ବରଗଡ: ବରପାଲି ମଦଭାଟି ହତ୍ୟାକାଣ୍ଡ ଘଟଣାରେ ଦୁଇ ଅଭିଯୁକ୍ତକୁ ଗିରଫ କଲା ପୋଲିସ । ଗତ ରବିବାର ପଦ୍ମପୁର ଉପଖଣ୍ଡ ବୁଡେନ ଥାନା ଅନ୍ତର୍ଗତ ବିରିପାଳି ଗ୍ରାମର ମଦଭାଟିରେ ହୋଇଥିବା ହତ୍ୟାକାଣ୍ଡ ଘଟଣାରେ ସୋମବାର ପଦ୍ମପୁର ପୋଲିସ ଦୁଇଜଣ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି | ଏହି ହତ୍ୟାକାଣ୍ଡର 24 ଘଣ୍ଟା ମଧ୍ୟରେ ସମ୍ପୃକ୍ତ ଅଭିଯୁକ୍ତଙ୍କୁ ପୋଲିସ କାବୁ କରିଥିବାରୁ ସ୍ଥାନୀୟ ଲୋକେ ପୋଲିସ ପ୍ରଶଂସା କରିଛନ୍ତି |
ତେବେ ବରଗଡ ଏସପି ପଦ୍ମିନୀ ସାହୁ ଏନେଇ ଏକ ସାମ୍ବାଦିକ ସମ୍ବିଳନୀରେ ଘଟଣାର ପର୍ଦାଫାସ କରିଛନ୍ତି । ପୋଲିସର ସୂଚନା ଅନୁଯାୟୀ, ବିରିପାଳି ମଦଭାଟିକୁ ମଦ ପିଇବାକୁ ଯାଇଥିବା ଦୁଇ ଜଣ ଯୁବକ ପ୍ରଥମେ ମଦ ପିଇଥିଲେ । ଏହାପରେ ଭାଟିର ମ୍ୟାନେଜର ସହିତ ଝଗଡା କରିଥିଲେ | ଭାଟିରେ କାମ କରୁଥିବା କର୍ମଚାରୀ ପ୍ରମୋଦ ସାହୁ ଉଭୟ ଯୁବକମାନଙ୍କୁ ଭାଟି ବାହାରକୁ ଘଉଡାଇ ଦେଇଥିଲେ ।
ସେହି ସମୟରେ ଜଣେ ଯୁବକ ଚାବିରିଙ୍ଗରେ ଲାଗିଥିବା ଏକ ଛୋଟିଆ ଛୁରୀରେ ପ୍ରମୋଦଙ୍କ ପେଟ ଓ ଛାତିରେ ତିନିଥର ଆକ୍ରମଣ କରିଥିଲା । ଫଳରେ ପ୍ରମୋଦ ତଳେ ପଡିଯାଇଥିଲେ | ଏହାପରେ ମଦଭାଟିର ଅନ୍ୟ କର୍ମଚାରୀମାନେ ଗୁରୁତର ଅବସ୍ଥାରେ ପ୍ରମୋଦଙ୍କୁ ପଦ୍ମପୁର ଡାକ୍ତରଖାନାକୁ ଆଣିଥିଲେ । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ |
ଖବର ପାଇ ଘଟଣାସ୍ଥଳ ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିଲେ ଏବଂ 24 ଘଣ୍ଟା ମଧ୍ୟରେ ଉଭୟ ଅଭିଯୁକ୍ତଙ୍କୁ କାବୁ କରିବାରେ ସଫଳ ହୋଇଥିଲା । ତେବେ ଗିରଫ ହୋଇଥିବା ଅଭିଯୁକ୍ତ ହେଲେ ଭେଲୁଆପଦ ଗ୍ରାମର ଭଗବାନ ବରିହା(20) ଏବଂ କନ୍ସର ଗ୍ରାମର ଜଗଦୀଶ ବିଶ୍ଵାଳ (19) |
ପୋଲିସ ଉଭଯଙ୍କୁ ଗିରଫ କରି ସୋମବାର କୋର୍ଟକୁ ଚାଲାଣ କରିଛି | ତେବେ ଏହି ଅଞ୍ଚଳରେ ନିଶା କାରବାର ବ୍ୟାପକ ମାତ୍ରାରେ ବଢି ଚାଲିଥିବାରୁ ଏପରି କମ ବଯସର ଯୁବକମାନେ ମଧ୍ୟ ଏହାର ଶିକାର ହେଉଛନ୍ତି । ଏବଂ ଚୋରୀ, ଡକାଯତି ଓ ହତ୍ୟା ପରି ଘଟଣା ବଢିଚାଲିଛି |
ବରଗଡରୁ ରାଜେଶ ସରାପ, ଇଟିଭି ଭାରତ
