ବରଗଡ: ରାଜ୍ୟରେ ବଢିବାରେ ଲାଗିଛି କୋରୋନା ପ୍ରଭାବ । ସୋମବାର ବରଗଡ ଜିଲ୍ଲାରେ ପୁଣି 3 ନୂଆ କୋରୋନା ସଂକ୍ରମିତ ଚିହ୍ନଟ ହୋଇଥିବା ଜଣାପଡିଛି । ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ଏନେଇ ସୂଚନା ମିଳିବ ପରେ ବରଗଡ ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନ ଏ ବିଷୟରେ ଗଣମାଧ୍ୟମକୁ ଜଣାଇଛନ୍ତି । ସଂକ୍ରମିତ 3 ଜଣ ବିଜେପୁର ବ୍ଲକର ହୋଇଥିବା ବେଳେ ଜଣେ ପୁଟୁକି ଗ୍ରୀଞ୍ଜେଲ ଗ୍ରାମର 24 ବର୍ଷୀୟ ଯୁବକ । ସେହିପରି ଲାଉମୁଣ୍ଡା ହାଇସ୍କୁଲ କ୍ବାରେଣ୍ଟାଇନ ସେଣ୍ଟରର 2 ଜଣ ତାମିଲନାଡୁ ଫେରନ୍ତା 22 ଓ 19 ବର୍ଷର ଯୁବକ ମଧ୍ୟ ପଜିଟିଭ ଚିହ୍ନଟ ହୋଇଛନ୍ତି ।
ଏହି ଖବର ଜଣା ପଡିବା ପରେ ବର୍ତ୍ତମାନ ସମ୍ପୃକ୍ତ ଅଞ୍ଚଳକୁ କଣ୍ଟେନମେଣ୍ଟ ଜୋନ ଭାବରେ ଘୋଷଣା କରାଯାଇଛି । ସୂଚନା ଅନୁଯାୟୀ ଲାଉମୁଣ୍ଡାର ଦୁଇ ଜଣ ପୁରୁଷ କ୍ବାରେଣ୍ଟାଇନ ସେଣ୍ଟରରେ ରହିଥିବା ବେଳେ ପୁଟୁକୀ ଗ୍ରୀଞ୍ଜେଲର ପୁରୁଷ ଜଣକ ସେଠାରୁ ଘରକୁ ଫେରିଥିଲେ । ତେବେ ସ୍ବାସ୍ଥ୍ୟ ବିଭାଗ ପକ୍ଷରୁ ଉଭୟ ପୁଟୁକୀ ଗ୍ରୀଞ୍ଜେଲ ଏବଂ ଲାଉମୁଣ୍ଡା ଅଞ୍ଚଳରେ ସ୍ବାସ୍ଥ୍ୟ ବିଭାଗର ଏକ ଟିମ ଘରକୁ ଘର ବୁଲି କଣ୍ଟାକ୍ଟ ଟ୍ରେସିଂ ଆରମ୍ଭ କରିଛନ୍ତି ।
କୈଳାଶ ପୁର, ପୁଟୁକା, ଲାଉମୁଣ୍ଡା, ଟାଙ୍ଗୁରୁ ପଦର ଓ ଖଣ୍ଡା ଗ୍ରାମମାନଙ୍କୁ ବଫର ଜୋନ ଘୋଷଣା କରାଯାଇଥିବା ବେଳେ ରାନିମାଳ ପ୍ରାଥମିକ ବିଦ୍ୟାଳୟ ଏବଂ ଲାଉମୁଣ୍ଡା ହାଇସ୍କୁଲର କ୍ବାରେଣ୍ଟାଇନ ସେଣ୍ଟର କଣ୍ଟେନମେଣ୍ଟ ଜୋନରେ ରହିଛି । ଏହି ସମସ୍ତ ଅଞ୍ଚଳ ଗୁଡିକରେ ପ୍ରଶାସନର କଡା ନଜର ରହିଛି । ସମସ୍ତ ଆକ୍ରାନ୍ତଙ୍କୁ ବରଗଡ କୋଭିଡ କେୟାର ସେଣ୍ଟରକୁ ଚିକିତ୍ସା ପାଇଁ ପଠାଯାଇଛି ।
ସେପଟେ ସୋମବାରର ନୂଆ 3 ଜଣ ସଂକ୍ରମିତଙ୍କୁ ମିସାଇ ଏଯାବତ୍ ବରଗଡ ଜିଲ୍ଲାରେ ମୋଟ 11 ଜଣ କୋରୋନା ପଜିଟିଭ ଚିହ୍ନଟ ହୋଇଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
