ବରଗଡ: ଭିଜିଲାନ୍ସ ଜାଲରେ ସରକାରୀ ଅଧିକାରୀ । 5 ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରାପଡ଼ିଛନ୍ତି ବରଗଡ଼ ସ୍ବାସ୍ଥ୍ୟ ବିଭାଗର ଜିଲ୍ଲା ଜନସ୍ବାସ୍ଥ୍ୟ ଅଧିକାରୀ ଚୁଲବତୀ ସାହୁ । ଜଣଙ୍କୁ ହୋଟେଲ ପାଇଁ ଫୁଡ଼ ଲାଇସେନ୍ସ କରେଇ ଦେବାକୁ 5 ହଜାର ଟଙ୍କା ଲାଞ୍ଚ ନେଉଥିବା ସମୟରେ ଭିଜିଲାନ୍ସ ଜାଲରେ ଫସିଯାଇଛନ୍ତି ଚୁଲବତୀ ସାହୁ । ପୂର୍ବରୁ ତାଙ୍କ ନାମରେ ବହୁ ଅଭିଯୋଗ ଆସୁଥିବା ସୂଚନା ଦେଇଛନ୍ତି ବରଗଡ଼ ଭିଜିଲାନ୍ସ ବିଭାଗ ।
ସୂଚନା ଅନୁଯାୟୀ ଭେଡେନ ଥାନା ଅନ୍ତର୍ଗତ ପପଙ୍ଗା ଠାରେ ହୋଟେଲ୍ କରିବା ପାଇଁ ହୃଷିକେଶ ପ୍ରଧାନ ନାମକ ଜଣେ ବ୍ୟକ୍ତି ଫୁଡ଼ ଲାଇସେନ୍ସ ନେଇ ଆବେଦନ କରିଥିଲେ । ମାତ୍ର ଲାଇସେନ୍ସ ଅନୁମତି ଦେବା ପାଇଁ ଜିଲ୍ଲା ଜନ ସ୍ବାସ୍ଥ୍ୟ ଅଧିକାରୀ 5000 ଟଙ୍କା ଲାଞ୍ଚ ମାଗିଥିଲେ। ହୃଷିକେଶ ପ୍ରଧାନ ଭିଜିଲାନ୍ସ ବିଭାଗର ଦ୍ବାରସ୍ଥ ହୋଇ ଏକ ଲିଖିତ ଅଭିଯୋଗ କରିଥିଲେ । ପୂର୍ବ ଯୋଜନା ମୁତାବକ 5000 ଟଙ୍କା ନେଉଥିବା ସମୟରେ ଭିଜିଲାନ୍ସ ହାତରେ ଧରାପଡ଼ିଥିଲେ ଚୁଲାବତୀ ।
ବରଗଡ଼ ଭଟଲି ଛକ ନିକଟସ୍ଥ ଶ୍ରୀକୁଞ୍ଜ ଆପାର୍ଟମେଂଟର ଫ୍ଲାଟ ନମ୍ବର 203 ରେ ନିଜ ବାସଭବନରେ ସେ ଟଙ୍କା ନେଉଥିବା ସମୟରେ ଧରାପଡ଼ିବା ପରେ ତାଙ୍କ ବିରୋଧରେ ଭିଜିଲାନ୍ସ ପକ୍ଷରୁ ଏକ ମାମଲା (ନଂ-୧୭/୨୨) ରୁଜୁ ହୋଇଛି । ଘରେ ଏବଂ ତାଙ୍କ ଅଫିସରେ ଭିଜିଲାନ୍ସ ବିଭାଗ ଚଢ଼ାଉ ଜାରି ରହିଛି । ଘଟଣାକୁ ଅସ୍ବୀକାର କରିଛନ୍ତି ତାଙ୍କୁ ଫସାଇ ଦେବାକୁ ଚେଷ୍ଟା ହୋଇଥିବା କହିଛନ୍ତି ଡିପିଏଚଓ । ଏ ଦିଗରେ ଭିଜିଲାନ୍ସକୁ ସମ୍ପୂର୍ଣ୍ଣ ସହଯୋଗ କରିବା କଥା କହିଛନ୍ତି ଚୁଲବତୀ ।
ବରଗଡରୁ ରାଜେଶ ସରାପ,ଇଟିଭି ଭାରତ
