ବାଲେଶ୍ଵର: ପୁଅର ଚିକିତ୍ସା ପାଇଁ ମା ମାଗୁଛି ଭିକ୍ଷା । ଏଭଳି କିଛି ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ବାଲେଶ୍ବର ଜିଲ୍ଲାରେ । ମୋତେ କିଛି ସାହାଯ୍ୟ କର ମୋ ପୁଅକୁ ଚିକିତ୍ସା କରିବି । କୋହଭରା କଣ୍ଠରେ ଏମିତି କହି କହି ଗ୍ରାମରେ ଭିକ୍ଷା ମାଗୁଛି ମାଗୁଛନ୍ତି ଭୋଗରାଇ ବ୍ଲକ ଖେଡସାହି ଗ୍ରାମର ଗୁରୁବାରି ପ୍ରଧାନ ।
ପରିବାର କହିଲେ ଏକ ମାତ୍ର ପୁଅ ଚନ୍ଦନ । ସ୍ବାମୀଙ୍କ ମୃତ୍ୟୁ ପରେ ଭାବିଥିଲେ ପୁଅର ମୁହଁ ଦେଖି ବାକି ଜୀବନଟା କାଟି ଦେବେ । ହେଲେ ଦଇବ ସାଜିଲା ବଇରୀ । ପୁଅ ଚନ୍ଦନ ପିଠିରେ ଟିୟୁମର ହୋଇଥିବାରୁ ନା ସେ ଉଠି ପାରୁଛନ୍ତି ନା କିଛି କରିପାରୁଛନ୍ତି । ଫଳରେ ପରିବାରର ଦୁଃଖ ଏବେ କହିଲେ ନସରେ। ପାଖରେ ଅର୍ଥ ଅଭାବ ହେତୁ ପୁଅକୁ ମଧ୍ୟ ଚିକିତ୍ସା କରିବାକୁ ସକ୍ଷମ ନୁହନ୍ତି ଗୁରୁବାରି । ଯେଉଁଠି ଦୁଇ ଓଳି ଦୁଇ ମୁଟା ଖାବା ମୁସକିଲ ସେଠି ଚିକିତ୍ସା ପାଇଁ ଟଙ୍କା ଆସିବ ବା କେଉଁଠୁ । ଏମିତି ପରିସ୍ଥିତି ଭିତରେ ଗୁରୁବାରିଙ୍କ ପୁଅ ଚନ୍ଦନଙ୍କ ପିଠିରେ ଟ୍ୟୁମର ବଢି ତାହା ପାଚିବାକୁ ବସିଲାଣି । ହେଲେ ପୁଅକୁ ଭଲ କରିବା ପାଇଁ ମା ନିକଟରେ ଆଖିର ଲୁହ ଛଡା ଆଉ କିଛିବି ନାହିଁ ।
ଗୁରୁବାରିଙ୍କ ଏପରି ପରିସ୍ଥିତି ନେଇ ଗ୍ରାମବାସୀ ଜଳେଶ୍ବର ଅଞ୍ଚଳର ସ୍ୱେଚ୍ଛାସେବୀ ସଂଗଠନ ହେଲ୍ପ ଫର ୟୁକୁ ଖବର ଦେଇଥିଲେ । ଏହା ପରେ ସଂଗଠନର କର୍ମକର୍ତ୍ତାମାନେ ଗୁରୁବାରିଙ୍କ ପାଖରେ ପହଞ୍ଚି ତାଙ୍କୁ ଆର୍ଥିକ ସହାୟତା ଯୋଗାଇ ଦେଇଛନ୍ତି । ଏହାସହ ରାସନ ସାମଗ୍ରୀ ଓ ପୋଷାକ ପ୍ରଦାନ କରାଯାଇଛି।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
