ବାଲେଶ୍ଵର: ଜିଲ୍ଲା ସ୍ଥିତ ଶ୍ରୀକୃଷ୍ଣପୁର ଗାଁରୁ ମହିଳାଙ୍କ ମୃତଦେହ ଝୁଲନ୍ତା ଅବସ୍ଥାରେ ଉଦ୍ଧାର । ବାପା ହତ୍ୟାକରି ଏକ ଗଛରେ ଟାଙ୍ଗି ଦେଇଥିବା ନେଇ ପୁଅଝିଅଙ୍କ ଅଭିଯୋଗ । ଅଭିଯୋଗ କ୍ରମେ ପୋଲିସ ପହଞ୍ଚି ଅଭିଯୁକ୍ତ ବାପାକୁ ଗିରଫ କରି ପଚରା ଉଚରା ଜାରି ରଖିଛି ।
ପ୍ରାଥମିକ ସୂଚନା ଅନୁଯାୟୀ ବାଲେଶ୍ବର ଜିଲ୍ଲା ଶିଳ୍ପାଞ୍ଚଳ ଥାନା ଅଧୀନ ଶ୍ରୀକୃଷ୍ଣପୁର ଗାଁର ଏକ ଗଛରୁ ମହିଳାଙ୍କ ମୃତଦେହ ଉଦ୍ଧାର କରାଯାଇଛି । ମୃତ ମହିଳାଜଣକ ଆଦିବାସୀ ସାହିର ଶିବାନୀ ସିଂ ବୋଲି ଜଣାପଡିଛି । ଶିବାନୀ ପ୍ରଥମ ସ୍ବାମୀଙ୍କ ମୃତ୍ୟୁ ପରେ ଉମେଶଙ୍କୁ ଦ୍ବିତୀୟ ବିବାହ କରିଥିଲେ । ମାତ୍ର ଉମେଶଙ୍କ ସହ ତାଙ୍କର ଅଧିକାଂଶ ସମୟରେ ପାରିବାରିକ କଳହ ଲାଗି ରହୁଥିଲା ।
ତେବେ ଉମେଶ ଶିବାନୀଙ୍କୁ ହତ୍ୟାକରି ଗଛରେ ଟାଙ୍ଗି ଦେଇଥିବା ତାଙ୍କ ପୁଅ ଏବଂ ଝିଅ ଅଭିଯୋଗ କରିଛନ୍ତି । ଅଭିଯୋଗ କ୍ରମେ ପୋଲିସ ଘଟଣାସ୍ଥଳରେ ସାଇଣ୍ଟିଫିକ ଟିମ ସହ ପହଞ୍ଚି ତଦନ୍ତ ଆରମ୍ଭ କରିଛି । ଏଥିସହ ଉମେଶଙ୍କୁ ଅଟକ ରଖି ପଚରା ଉଚରା କରୁଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
