ବରଗଡ: ପଦ୍ମପୁର ଉପନିର୍ବାଚନ ପାଇଁ ଜୋରଦାର ଚାଲିଛି ପ୍ରଚାର । ସବୁ ଦଳର ନେତା ଓ କର୍ମୀ ନିଜର ପ୍ରାର୍ଥୀ ପାଇଁ ଆରମ୍ଭ କରିଦେଇଛନ୍ତି ପ୍ରଚାର । ସରଗରମ ହୋଇପଡିଛି ପୁରା ପଦ୍ମପୁର ନିର୍ବାଚନ ମଣ୍ଡଳୀ । ତେବେ ନିର୍ବାଚନୀ ପ୍ରଚାରରେ ବିଜେଡି ଓ ବିଜେପି ଦଳ ଦିନ ରାତି ଏକ କରୁଥିବାବେଳେ, କଂଗ୍ରେସ ସାମାନ୍ୟ ପଛରେ ପଡିଯାଇଥିବା କୁହାଯାଉଛି । ବିଜେଡିର ପ୍ରାର୍ଥିନୀ ବର୍ଷା ସିଂ ବରିହା ମହିଳାମାନଙ୍କ ସହିତ ଗାଁକୁ ଗାଁ ଯାଇ ପ୍ରଚାରକୁ ଜୋରଦାର କରିଛନ୍ତି ।
ଅନ୍ୟପଟେ ରାଜ୍ୟର ଅନ୍ୟ ତୁଙ୍ଗ ନେତାମାନେ ସାଧାରଣ ସଭା ମାଧ୍ୟମରେ ଭୋଟରଙ୍କୁ ଆକୃଷ୍ଟ କରିବାକୁ ପ୍ରୟାସ କରୁଛନ୍ତି । ବିଜେଡି ପ୍ରାର୍ଥୀନି ଓ ବିଜେପି ପ୍ରାର୍ଥୀଙ୍କ ମଧ୍ୟରେ ଚାଲିଛି ପ୍ରଚାର ପ୍ରତିଯୋଗୀତା । ବର୍ଷା ଦିଂଗବତ ବିଧାୟକ ବାପାଙ୍କ ପରି ତାଙ୍କୁ ମଧ୍ୟ ଆପଣାଇବାକୁ କହି କାନ୍ଦୁଥିବାବେଳେ, ଗରିବଙ୍କ ଘରେ ବୁଢୀ ମାଉସୀଙ୍କ ହାତରୁ ପଖାଳ ଖାଇ ଆର୍ଶୀବାଦ ଭିକ୍ଷା କରୁଥିବା ନଜର ଆସିଛନ୍ତି ।
ତେବେ ବର୍ଷାଙ୍କ ଏପରି ପ୍ରଚାର ପ୍ରସାରକୁ ବିଜେପି ଓ କଂଗ୍ରେସ ଦଳ ଡ୍ରାମା କହି ସୋସିଆଲ ମିଡିଆରେ ଟ୍ରୋଲ କରୁଥିବାବେଳେ, ବିଜେପି ଦଳର ପ୍ରାର୍ଥୀ ପ୍ରଦୀପ ପୁରୋହିତ ମଧ୍ୟ ଗାଁ ଗାଁ ଯାଇ କେଉଁଠି ଆଦିବାସୀ ଗୀତ ଓ ନାଚ ତ ଆଉ କେଉଁଠି କୁନି କୁନି ପିଲାଙ୍କୁ କାନ୍ଧରେ ବୋହି ଗ୍ରାମବାସୀଙ୍କ ହୃଦୟ ଜିଣିବାକୁ ଚେଷ୍ଟା କରୁଛନ୍ତି । ତେବେ କେବଳ ନିର୍ବାଚନ ସମୟରେ ଦେଖାଯାଉଥିବା ନେତାଙ୍କ ଏପରି ପ୍ରଚାର ପ୍ରସାରକୁ ସୋସିଆଲ ମିଡିଆରେ ଲୋକେ ଉପଭୋଗ କରୁଥିବାବେଳେ କିଛି ଲୋକ ଖୁବ ମଜାକ ମଧ୍ୟ ଉଡାଉଛନ୍ତି ।
ଇଟିଭି ଭାରତ, ବରଗଡ
