ବାଲେଶ୍ବର: ଜିଲ୍ଲାରେ ସରକାରୀ ମେଡିକାଲ ପ୍ରତିଷ୍ଠା ପରେ ଆଶା ଥିଲା ଲୋକଙ୍କୁ ଉତ୍ତମ ଚିକିତ୍ସା ସୁବିଧା ଯୋଗାଇ ଦିଆଯିବ । ହେଲେ ଏଠି ରୋଗୀଙ୍କ ଜୀବନ ସହ ଚାଲିଛି ଖେଳ । ଏପରିକି MRI ସେଣ୍ଟର ସହ ଡାକ୍ତରଙ୍କ ସଲାସୁତୁରା ଚାଲିଥିବା ଅଭିଯୋଗ ହୋଇଛି ।
ବାଲେଶ୍ବର ମେଡିକାଲରେ ରୋଗୀଙ୍କ ଜୀବନ ସହ ଖେଳ । MRIରେ ଚଞ୍ଚକତା ଅଭିଯୋଗ । ଡାକ୍ତର ପ୍ରେସ୍କ୍ରିପସନରେ MRI ପାଇଁ ଲେଖୁ ନାହାଁନ୍ତି, କିନ୍ତୁ MRI ଫର୍ମରେ MRI ପାଇଁ ଲେଖାଯାଇଛି । ଖାଲି ସେତିକି ନୁହେଁ ଡାକ୍ତରଙ୍କ ଦସ୍ତଖତ ଆଉ ଷ୍ଟାମ୍ପ ମଧ୍ୟ ରହୁଛି ଫର୍ମରେ । MRI ସେଣ୍ଟରରେ ମଧ୍ୟ ମହଜୁଦ ରହୁଛି ଡାକ୍ତରଙ୍କ ଷ୍ଟାମ୍ପ ଓ ଦସ୍ତଖତ । ଏକଥା ଆମେ କହୁନୁ ମେଡିକାଲରେ କାର୍ଯ୍ୟରତ ଥିବା ଏମଆରଆଇ କର୍ମଚାରୀ ହିଁ କହୁଛନ୍ତି ।
ଏହି ମେଡିକାଲକୁ ପ୍ରତ୍ୟେକ ଦିନ ଶହ ଶହ ରୋଗୀ ଆସୁଛନ୍ତି । ହେଲେ ତାଙ୍କ ଅଜାଣତରେ ଚାଲିଛି ସାଙ୍ଘାତିକ ଖେଳ । ଡାକ୍ତର ଓ MRI ସେଣ୍ଟର ମଧ୍ୟରେ ଭିତିରିଆ ସମ୍ପର୍କ ଥିବା ନେଇ ଅଭିଯୋଗ ହୋଇଛି । ଘଟଣା ସମ୍ପର୍କରେ ଜଣାପଡିବା ପରେ ଖୋଦ୍ ସିଡିଏମଓ ପହଞ୍ଚି , ଡକ୍ୟୁମେଣ୍ଟ ଯାଞ୍ଚ କରିବା ସହ ଘଟଣାର ତଦନ୍ତ ହେବ ବୋଲି କହିଛନ୍ତି । ଏପଟେ ମେଡିକାଲରେ ଏପରି ଅନିୟମିତତା ଯୋଗୁଁ ନାନା ହଇରାଣ ହରକତ ହେଉଛନ୍ତି ରୋଗୀ ।
ଏଠି ପ୍ରଶ୍ନ ଉଠୁଛି, ଯଦି ଡାକ୍ତର ପ୍ରେସ୍କ୍ରିପସନରେ MRI ପାଇଁ ଲେଖୁ ନାହାନ୍ତି ତେବେ ତାଙ୍କ ଦସ୍ତଖତ ପୁଣି ଏମଆରଆଇ ଫର୍ମରେ କେମିତି ରହୁଛି। ଡାକ୍ତର ଓ ଏମଆରଆଇ ସେଣ୍ଟରର କିଛି ଭିତିରି ସମ୍ପର୍କ ରହିଛି କି ? ତଦନ୍ତ ପରେ ହିଁ ପ୍ରକୃତ ସତ୍ୟ ସାମ୍ନାକୁ ଆସିବ ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
