ବରଗଡ: ଯାନବାହନକୁ ନେଇ ସରକାରଙ୍କ ପରିବର୍ତ୍ତିତ ନୂତନ ନିୟମ ଏବେ ଲୋକଙ୍କ ପାଇଁ ମୁଣ୍ଡ ବ୍ୟଥାର କାରଣ ହୋଇଥିବା ବେଳେ ବରଗଡ ଆମ ଆଦମି ପାର୍ଟି ପକ୍ଷରୁ ରାଜ୍ୟ ପରିବହନ କମିଶନରଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି । ରାତାରାତି ଘୋଷଣା କରାଯାଇଥିବା ନୂତନ ଆଇନରେ କାଗଜ ପତ୍ର ଯାଞ୍ଚ ପାଇଁ ଜନସାଧାରଣଙ୍କୁ ଅତିକମରେ ୬ ମାସର ସମୟ ଧାର୍ଯ୍ୟ କରାଯାଉ ବୋଲି ଦାବି ରହିଛି । ସହ ଜନସଚେତନତା କରିବା ସହିତ ପ୍ରତ୍ୟେକ ବ୍ଲକରେ କାର୍ଯ୍ୟାଳୟ ଖୋଲାଯାଇ କାଗଜ ପତ୍ର ତିଆରି ପାଇଁ ବ୍ୟବସ୍ଥା କରାଯାଉ ବୋଲି ଦାବି କରିଛି ଆପ୍ ।
ପରିବର୍ତ୍ତିତ ମୋଟର ଆକ୍ଟ ୨୦୧୯କୁ ଦେଶର ୬ ଗୋଟି ରାଜ୍ୟର ସରକାର ଆପତ୍ତି କରିଥିବା ବେଳେ ପଡୋଶୀ ଛତତିଶଗଡ଼ ରାଜ୍ୟରେ ମଧ୍ୟ ଏହି ନିୟମ ଲାଗୁ କରାଯାଇନାହିଁ । ସେପ୍ଟେମ୍ବର ୧ ତାରିଖଠାରୁ ସାରା ଦେଶରେ ଲାଗୁ କରାଯାଇଥିବା ଏହି ନୂଆ ସଡ଼କ ପରିବହନ ଆଇନରେ ଟ୍ରାଫିକ୍ ନିୟମ ଅବମାନନା କଲେ ଏଣିକି ୧୦ ଗୁଣା ଅଧିକ ଫାଇନ୍ ଦେବାକୁ ପଡ଼ୁଛି । ତେବେ ଓଡିଶାରେ ମଧ୍ୟ ଏହି ଆଇନକୁ କଡାକଡି ଭାବେ ପାଳନ କରାଯାଉଥିବା ବେଳେ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି । ଲୋକଙ୍କ ଗାଡିର ଦାମରୁ ଅଧିକ ହେଉଛି ଫାଇନ । ଯାହାକୁ ନେଇ ଲୋକଙ୍କ ମଧ୍ୟରେ ଅଶାନ୍ତି ସୃଷ୍ଟି ହୋଇଥିବା ବେଳେ ଲୋକେ ଭୟରେ ଗାଡି ବାହାର କରୁନାହାନ୍ତି । ବରଗଡ ପରିବହନ ବିଭାଗ ପକ୍ଷରୁ ସେପ୍ଟେମ୍ବର ୧ ତାରିଖରୁ ଆଜି ପର୍ଯ୍ୟନ୍ତ ୧୦ ଲକ୍ଷ ଟଙ୍କାରୁ ଅଧିକ ଅର୍ଥ ଫାଇନ ଆକାରରେ ଆଦାୟ କରାଯାଇଥିବା ଜଣାପଡିଛି ।
ବରଗଡ ଆମ ଆଦମି ପାର୍ଟି ଲୋକଙ୍କ ସୁରକ୍ଷା ପାଇଁ ଏହି ନିୟମକୁ ସ୍ଵାଗତ କରିଥିବା ବେଳେ ଜନସାଧାରଣଙ୍କୁ ବିଭିନ୍ନ କାଗଜ ପତ୍ର ସମ୍ପୂର୍ଣ କରିବା ପାଇଁ ଅତିକମରେ ୬ ମାସ ସମୟ ଦିଆଯାଉ ବୋଲି କହିଛି । ଏନେଇ ଆମ ଆଦମି ଦଳର ଆବାହକ ଭବାନୀ ସାହୁ , ଅମିତାଭ ପାତ୍ର , ଅସିତ ସାହୁ , ମେରିୟମ ବାର୍ଲ୍ଲା ଓ ମହମ୍ମଦ ଅଲିମ ଶନିବାର ବରଗଡ ପରିବହନ ଅଧିକାରୀଙ୍କୁ ଭେଟି ସ୍ମାରକ ପତ୍ର ପ୍ରଦାନ କରିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
