ବରଗଡ: ଆସନ୍ତା ୨୧ ରେ ବିଜେପୁର ଉପନିର୍ବାଚନ ଥିବା ବେଳେ ସମସ୍ତ ଦଳର ପ୍ରାର୍ଥୀ ମାନେ ବିଜେପୁର ନିର୍ବାଚନ ମଣ୍ଡଳୀରେ ମାଆ ଦୁର୍ଗାଙ୍କ ବିଭିନ୍ନ ପୂଜା ମଣ୍ଡପ ଗୁଡିକୁ ଯାଇ ଆଶୀର୍ବାଦ ଭିକ୍ଷା କରିବା ସହିତ ନିର୍ବାଚନରେ ବିଜୟ କାମନା କରୁଛନ୍ତି | ବିଜେପି , ବିଜେଡି ଅବା କଂଗ୍ରେସ ନିର୍ବାଚନରେ ବିଜୟୀ ହେବେ କେବଳ ଜଣେ, କିନ୍ତୁ ମାଆଙ୍କ ଠାରେ ସମସ୍ତ ପ୍ରାର୍ଥୀଙ୍କ ଗୋଟିଏ ଗୁହାରୀ ମାଆ ମତେ ବିଜୟୀ କର |
ଦଶହରାରେ ଚାରିଆଡେ ମାଆ ଦୁର୍ଗାଙ୍କ ପୂଜା ପାଇଁ ସରଗରମ ହୋଇଉଠିଥିବା ବେଳେ ବିଜେପୁର ନିର୍ବାଚନ ମଣ୍ଡଳୀରେ ଉପନିର୍ବାଚନ ପାଇଁ ନେତା ଓ ମନ୍ତ୍ରୀଙ୍କ ଗହଣରେ ହୋଇପଡିଛି ଚଳଚଞ୍ଚଳ | ସମସ୍ତ ଦଳର ନେତା ଓ ମନ୍ତ୍ରୀଙ୍କ ଗତାଗତ ବିଜେପୁର ଅଞ୍ଚଳକୁ ଲାଗିରହିଛି |
ଦଶହରା ପୂଜା ମହୋତ୍ସବରେ ଭୋଟର ବ୍ୟସ୍ତ ଥିବା ବେଳେ ପ୍ରାର୍ଥୀ ମାନେ ମଧ୍ୟ ନିଜ ନିଜର ପ୍ରଚାର ପ୍ରସାର ପାଇଁ ବିଭିନ୍ନ ପୂଜା ମଣ୍ଡପରେ ଜମାଇଛନ୍ତି ଆସର | ବିଜେଡି ,ବିଜେପି ଓ କଂଗ୍ରେସ ଦଳର ସମସ୍ତ ପ୍ରାର୍ଥୀଙ୍କୁ ଦେଖିବାକୁ ମିଳୁଛି ମାଆ ଦୁର୍ଗାଙ୍କ ପୂଜା ମଣ୍ଡପ ମାନଙ୍କରେ |
ଉପନିର୍ବାଚନକୁ ଆଉ ଅଳ୍ପ ଦିନ ବାକି ରହିଥିବା ବେଳେ ମାନ୍ଦା ଦେଖାଯାଉଛି ମୈଦାନ | ପ୍ରାର୍ଥୀ ମାନେ ନିର୍ବାଚନୀ ମୈଦାନକୁ ଓହ୍ଲାଇଥିଲେ ସୁଦ୍ଧା ଫିକା ପଡିଛି ନିର୍ବାଚନୀ ପ୍ରଚାର | ତେବେ ଭୋଟର କାହା ମୁଣ୍ଡରେ କଳସ ଢାଲୁଛନ୍ତି ଏବଂ ମାଆ ଦୁର୍ଗା କେଉଁ ପ୍ରାର୍ଥୀ ଉପରେ ପ୍ରସନ୍ନ ହୋଇ ଆଶୀର୍ବାଦ ପ୍ରଦାନ କରୁଛନ୍ତି ତାହା ନିର୍ବାଚନର ଫଳାଫଳ ପରେ ହିଁ ଜଣାପଡିବ |
ବରଗଡରୁ ରାଜେଶ ସରାପ, ଇଟିଭି ଭାରତ
