ବାଲେଶ୍ଵର: ଜିଲ୍ଲାର ସେରଗଡ ଟୋଲ ଗେଟ ଅଫିସ ଆଗରେ ଆଜି ଲୋକଙ୍କ ଭିଡ ଦେଖିବାକୁ ମିଳିଥିଲା। ନିଜ ନିଜ ଗାଡି ପାଇଁ ଫାସ୍ଟ୍ୟାଗ ଆବେଦନ ପାଇଁ ଲୋକେ ଲାଇନ ଲଗାଇ ଦେଇଥିଲେ।
ଦେଶରେ ଫାସ୍ଟ୍ୟାଗ ଲାଗୁ ହେବା ନେଇ ଖବର ମିଳିବା ପରେ ଗାଡି ମାଲିକ ଏହାକୁ ସହଜରେ ଗ୍ରହଣ କରି ପାରୁନାହାଁନ୍ତି।
ଡିସେମ୍ବର ପହିଲାରୁ ଏହାକୁ ଲାଗୁ କରିବା ପାଇଁ ନିର୍ଦେଶ ମିଳିଥିଲା। ହେଲେ ଏହା 15 ତାରିଖ ଯାଏ ଘୁଞ୍ଚିଥିଲା। ମାତ୍ର ପୁଣିଥରେ ଏହାକୁ ଜାନୁଆରୀ 15 ପର୍ଯ୍ୟନ୍ତ କୋହଳ କରାଯାଇଛି। ଏହାରି ଭିତରେ ଗାଡିର ଫାସ୍ଟ୍ୟାଗ ବ୍ୟବସ୍ଥା କରାଇବା ପାଇଁ କୁହାଯାଇଛି। ହେଲେ ବାଲେଶ୍ବରର ଲୋକାଲ ଗାଡି ଓ ବ୍ୟକ୍ତିଗତ ବ୍ୟବହାର ପାଇଁ ଉଦ୍ଦିଷ୍ଟ ଯାନ ପାଇଁ ନିୟମରେ ପରିବର୍ତ୍ତନ ଦାବି କରିଛନ୍ତି ଲୋକେ। ଏମିତିକି ଫାସ୍ଟ୍ୟାଗରେ କେତେ ଟଙ୍କା କଟୁଛି ସେ ବିଷୟରେ ସଠିକ ତଥ୍ୟ ଗାଡିର ମାଲିକ ପାଇବାରେ ଅସୁବିଧା ହେଉଛି ବୋଲି ଅଭିଯୋଗ ହୋଇଛି।
ଲୋକେ ଫାସ୍ଟ୍ୟାଗକୁ ନେଇ ଦ୍ଵନ୍ଦରେ ପଡୁଥିବା ବେଳେ କେତେକ ଲୋକ ଏହାକୁ ସ୍ବାଗତ କରିଛନ୍ତି। ଏହା ଦ୍ବାରା ଟୋଲ ଗେଟରେ ଶୀଘ୍ର ଯିବା ଆସିବା କରିହେବ ବୋଲି କହିବା ସହ ଏହାକୁ ସ୍ବାଗତ କରିଛନ୍ତି।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
