ ପ୍ରଭାବିତ ହୋଇଥିଲା ।
ସେହିପରି ଦୁଇ ଦିନପରେ ପୁଣି ଗତକାଲି 25 ତାରିଖରେ କାଳବୈଶାଖୀ ତାର କରାଳ ରୂପ ଦେଖାଇଥିଲା । କୁଆପଥର ମାଡ ସହିତ ବ୍ୟାପକ ବର୍ଷା ପୁଣି ଚାଷୀ ପାଇଁ କାଳ ହୋଇପଡିଛି । ଗତକାଲି ର ଅଦିନିଆ ବର୍ଷା ଓ କୁଆପଥର ମାଡରେ ବିଶେଷ କରି ଭଟଲି ବ୍ଲକର ଚାଷୀମାନେ ପ୍ରଭାବିତ ହୋଇଛନ୍ତି । ଭଟଲି ବ୍ଲକର ନୂଆପାଳି , ଛଡେଇ ଗାଁ , ଭୁଲିଆ ଡ଼ିହି , ଅନ୍ତପାଳୀ , କର୍ଳା ଜୁରୀ , କମଗାଁ ଆଦି ଅଞ୍ଚଳରେ ବ୍ୟାପକ କୁଆପଥର ମାଡ ହୋଇଥିବା ବେଳେ ଧାନ ଗଛରେ ଆଦୌ ଧାନ ନାହିଁ । ଚଳିତ ରବି ଋତୁରେ ଗୋଟେ ଏକରରେ 40 ବସ୍ତା ଧାନ ଅମଳ ହେବାର ଆଶା କରିଥିବା ଚାଷୀ ଏବେ ଦୁଇ ବସ୍ତା ଧାନ ମଧ୍ୟ ସଂଗ୍ରହ ହେବାର ଆଶା ରଖିନାହିଁ ।
ସେହିପରି କିଛି ଦିନ ତଳେ ଅଜଣା ରୋଗ ପୋକ କାରଣରୁ ଧାନ ଫସଲରେ ବହୁ ଖର୍ଚ୍ଚ କରି ଫସଲ ବଞ୍ଚାଇବାରେ ସଫଳ ହୋଇଥିଲା ଚାଷୀ। ମାତ୍ର ବର୍ତ୍ତମାନ କାଳବୈଶାଖୀ ସମସ୍ତ ଫସଲ ଉଜାଡି ଦେଇ ଚାଷୀ ପାଇଁ କାଳ ହୋଇପଡିଛି । କେବଳ ଯେ ଧାନ ଚାଷୀଙ୍କ କଥା ନୁହେଁ ପନିପରିବା ଚାଷୀ ମାନଙ୍କର ଫସଲ ମଧ୍ୟ ବହୁ ମାତ୍ରାରେ କ୍ଷତି ହୋଇଛି | ପୋଟଳ , ଟମାଟୋ , ବାଇଗଣ , ଭେଣ୍ଡି , ଆଦି ବହୁ ପନିପରିବା କୁଆପଥର ମାଡରେ ନଷ୍ଟ ହୋଇପଡିଛି | ତେବେ ଅନେକ ଚାଷୀ ଫସଲବୀମା କରିଥିବା ବେଳେ ଅଧିକାଂଶ ଚାଷୀ ଫସଲବୀମା କରିନାହାନ୍ତି | ତେବେ ବୀମାକରିଥିବା ଚାଷୀ ମାନେ ମଧ୍ୟ କ୍ଷତିପୂରଣ ପାଇବେ ନାଁ ନାହି ସେନେଇ ସନ୍ଦେହରେ ରହିଥିବା ବେଳେ ଫସଲବୀମା କରିନଥିବା ବହୁ ଚାଷୀ ଆଜି ଜିଲ୍ଲାପାଳ ଅଫିସକୁ ଆସି ସହାୟତା ପାଇଁ ଦାବି କରିଛନ୍ତି | ତେବେ ଜିଲ୍ଲା ପ୍ରଶାସନ ପକ୍ଷରୁ କ୍ଷେତ୍ର ପ୍ରଦର୍ଶନ କରାଯାଇ କ୍ଷୟକ୍ଷତି ର ଆକଳନ କରାଯାଉଥିବା ବେଳେ ଚାଷୀଙ୍କ ବର୍ତ୍ତମାନର ସାଂଘାତିକ ସ୍ଥିତିରେ ବରଗଡ ଜିଲ୍ଲା ପ୍ରଶାସନ ବରଗଡର ଚାଷୀଙ୍କୁ କିପରି ଉଦ୍ଧାର କରୁଛି ତାହା ଦେଖିବାକୁ ବାକି ରହିଲା |
ଇଟିଭି ଭାରତ, ବରଗଡ
