ବାଲେଶ୍ବର: ପୁଣି ଡିଆରଡିଓକୁ ମିଳିଲା ଆଉ ଏକ ସଫଳତା । ଭୂପୃଷ୍ଠରୁ ଆକାଶକୁ ନିକ୍ଷେପ ହୋଇଥିବା କ୍ୟୁକ୍ ରିଆକସନ୍ ସର୍ଫେସ୍ ଟୁ ଏୟାର ମିସାଇଲ୍ (କ୍ୟୁଆରଏସଏଏମ୍) ସଫଳତାର ସହ ଲକ୍ଷ୍ୟଭେଦ କରିଛି ।
ବାଲେଶ୍ବର ସ୍ଥିତ ଚାନ୍ଦିପୁର ସମନ୍ୱିତ କ୍ଷେପଣାସ୍ତ୍ର ପରୀକ୍ଷଣ କେନ୍ଦ୍ରର 3 ନମ୍ବର ଉତକ୍ଷେପଣ କେନ୍ଦ୍ରରେ ଆଜି (ମଙ୍ଗଳବାର) ଅପରାହ୍ନ 3ଟା 40 ମିନିଟରେ ଏହି ପରୀକ୍ଷଣ କରାଯାଇଥିଲା । ଯାହା ସଫଳତାର ସହ ଲକ୍ଷଭେଦ କରିଛି । ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ଭୂପୃଷ୍ଠରୁ ଆକାଶକୁ ନିକ୍ଷେପ କରାଯାଇ ପାରୁଥିବା ଏହାର ଲକ୍ଷ୍ୟ ଭେଦି କ୍ଷମତା 30 କିଲୋମିଟର ରହିଛି।
ତେବେ ସ୍ବଳ୍ପ ଦୂରଗାମୀ କ୍ଷେପଣାସ୍ତ୍ର କ୍ବିକ୍ ରିଆକ୍ସନ୍ ସରଫେସ୍ ଟୁ ଏୟାର ମିସାଇଲ ବା QRSAM ସଫଳତାର ସହିତ ଲକ୍ଷ୍ୟ ଭେଦ କରିଛି । ଏହି କ୍ଷେପଣାସ୍ତ୍ରଟି ଯେକୌଣସି ସ୍ଥାନରୁ ମୋବାଇଲ୍ ଲଞ୍ଚର ସହାଯ୍ୟରେ ଶତ୍ରୁପକ୍ଷର ଟ୍ୟାଙ୍କ, ଯୁଦ୍ଧ ବିମାନ ଓ ଏୟାରକ୍ରାଫ୍ଟକୁ ଧ୍ବଂସ କରିପାରିବ ।
ଡିଆରଡିଓ ଓ ଭାରତ ଇଲେକ୍ଟ୍ରୋନିକ ଓ ଭାରତ ଡାଇନାମିକର ସହାୟତାରେ ଏହି କ୍ଷେପଣାସ୍ତ୍ରର ବିକାଶ କରିଛି । ଏହାର ପ୍ରଥମ ପରୀକ୍ଷା ୨୦୧୭ ମସିହା ଜୁନ ୪ ତାରିଖରେ କରାଯାଇଥିଲା । ତେବେ QRSAM ର ସଫଳ ପରୀକ୍ଷଣ ପରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଡିଆରଡିଓକୁ ଶୁଭେଚ୍ଛା ଜଣାଇଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
