ବାଲେଶ୍ୱର: ଜିଲ୍ଲାର ଟାଉନ ଥାନା ଅଧୀନ ସୁନହଟ ସ୍ୱାସ୍ଥ୍ୟକେନ୍ଦ୍ର ପଛପଟେ ଥିବା ଏକ ବେଲଗଛରେ ଜଣେ ଯୁବକଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା । ମୃତଦେହ ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ତେବେ ଘଟଣାସ୍ଥଳରେ ପୋଲିସ ବିଳମ୍ବରେ ପହଞ୍ଚିବା ନେଇ ଲୋକଙ୍କ ମଧ୍ୟରେ ଉତ୍ତେଜନା ଦେଖାଦେଇଛି ।
ତେବେ ଏହା ହତ୍ୟା ନା ଆତ୍ମହତ୍ୟା ତାହା ସନ୍ଦେହ ଘେରରେ ରହିଛି । ଘଟଣାସ୍ଥଳରେ ପୋଲିସ ପହଞ୍ଚିବା ବିଳମ୍ବ ଯୋଗୁଁ ଟାୟାର ଜାଳି ଚାନ୍ଦିପୁର ବାଲେଶ୍ୱର ରାସ୍ତା ଅବରୋଧ କରିଥିଲେ ସ୍ଥାନୀୟ ଲୋକେ । ଦୀର୍ଘ ସମୟ ରାସ୍ତା ଅବରୋଧ ପରେ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଥିଲା ।
ମିଳିଥିବା ସୂଚନା ଅନୁସାରେ, ଯୁବକ ଜଣଙ୍କ ମଛୁଆସାହି ଅଞ୍ଚଳର ସେକ ଅନସାରିଙ୍କ ପୁଅ ସେକ ଅସୁରୁଦ୍ଦିନ(୨୩) ବୋଲି ଜଣାପଡ଼ିଛି । ଅସୁରୁଦ୍ଦିନ ଏକ ପିକଅପ ଭ୍ୟାନରେ ଡ୍ରାଇଭର ଭାବେ କାମ କରୁଥିଲେ । ବୁଧବାର ରାତି 10ଟାରେ ସେ ଘରକୁ ଆସି ପୁଣି କୁଆଡେ ଚାଲି ଯାଇଥିଲେ। ଗୁରୁବାର ସକାଳେ ସୁନହଟ ମେଡିକାଲ ପଛ ପଟ ବେଲଗଛରେ ତାଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା । ଏହି ଘଟଣାରେ ପୋଲିସ ପ୍ରାଥମିକ ତଦନ୍ତ ଜାରି ରଖିଛି । ଶବ ବ୍ୟବଚ୍ଛେଦ ପରେ ସତ୍ୟାସତ୍ୟ ଜଣାପଡିବ ବୋଲି ପୋଲିସ କହିଛି ।
ବାଲେଶ୍ୱରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
