ଭୁବନେଶ୍ବର: ବରଗଡ ରୋଡ ଷ୍ଟେସନରୁ ଭାୟା ପଦ୍ମପୁର ଦେଇ ନୂଆପଡା ରେଳ ଷ୍ଟେସନ ଯାଏଁ ନୂତନ ରେଳଲାଇନ ପ୍ରକଳ୍ପ (Bargarh Road Nuapada New Rail Line Project) କୁ କେନ୍ଦ୍ର ସରକାର ମଞ୍ଜୁର କରିସାରିଛନ୍ତି । ଏହା କହି ଭାରତୀୟ ଜନତା ପାର୍ଟି ପଦ୍ମପୁରବାସୀଙ୍କୁ ବାରମ୍ବାର ଭୁଆଁ ବୁଲାଇ ଚାଲିଛି । ୨୦୧୮ ଡିସେମ୍ବର ୧୫ ତାରିଖରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ପ୍ରକଳ୍ପ କେନ୍ଦ୍ର ସରକାରଙ୍କ ଅନୁମୋଦନ ଲାଭ କରିସାରିଛି ବୋଲି ଘୋଷଣା ପ୍ରହେଳିକା ଥିଲା । ଆଜି ବରଗଡ ସାଂସଦ ସୁରେଶ ପୂଜାରୀ ପରୋକ୍ଷରେ ସ୍ୱୀକାର କରିଛନ୍ତି । ଏହି ପ୍ରକଳ୍ପ ୨୦୨୧ ଡିସେମ୍ବର ମାସରେ କେନ୍ଦ୍ର ସରକାରଙ୍କ ଅନୁମୋଦନ ପାଇଛି ବୋଲି ସାଂସଦ କହିବା ପରେ ଏହାକୁ ନେଇ ଦ୍ୱନ୍ଦ୍ୱ ଆହୁରି ବଢିଛି । ପ୍ରକୃତରେ ଏହି ପ୍ରକଳ୍ପ କାର୍ଯ୍ୟକାରୀ କରିବା ପାଇଁ କେନ୍ଦ୍ର ସରକାର କୌଣସି ପଦକ୍ଷେପ ନ ନେଇ କେବଳ ଭ୍ରମିତ କରି ଚାଲିଛନ୍ତି ବୋଲି ବିଜୁ ଜନତା ଦଳ ପକ୍ଷରୁ ଅଭିଯୋଗ କରାଯାଇଛି ।
ସାମ୍ବାଦିକ ସମ୍ମିଳନୀରେ ଏହି ପ୍ରସଙ୍ଗ ଉପରେ ସବିଶେଷ ସୂଚନା ଦେଇଛନ୍ତି ବିଜେଡି ସାଂସଦ ଡ. ସସ୍ମିତ ପାତ୍ର । ସେ କହିଛନ୍ତି ଯେ ପଦ୍ମପୁର ରେଳଲାଇନ ପ୍ରକଳ୍ପ ୨୦୧୮ ଡିସେମ୍ବରରେ ଅନୁମୋଦନ ଲାଭ କଲା ନା ୨୦୨୧ ଡିସେମ୍ବରରେ, ତାହା ପ୍ରଥମେ ସାଂସଦ ସ୍ପଷ୍ଟ କରିବା ଉଚିତ । କାରଣ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନା ସାଂସଦ ମଧ୍ୟରୁ କିଏ ସତ କହୁଛନ୍ତି, ତାହା ଜାଣିବାର ଅଧିକାର ପଦ୍ମପୁରବାସୀଙ୍କର ଅଛି । ଯଦି ସାଂସଦ ସତ କହୁଥାନ୍ତି, ତେବେ କେନ୍ଦ୍ରମନ୍ତ୍ରୀ ୨୦୧୮ରେ ଏହି ରେଳଲାଇନ ପ୍ରକଳ୍ପ ଅନୁମୋଦନ ପାଇସାରିଛି ବୋଲି ଯେଉଁ ଭୁଲ ତଥ୍ୟ ଦେଇ ପଦ୍ମପୁରବାସୀଙ୍କୁ ଭୁଆଁ ବୁଲାଇଥିଲେ, ସେଥିପାଇଁ ସେ କ୍ଷମା ମାଗିବା ଉଚିତ ।
ଏହାଛଡ଼ା ପଦ୍ମପୁର ରେଳଲାଇନ ରେଳବାଇର ବ୍ଲୁ ବୁକରେ ସ୍ଥାନ ପାଇଛି ବୋଲି ସାଂସଦ ଦେଇଥିବା ସୂଚନା ଉପରେ ମଧ୍ୟ ଡ. ପାତ୍ର ସ୍ପଷ୍ଟୀକରଣ ରଖିଛନ୍ତି । ଡ.ପାତ୍ର କହିଛନ୍ତି ଯେ, ସୁରେଶ ପୂଜାରୀ ଜଣେ ଅଭିଜ୍ଞ ସାଂସଦ । ସେ ଏ କଥା ଜାଣିବା ଉଚିତ ଯେ ଦେଶର କୌଣସି ରେଳ ପ୍ରକଳ୍ପ ପାଇଁ ଅର୍ଥ ମଞ୍ଜୁର ହେଲେ ଏହା ବ୍ଲୁ ବୁକ୍ ନୁହେଁ, ପିଙ୍କ ବୁକରେ ସ୍ଥାନ ପାଏ । ଭାରତୀୟ ରେଳବାଇ ପକ୍ଷରୁ ପ୍ରକାଶିତ ୨୦୨୨-୨୩ ପିଙ୍କ ବୁକରେ କେଉଁଠି ମଧ୍ୟ ପଦ୍ମପୁର ରେଳଲାଇନ ପ୍ରକଳ୍ପ ସଂପର୍କରେ ଉଲ୍ଲେଖ ନାହିଁ । ଯେତେବେଳେ ଏହି ପ୍ରକଳ୍ପ ପିଙ୍କ ବୁକରେ ସ୍ଥାନ ପାଇ ନାହିଁ ଏବଂ ଏଥିପାଇଁ କୌଣସି ଅର୍ଥ ମଞ୍ଜୁର ହୋଇନାହିଁ ।
ସେତେବେଳେ ପ୍ରକଳ୍ପ ପାଇଁ ଜମି ଅଧିଗ୍ରହଣ ଆରମ୍ଭ ହେବା ଉଚିତ ବୋଲି ସାଂସଦ କହିବା ହାସ୍ୟାସ୍ପଦ ଏବଂ ଦୁଃଖଦାୟକ । କେନ୍ଦ୍ର ସରକାରଙ୍କ ରେଳ ମନ୍ତ୍ରଣାଳୟ ଏହି ପ୍ରକଳ୍ପ ପାଇଁ କୌଣସି ଅର୍ଥ ମଞ୍ଜୁର କରି ନଥିବାବେଳେ ରାଜ୍ୟ ସରକାରଙ୍କୁ ଏହାର ସର୍ଭେ କରିବା କଥା କହି ମୁଣ୍ଡ ଉପରୁ ଦୋଷ ଖସାଇବାକୁ ଉଦ୍ୟମ କରୁଛି ବୋଲି ସସ୍ମିତ ଅଭିଯୋଗ କରିଛନ୍ତି ।
ଏହାବି ପଢନ୍ତୁ- ଭାରତ ଅନ୍ତର୍ଜାତୀୟ ବାଣିଜ୍ୟ ମେଳା, ସପ୍ତମ ଦିନରେ ଖଚାଖଚ ଭିଡ
ଏଥିରୁ ସ୍ପଷ୍ଟ ଜଣାପଡୁଛି ଯେ ପଦ୍ମପୁରବାସୀ କେନ୍ଦ୍ରର ବିଜେପି ସରକାରଙ୍କ ଦ୍ୱାରା ଅବହେଳାର ଶିକାର ହୋଇଥିବା କଥା ପଦାରେ ପଡ଼ିଯିବା ପରେ, ବିଜେପି ଏହା ଲୁଚାଇବାକୁ ଉଦ୍ୟମ କରୁଛି । ତେଣୁ ଏହି ପ୍ରକଳ୍ପ ପାଇଁ ଅର୍ଥ ମଞ୍ଜୁର କରିବାରେ ବିଳମ୍ବ କରିବା ସହ ପଦ୍ମପୁରବାସୀଙ୍କୁ ଅଣଦେଖା କରିବାରେ ଭାରତୀୟ ଜନତା ପାର୍ଟି ସଂପୂର୍ଣ୍ଣ ଭାବେ ଦାୟୀ ନୁହେଁ କି ବୋଲି ଡ. ପାତ୍ର ପ୍ରଶ୍ନ କରିଛନ୍ତି । ସେ ଆହୁରି କହିଛନ୍ତି ଯେ, ଖୁସିର କଥା ଏହି ପ୍ରସଙ୍ଗରେ ପଦ୍ମପୁରରେ ଖୋଲା ବିତର୍କ ପାଇଁ ସାଂସଦ ନିମନ୍ତ୍ରଣ କରିଛନ୍ତି । ବିଜୁ ଜନତା ଦଳ ନିଶ୍ଚିତ ଭାବେ ଖୋଲା ବିତର୍କ ପାଇଁ ତାଙ୍କୁ ଆମନ୍ତ୍ରଣ କରିବ । ଯେତେବେଳେ ସାଂସଦ ସ୍ୱୀକାର କରିବେ ଯେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ୨୦୧୮ରେ ଏହି ପ୍ରକଳ୍ପ ଅନୁମୋଦିତ ହୋଇଥିଲା ବୋଲି ଯାହା କହିଥିଲେ, ତାହା ଭୁଲ ଥିଲା ।
ଇଟିଭି ଭାରତ, ଭୁବନେଶ୍ବର
