ବରଗଡ: ରାଜ୍ୟରେ କୋରୋନାର ପ୍ରକୋପ ଦ୍ରୁତଗତିରେ ବିସ୍ତାର ହେଉଥିବା ବେଳେ ଶିଶୁ ଓ ବୃଦ୍ଧ ମାନଙ୍କ ପାଇଁ ଏହି ସଂକ୍ରମଣ ଅଧିକ ହାନିକାରକ । ଏମିତି ସ୍ଥିତିରେ ବରଗଡ ଜିଲ୍ଲାରେ ସଂକ୍ରମିତ 74 ବର୍ଷୀୟ ବୃଦ୍ଧଙ୍କ ସ୍ବାସ୍ଥ୍ୟବସ୍ଥା ଗୁରୁତର ରହିଛି । ବର୍ତ୍ତମାନ ତାଙ୍କୁ ରାଉରକେଲା ସ୍ଥିତ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।
ସୂଚନାନୁସାରେ, ବରଗଡ ଜିଲ୍ଲାର କଟାପଳି ଗ୍ରାମର 74 ବର୍ଷୀୟ ବୃଦ୍ଧ କୋରୋନା ସଂକ୍ରମିତ ହୋଇଥିଲେ । ଚିକିତ୍ସା ପାଇଁ ତାଙ୍କୁ ବରଗଡ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ସେ ଭେଣ୍ଟିଲେଟରରେ ରହି ଚିକିତ୍ସିତ ହେଉଥିଲେ । କିନ୍ତୁ ଧୀରେ ଧୀରେ ତାଙ୍କ ସ୍ବାସ୍ଥ୍ୟବସ୍ଥା ବିଗିଡିବାକୁ ଗୁରୁବାର ରାତିରେ ତାଙ୍କୁ ରାଉରକେଲା ସ୍ଥିତ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ନେଇ ପ୍ରଶାସନ ପକ୍ଷରୁ ସୂଚନା ମିଳିଛି ।
ବୃଦ୍ଧ ଜଣଙ୍କ ନିଶ୍ଵାସ ପ୍ରଶ୍ଵାସ ନେବାରେ ଅସମର୍ଥ ହେଉଥିବା ବେଳେ ତାଙ୍କ ପରିବାରର ଆହୁରି ୩ ଜଣ ମଧ୍ୟ କୋରୋନା ସଂକ୍ରମିତ ହୋଇଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ